لماذا أنا مخلوق لا اجتماعي ؟
كل اللي بيعرفي بشكل شخصي بيعتبرني مخلوق لا اجتماعي و "أنا كذلك"، فأنا نادراً ما أزور الناس أو أشارك في مناسبة اجتماعية وإذا صدف وصار فأول انطباع للناس بيكون " لا مش معقول !!!"- " وشك ولا القمر !!" - " كيف عملتيها ؟ "
مؤكد أنا ما انولدت هيك " لااجتماعية " بس هي سلسلة من الأحداث والمواقف اللي جرتني على هالطريق، هالطريق اللي ما بيعجب والدتي أبداً ودايماً بتحكيلي والدمعة بعينها " ليش يمّه ما بتحبي تروحي على حدا؟ كل الناس بتزورنا وبتفقدنا ؟ "
الإجابة مش معقدة.. بس طويلة... شوي...
مثلاَ، لحد الآن فيه ناس بتزورك من غير موعد وبوقت غير مناسب وهاي مقدمة لإنك تكره زيارة هالشخص من قبل ما تبدا.. لحد الآن فيه جارة بتطب علينا يوم العطلة من الساعة 10 الصبح، يوم العطلة اللي بكون عملت له مليون مخطط ما بتضمن زيارتها، والساعة 10 لسه أصلا ما بكون غسلت وجهي ولا مشطت شعري!!
بضيع من وقتك ساعتين وثلاث وهي بتحكي حكي فاضي وبتشل أمل الحارة وما بتترك حد من شرها إلا وبتغتابه، والمطلوب إنك تقعد معها وتشاركها جلسة الغيبة والنميمة وتأيدها، طيب بلكن أنا ما بدي أبدا نهاري بسيرة الناس؟ المشكلة إنه إذا ما اغتبنا حدا فالزيارة ما إلها معنى من الأساس!!
وإذا بتحاول تغير معها الموضوع بتروح فيك على الطبيخ وقصص الولاد وحكي.. حكي.. حكي فاضي...
بتحكي معها ه دقائق عن السياسة وبتغتاب كل دول العالم بشعوبه... وفجأة بترجع تتشكون من زوجها وحماها وأولادها اللي ما درسوا... وحكي.. حكي.. حكي فاضي...
أنا دائما بحاول إني أقدم الضيافة وأهرب من الغرفة بأقصى سرعة بس إذا باغتتني بسؤال بضطر أضل واقفة بالغرفة شي نص ساعة أجاوب على أسئلتها الاستجوابية الفضولية الخبيثة اللي بتخللها انتقادات ورمي كلام طالع نازل.. وحكي.. حكي.. حكي فاضي...
طبعا ما تفكروا إنه سير هالجلسات بهالطريقة حكر على النساء.. لا أبداً.. وحتى الرجال بحكوا حكي فاضي على شوية كورة وسيارات وغيبة ونميمة، وسبق وشفت وشاركت بجلسة فيها الجنس الآخر.. ويا حبيبي إذا بتعطيهم مجال يحكوا عن السياسة بنزلوا فيك تحليلات ما أنزل الله بها من سلطان، وهم مش عارفين إني أنا كمان مبارح حضرت منبر الجزيرة مع العقيد الزيّات وعبدالباري عطوان وحفظت كل التحليلات زيهم بالزبط !!
طيب إذا بدي أسمع في كل زيارة اجتماعية قصص سخيفة وما بتهمني وما بتعنيني بالأساس، وبدي آكل 17 ألف تعليق وانتقاد، وأكسب جبال وجبال من الآثام، لليش الزيارة من أصلها؟ مش أتجنبها أحسن وأخف وجع راس ؟
بحكي لحالي يا بنت اتركي هالجيران والقرايب واعملي علاقات اجتماعية في محيط الشغل أحسن، وبحسن نيّة لما أوصل على الشغل بصبّح على الناس وبمد إيدي لزميلة وبسلّم عليها وبحكيلها: صباح الخير كيف حالك؟
بترد علي : " ييييييه، مالك على هالصبح؟ ليش شكلك هيك ؟ "، برد عليها بوقاحة بتوازي وقاحتها: " ماله شكلي؟ أحسن من شكلك !! " أو بادير وجهي عنها وبستغفر رب العالمين بصوت غير مسموع وبحكي لحالي يا فتّاح يا عليم!
طبعاً هي بتكون بدت نهارها بمذبحة مع أحد ما، يمكن مع حماتها أو زوجها وما لقيت غيري لتنفّس عن عقدها فيه! باخذ القرار إني ما راح أسلم على حد أبداً، فبصير نكدة و معقدة و "أبو الهول" !!
طيب لا هيك ولا هيك خلصانة منكو!!
بعد الظهر بيملّوا الموظفين من الشغل وبيبدوا تسلايتهم اليومية في الحكي على الناس، وما بيضل زميل ولا مدير ولا مواطن ألا وبيحكو عليه حتى المراسل الغلبان ما بيخلص من شرهم، و طبعا وبدافع المؤازرة والتكاتف الاجتماعي لازم تشاركهم الحوار، وإذا قررت إنك تسكت ببساطة لإنك ما بدك تطعن بأي بني آدم، بتطلع بنظرهم متواطئ ويمكن من بطانة المدير! ولا ليش ساكت؟ أكيد قاعد بيسجل وبيحفظ وراح يروح يفسد عنا !!!
استغفر الله العظيم ...
بتصير مناسبات اجتماعية عند وحدة من هالزميلات، زواج أو نجاح أو مولود جديد.. بنقرر يوم للزيارة وبنقرر نشتري هدية، وبنبدا نجمع فلوس.. طبعاً للهدية.. إذا دفعت مبلغ كبير وأنا قصدي - ودّ الزميلة - لا أكثر ولا أقل بصير منافقة أو موجهنة ( الشخص الذي يدّعي الوجاهة )، وإذا دفعت مبلغ قليل فأنا بخيلة ومعفنة و ما بقدّر الناس !!!
وبعدين مع هالعيشة؟
وطبعاً إذا نجحنا في إنّا نتخطّى مسألة الهدية وفعلاً نروح على الزيارة بتكرّر مشهد جارتنا هو هو.. الخالئ الناطئ !!!
بتخذ القرار الحازم إني ما عدت أشارك في هدية ولا مناسبة ولا بدي أي علاقة مع حد ... بس فكركوا بخلص منهم؟ ليش ما بدي أشارك؟ وشو قصدي من ورا هالتصرف؟ وباكل مليون تعليق مع نظرات اشمئزازية واستهجان واستنكار واستغراب ليش أنا هيك معقّدة ومش اجتماعية؟
بنيجي لأكثر مناسبة أنا بكرهها ... الأعراس...
الوالدة بتقنعني أروح على عرس علشان الإنبساط وتغيير الجو.. فبقتنع.. وبروح...
العريس والعروس ( VIP ) لازم يتأخروا ساعة لحد ما الناس تعوف حالها.. وبعدين بدخلوا على القاعة على رقصة slow... العريس بحضنها وهي بترتمي بين إيديه وبيسيحوا على بعض.. العريس بيرتفع ضغطه وبصير عرقه شلّال والعروس بتجيب محرمة ( فاين ) لتمسحله جبينه.. طيب ما إنت وهو كمان ساعة رايحين عالبيت سوا لازم هالمشهد المقزز قدام الناس ؟ صبرتوا كل شهور الخطبة مش عارفين تصبروا هالساعة؟ ارحمونا !!
برجع العريس والعروس عالكوشة وبتسمّر العريس مكانه وبرفض المغادرة.. بنادوا عليه بمكبرات الصوت " العريس إلى قاعة الرجال... العريس... العريس.." وهو ولا هون... وإلكم رب وإلي رب ما بطلع!!!
لحد ما تيجي إمه تشده من إيده وتطلعه، ولحظة ما تخط رجله برّه بتتطاير العبايات والحجابات وبطلع من تحتيها ناس متلونة وبتبرق وبهجموا على حلبة الرقص في مبارزة حادّة للأزياء وتسريحات الشعر والتعرّي وما بيعود فيه حدود للعورات وكثير من الناس بتفقد هيبتها للأسف!!!
بتشعر العروس بالإهانة والتهديد وإنه راحت عليها ليلتها أمام هذا الكم الهائل من المنافسات، فبتنزل بسرعة على حلبة الرقص في محاولة بائسة لاسترداد جزء من كرامتها الضائعة، في مشهد كوميدي سخيف أسخف من كوميديا اللمبي!!
طيب أنا شو بيضطرني أشوف هيك شوفات؟ مش لو ضليت بالبيت أحسن؟
أنا عندي استعداد إني أتوحّد مع الجمادات وأعمل معاها علاقات وثيقة وأحسن من علاقاتي مع البشر، ساعة ضحك على فيلم لهاني رمزي أحسن من ألف عرس بالنسبة إلي، إذا واحد طلع عالتلفزيون وحكا كلام ما عجبني بحكيله "إخرس" وبكبس زر الريموت الأحمر وبسكته للأبد... بس جارتنا شو بيسكتها ؟
لحظة هدوء لحالي بين أربع حيطان أحسن من 7 ساعات شغل، وصفحة من جريدة أو مدونة أعز من أعز صاحب أو قريب...
هاي قصة إعتكافي للناس...
ومن أجل هذا أنا مخلوق لا اجتماعي !!!
الوالدة بتقنعني أروح على عرس علشان الإنبساط وتغيير الجو.. فبقتنع.. وبروح...
العريس والعروس ( VIP ) لازم يتأخروا ساعة لحد ما الناس تعوف حالها.. وبعدين بدخلوا على القاعة على رقصة slow... العريس بحضنها وهي بترتمي بين إيديه وبيسيحوا على بعض.. العريس بيرتفع ضغطه وبصير عرقه شلّال والعروس بتجيب محرمة ( فاين ) لتمسحله جبينه.. طيب ما إنت وهو كمان ساعة رايحين عالبيت سوا لازم هالمشهد المقزز قدام الناس ؟ صبرتوا كل شهور الخطبة مش عارفين تصبروا هالساعة؟ ارحمونا !!
برجع العريس والعروس عالكوشة وبتسمّر العريس مكانه وبرفض المغادرة.. بنادوا عليه بمكبرات الصوت " العريس إلى قاعة الرجال... العريس... العريس.." وهو ولا هون... وإلكم رب وإلي رب ما بطلع!!!
لحد ما تيجي إمه تشده من إيده وتطلعه، ولحظة ما تخط رجله برّه بتتطاير العبايات والحجابات وبطلع من تحتيها ناس متلونة وبتبرق وبهجموا على حلبة الرقص في مبارزة حادّة للأزياء وتسريحات الشعر والتعرّي وما بيعود فيه حدود للعورات وكثير من الناس بتفقد هيبتها للأسف!!!
بتشعر العروس بالإهانة والتهديد وإنه راحت عليها ليلتها أمام هذا الكم الهائل من المنافسات، فبتنزل بسرعة على حلبة الرقص في محاولة بائسة لاسترداد جزء من كرامتها الضائعة، في مشهد كوميدي سخيف أسخف من كوميديا اللمبي!!
طيب أنا شو بيضطرني أشوف هيك شوفات؟ مش لو ضليت بالبيت أحسن؟
أنا عندي استعداد إني أتوحّد مع الجمادات وأعمل معاها علاقات وثيقة وأحسن من علاقاتي مع البشر، ساعة ضحك على فيلم لهاني رمزي أحسن من ألف عرس بالنسبة إلي، إذا واحد طلع عالتلفزيون وحكا كلام ما عجبني بحكيله "إخرس" وبكبس زر الريموت الأحمر وبسكته للأبد... بس جارتنا شو بيسكتها ؟
لحظة هدوء لحالي بين أربع حيطان أحسن من 7 ساعات شغل، وصفحة من جريدة أو مدونة أعز من أعز صاحب أو قريب...
هاي قصة إعتكافي للناس...
ومن أجل هذا أنا مخلوق لا اجتماعي !!!
ههههههههههههههههههه
ردحذفمسخره بجد مسخره:))
وانتب بتحكي بحكي لحالي هيك هيك رح يكون السبب
للأسف مجتمعاتنا كتير فاضيه، وكل ما تكبري حتتأكدي من هالحقيقه المره
فبنصحك تستعدي:))
واحمدي الله ما انتي عايشه بقريه، كنتي حتضطري تتحملي كتير:))
ياي ...شو معئده ووشك ناشف!!!!هههههههه
ردحذفذكرتيني بموقف صار مع صاحبتي عالتلفون
اتصلت فيي الصبح بكيييير كتير, لسه انا بقول يا فتاح يا عليم...قلتلها اسمعي من اولها اذا بدك تشكي لي من بنت حماكِ...ما عندي خلق اسمع قصصك.
اذا بدك تشكي من جوزك...لا تحكي.
اذا بدك تسأليني شو طابخه اليوم...لا تسألي.
راحت مسكره الخط بوجهي هههههههه فكرت حالها غلطانه بالرقم!!!
أريح ...بدي اتوحد مع فنجان القهوه على الصبح وما عندي استعداد ابدا يومي بهالقصص! ولا حتى انهيه فيها.
على الهامش...صايره بتستفزي ذاكرتي كتير يا بطه!!!
خخخخخخخ
ردحذفدنيااااااااااااااااا
نعم للاعتكاف لا للاجتماعيات "الفارغة"
أي من قليل العالم بيجيها أمراض و وجع قلب
Salam Aleikom
ردحذفI know what you say, I understand it 100%
I saw part of it in my work, the department sharing the same floor with us is almost 90% females... and they have their office doors open all the time... and we have to listen to them talking, commenting, laughing, complaining, telling stories, criticizing each others.... bla bla bla bla...
And when I go and knock on the door of one of the offices and say 'shu r2ekom neshtaghel shwai lyom?'
They consider me rude and galeel zog and Allah y3in elli bedha ta5odni :-D
ليش ما بتكتبيلنا كل يوم
ردحذفعن جد حسيتك بتحكي بلساني لمن عبرتي عن شعورك اتجاه العروسين
الى متى ظاهرة الاعراس عن جد بكفينا قرف
انا مثل بالضبط ما احب اطلع من البيت والزيارات لأني بطبيعتي ما احب اكون في مكان فيه ناس كثير
ردحذفاحب الهدوء
بتصور هاد حال كتيير من البنات اللي مو ملاقين حدا يفهمهم ( اللي عقلهم كبير) :) فعادي ما تدايقي أخرتك بتلاقي حدا عقلوا يركب على عقلك ومامتك بتسير تتشكون شو ما بتزهقوا من بعض :P
ردحذفبالنسبة للجارات والنميمة للأسف هاد مرض موجود بالمجتمع وبتلاقيهم بغتابوا حتى بأشياء عكس بعض
مثلا بنت فلانة مستجوزة قال 19 سنة وخطبوها وبدها تتجوز كمان كم شهر شو هالحكي الفاضي
وبعد شوي
بنت فلانة بعتلها عريس هديك اليوم وقال ما بدها قبل ما تخلص جامعة شوف هالحكي هي الشهادة شو بدها تعمللها .. الخ
مشان هيك خلي معك بانادول احتياط للزيارات المفاجئة من الجارة المزعجة
دمت بخير
سبحان الله ...
ردحذفمش كبرة على الناس لكن .. الناس ما بتستحي ...
الي ما بيركب الموجة بيكون منبوذ لانو هو بالاصل نابذ المجتمع الرخيص الي حوليه ...
ونابذ التصرفات الرخيصة والتافهة من الي ما بيستحوا على حالهم و الناس وجهها صاير زي (الكطوشوك) بتعمل الغلط و بتجاهر فيه ... والي ماشي صحيح اعوج ...
انا استمتعت بالمقال كالعادة يا مس كياله ...
بس طولي بالك حبة وتذكري
الوحده عباده ...
U r right
ردحذفMe too I hate those silly visits i prefer to sit at home doing something useful rather than meeting silly ppl
السلام عليكم
ردحذفههههههههههههههههه
عارفة دا حال ناس كتير جدا يمكن اكون منهم يعنى الحال من بعضه
بس انا بقف مع كل الناس بصاحب كل الناس وبساعد كل الناس بس ماليش فى حتة المناسبات والكلام دا اصلها بتخنقنى
انا بعرف دكتورين جامعه من اربد معرفه شخصيه واحد هرب على الامارات والثاني راح سكن بعمان. كله بسبب الزيارات بدون موعد. شو بصير لو الناس تحكي تلفون وتسأل المضيف اذا فاضي ولا لأ. عجبتني كثير هاي الجمله
ردحذف"أنا عندي استعداد إني أتوحّد مع الجمادات وأعمل معاها علاقات وثيقة وأحسن من علاقاتي مع البشر،" ضحكت عليها كثير. فعلا احيانا البعد عن الناس افضل. يا ريت الناس تبطل الحكي اللي ما اله طعمه.
انا اذا اضطريت اقعد قعده فيها حكي مش عاجبني بسرح بخيالي وبصير افكر بأمور اخرى.
جراد
ردحذفإسألني عن الزيارات بلا موعد!! شيء لا يوصف يا زلمه!! معهم حق أصحابك يفلوا!!
بالإذن منك كياله خانوم:)
و الله يا سيتي كلامك مزبوط مية المية !
ردحذفبس بتعرفي انو المصيبة بمصيبتين بالنسبة النا احنا الشباب! لا مش من مبدأ للذكر مثل حظ الانثيين ، بس لانه الشب في صورة مرسومة بذهن الناس انه لازم يروح و يجي و يطلع و يطش و يحكي مع هاد و مع هداك ، بس لما الشخص يكون اله شخصية (اسمحيلي اسميها ) شخصية مميزة واعية مختلفة عن الاشخاص اللي حوليه الكل بصير يذم هاي الشخصية ! طيب ليش؟!! ليش انا لازم أكون دواووين و فايع و اطلع اطش على جنب الشارع مع كومة شباب و اطقس على البنات و اضحك زي اللي مش عارف مين ، بس ساعيتها بتحكي عني مخلوق اجتماعي؟!
طيب م لو انا قعدت اقرأ مجلة او احضر برنامج مش احسنلي من جلسة كلها مياعة و قلة حياة! يعني مثلا العائلة الكريمة عنا بحبه يعملو جمعة (مش يوم الجمعه) جمعة شباب و صبايا للعيلة!!! نعععم؟!! شو هالمسخرة هاي؟! و لما الواحد يحكي انا ما راح أروح بطلع شخص انطوائي و غير اجتماعي او حتى بالعكس بطلع شخص شايف حالو !!
اخ بس و الله فشيتي غلي!
سبحان الله...اليوم الصبح كان في موضوع عالراديو بحكي عن الايه
ردحذفوقال تعالى
يا أيها الذين آمنوا لا تدخلوا بيوتا غير بيوتكم حتى تستأنسوا وتسلموا على أهلها ذلك خير لكم لعلكم تذكرون
* فإن لم تجدوا فيها أحدا فلا تدخلوها حتى يؤذن لكم وإن قيل لكم ارجعوا فارجعوا هو أزكى لكم
والله بما تعملون عليم )
المشكله لو تحكي لحد مش فاضيين نستقبلكم ولو حتى بطبقو كل العبادات راح ينئمصو وليحكو عنكم لكل العالم :$
بالنسبة لشغلل الحكومه....طبعا بدون تعمبم لكن المفروض ما تكوني اجتماعيه بالمرررررررررررررررررررررره فيه :)
الاعراس............فااااااااا كفيتي و وفيتي :)
صح,, ليش إنتي مش إجتماعيه؟؟
ردحذفما إلك إلا تنضمي إلى الرَكب,, وتصيري نمامه,, ونقاله حكي,, عشان تعجبيهم
سنحه,,
صباح الخير ,, كيكي هانوم
مياسي:
ردحذفشكله شعورك زي شعوري لهيك كنتي عارفة عن شو عم بكتب. أنا بعرف إنك كمان ما بتحبي المناسبات زيي :)
أنا مستعدة والله. وبالنسبة للقرى ما تفكري عندي علم أصله ألي صاحبات بالشغل ساكنين لسه بقراهم وكل يوم بسمع قصص وروايات.
نيسان:
شفتي بالله شو معئدة!!!
بصراحة صاحبتك بتستاهل يعني الواحد فاضيلها على هالصبح! كل واحد والله يعينه على يومه...
هههه بس حلوة تتوحدي مع فنجان القهوة.. اما استفزاز ذاكرتك فشكله تجربتي الشخصية بتشبه تجربتك.. بما إنك سبقتيني شوي بهالدنيا طمنيني عن المستقبل :)
شيشاني:
ردحذفآه والله نعم للاعتكاف بس يا ترى بتخلص منهم؟ أبدا!!! الله يجيرنا من كل مرض وأوجاع :)
Baseball:
صحيح الله يعينها اللي بدها تاخدك :)))
بنصحك تغير الشغل لإنه هاد مرض لا يمكن استئصاله أو القضاء عليه :)
شكرا لمرورك واهلا وسهلا فيك دايما.
متابعة:
ردحذفشكرا لمرورك وبيسعدني اسمع تعليقك دايما :) يا ريت أفضى أكتب كل يوم بس والله المشاغل كتير..
ظاهرة ميوعة وسخافة الأعراس ما راح تنتهي لإنه الناس بحد ذاتها صايرة تافهة وقليلة حيا
white freedome:
يالله واحدة ثالثة انضمت لنادي محبي الهدوء أنا وإنتي ومياسي :)
شكرا لمرورك ومساءك سعيد
هناء:
ردحذفمين هدول اللي عقلهم كبير ؟؟؟ :)))
مش عارفة عن مين عم تحكي؟؟
المشكلة إنه الغيبة والنميمة والحكي هم سبب الزيارة وتخيلي لو ما بدهم يحكوا على حد شو ممكن يعملوا؟؟؟ بطلعوش من الدار أصلا!!
مسائك سعيد.. أنا دايما في شنطتي بندول إكسترا :)
Finalway:
والله إنت اختصرت كل الادراج المطول بهاي الجملة الجميلة:
((الي ما بيركب الموجة بيكون منبوذ لانو هو بالاصل نابذ المجتمع الرخيص الي حوليه ...))
بعد هيك ما عندي كلام وما راح أزعل إذا كنت بعيدة عنهم ولحالي..
بيشرفني إنك بتتمتع بزيارة هالمدونة وما راح أحكي أهلا وسهلا إنت من أهل الدار :)
طارق:
ردحذف(join the club !!)
يالله كثر عددنا صار لازم نعمل نادي أو ملتقى "لا إجتماعي" والمؤسسين: طارق -مياسي - white freedome- مدونة رحلة حياة- كيالة -
مدونة رحلة حياة:
إقرأ التعليق السابق إنت انضميت للملتقى تبعنا :)))
بهنيك على طولة بالك على الناس ومساعدتهم.. أنا والله ما إلي صبر !!
مساءك سعيد
jaraad:
ردحذفبالحكي عن أصحابك ذكرتني بأختي اللي ساكنة بالإمارات إجت بعطلة الصيف لشهرين وصرفت كوم مصاري على المجاملات والمناسبات السخيفة وبعدين حكت لو ضليت بالغربة أحسن !!!
المشكلة إنه الناس بتحكي عالتلفون بالساعات بس ما بتكلف خاطرها لتستأذنك قبل ما تيجي.. بيخافوا تعتذر فبيحطوك تحت الأمر الواقع.. وحتى لو اتصلوا مثلا واعتذرت منهم بيزعلوا وبياخدوا على خاطرهم!!!
يا سيدي منيح اللي خليناك تضحك :)
بس والله هالجملة لفتت انتباهي ((بسرح بخيالي وبصير افكر بأمور اخرى.)) إنت كمان؟؟؟ والله أنا مرات كثير عملتها!!
مساءك سعيد :))
ومياسي خدي راحتك كلنا قرايب ببعض:)))
د.وحل:
يعني المشكلة من اتجاهين حتى الشباب مش خلصانة!! يا سيدي الله يكملك بعقلك ويعفيك ويحميك من التفاهة والمسخرة.. والله خليك هيك وتحكي العالم شو ما تحكي!! الحمدلله اللي إنت كمان فشيت غلك زي ما أنا فشيت غلي :)
ويسبر:
ردحذفونعم بالله.. رب العالمين عارف الناس وحالها وتصرفاتها مشان هيك بيحطلها قواعد للسلوك الحسن بس مين بيطبق؟؟ زي ما حكيت حتى اللي بيعرفوا بالدين ما بيلتزموا في هالقواعد وكأنه الدين إشي والتعامل مع الناس إشي تاني مع إنه الدين أصلا معاملة حسنة!!
لا يا ستي عممي وعلى كل أماكن الشغل لازم ما تكون أبدا أبدا اجتماعي..
أما الأعراس والله قاهرتني والله!
مساءك سعيد
أم عمر:
صباحك ومسائ سعيد..
سنحه :)))) حلوة هاي
بالناقص !! يجعلني عمري ما كنت اجتماعية ولا عجبت حدا.
ههههههههههههههه
ردحذفاول شي ...سبقتك بكتير يا بطه
تانياً
اطمنك على المستقبل؟!!!
نصيحه من اختك الكبيره...ابدأي العلاج من الآن!
ان"تتعايشي مع الجاره " و تتأقلمي مع نميمة الموظفات وتتعاملي مع الاعراس وكأنك رايحه تحضري مسرحيه كوميديه سخيفه وتضحكي على الممثلين وهم بيمثلوا دور العريس والعروس
اذا فشل العلاج ما لك الا ....
أنك تحجزي مكان في مستشفى "الفحيص" عرفتيه؟ ههههههههههه
Unrelated to the topic but I just want to let you know that you have been tagged for the life is good award
ردحذفhttp://jaraad.wordpress.com/2011/01/22/the-life-is-good-award/
ektashafet ino el wa7d kol ma 7awal yshed 3a 7alo w y2addy w2t akbr m3 el nas el tafheen beseer zaihom aktr
ردحذف3shan haik ma ra7 a2ollek '3airy min mawqefek l2enny b3rf sh3oorek,m3 ino b7ess ino had el ishy ma ra7 ykoon la masla7tek bil nehaieh
bs shai2an a7lahoma morro!
نيسان:
ردحذفههههههههههههههه
لا مش كتير لا تفكري إني صغيرة!!
عالعموم يا أختي الكبيرة شكرا على النصيحة شكلي راح أختصر وأروح عالفحيص من هسه :)
ملاحظة على الهامش: شكرا على قسم مفضلات الأصدقاء في مدونتك ممتع وذكرني بإدراجات حلوة كنت ناسيتها :)
Rain:
والله يا رين أنا بحاول جهدي مرات بعدّيها وبتحمل العالم ومرات باخدها من قاصرها وما بعبر حد .
وزي ما حكيتي شيئان أحلاهما مر!!!
شكرا على مرورك :)
هههههههههههههههه
ردحذفكيالة !!!!!
أولا مرحبا (:
ضحكت من قمة رأسي !! يا ستي شكلي أنا راح أكون قائدة مجموعة المخلوقات الـ لا اجتماعية !! ههههه
أنا شبة بني آدميية ع قوله " احداهن" D:
لا بطيق حدا يشوفني ولا شوف حدا بحب أقعد لحالي وحط بوزي بهالاب توب أو بقعد بدرس و عايشة بأمان !!
بالنسبة للأعراس ::
في مرة زوجة عمي قالتلي أنتي اذا تزوجتي مش راح نحضر زواجك!!
أنا ضحكت والله قلتلها ليش عشان مش راح يكون فيه مسخرة !! << بعرف أكيد قالت عني قليلة أدب ههههههههه
أجواء الزواجات بتضايقني وبتذكرني بحمير حديقة الحيوانات !!
من الأخير يعني .. أنا جاهزة أنضم للمجموعة (:
بوستك روعة كنت والله بجد محتاجة أحكي و أضحك لنو بعيد عنك حاسة محاسيسي ومشاعيري تحت الصفر !
دمتِ بألف ألف خير (:
Bullet:
ردحذفمن أول ما شفت صورة جودي أبوت في مدونتك عرفت إنه مزاجك على مزاجي :))
أهلا وسهلا فيكي بنادي اللااجتماعيين :)
الله يخفف عنك والحمدلله إنه مزاجك تحسن.. معلش من فترة لفترة بمر الواحد بهيك مرحلة وبتنزل مشاعيره بس إنشاءالله بنسمع خبر حلو قريبا في مصر وبترتفع معنوياتنا كلنا..
شكرا لمرورك وتصبحين على ألف ألف خير :)