15‏/08‏/2010

...فرضيات

ليش لما دخلت المكتبة أشتري دفتر أعطاني صاحب المكتبة دفتر زهري مرسوم عليه ورد وبيبي؟ ليش افترض بما إني بنت لازم يكون الدفتر زهري؟ طيب أنا بكره اللون الزهري وعمري ما لبسته وما بتهمني الورود وعندي حساسية تجاه أي بيبي. طيب مش ممكن يكون بدي دفتر لونه برتقالي أو أخضر ومرسوم عليه تاج محل أو كرة سلّة أو عائلة سيمبسون مثلاً؟ 

ليش لما دخلت محل لل DVDs تكرّم البياع ودلني على قسم الأفلام الرومانسية؟ وليش افترض إني جاية مخصوص للأفلام الرومانسية؟ أنا أصلاً كنت جاية أشتري فيلم (Sweeny Todd) فيلم كئيب و دموي أو أي فيلم ل Johnny Depp لأنه ممثلي الفضل.

وليش لما دخلت المطعم أنا وأختي حكالي الجرسون: إيش طلبك مدام؟ وحكى لأختي بابتسامة واضحة: إيش طلبك يا صبية؟ وليش افترض إني أنا خالتها وهي صغيرة مع إنه فرق العمر بينا لا يذكر؟
يمكن لإني محجبة بجلباب وهي محجبة ببلوزة وتنورة عالموضة؟
على فكرة، هاي ما كانت المرة الأولى اللي بيعملي فيها الجلباب أزمة هويّة، فبالعادة الناس بتفترض تلقائياً إني رجعيّة أو معاقة ذهنياً أو مغلوب على أمري أو حتى بيئة! 
طيب ليش ما حدا افترض إني اخترت الجلباب بناء على قناعة وقرار شخصي 100% لإني عندي عقل بيفكر وبيوزن الأمور وصاحبة قرار وهاد اللي صار فعلاً؟

دخلت محل للألبسة أنا وأختي - نفسها المذكورة أعلاه - لنشتري فستان حفلة علشان مناسبة عائلية وعجبها فستان، فنادينا البيّاع علشان نسأل عن المقاسات، فحكالنا باستهجان: بس هاد الفستان غالي ب 80 دينار! طيب ليش افترض إنا ما معانا 80 دينار أو إنّا مش خرج نشتري هيك فستان؟ إيش كان لازم نعمل يعني؟
يمكن كان لازم ندخل عليه لابسين جينز ورافعين شعرنا بالنظارة الشمسية ونحكيله (Hi, cool, wassup) ليقتنع إنا بنقدر نشتري فستان سعره 80 دينار؟
طبعاً أختي ما مشتله إياها وعلى طول (طسّته) وحكتله: شو قصدك ما معانا فلوس؟ بدك هسه افتح الشنطة وتشوف المصاري علشان تقتنع إني بقدر أشتريه وأحسن منه كمان؟ ولا مفكرنا عميان مش شايفين بطاقة السعر؟
طبعاً صار يعتذر ويحكي لا والله وسلامة خيرك، بس ليش كان لازم يحط حاله بهيك موقف؟
وإحنا طبعا رميناله الفستان بوجهه وما رجعنا دخلنا على هالمحل مرّة ثانية.

وليش بعض الناس بتفترض إنها أحسن مني وأرقى مني بس تعرف مكان سكني؟ إيش المعيار اللي بيعمل حدا أحسن من حدا؟ بصراحة أنا واجهت هاي الفرضية مع أحد العمّانيين - وأنا بعتذر بشدّة من أصدقائي المدونين والي أغلبهم بيسكن بعمان وأنا بحبهم جدا وبحترمهم جدا جدا وما بدي يفهموني غلط - بس ليش هالشخص  بيفترض تلقائياً بما إنه من سكان عمان فهو أحسن من سكان المحافظات الثانية؟   

ليش دايماً بنسعى إنا نفترض ونصنّف الناس ونلصق على جبهتهم بطاقة تعريف وإحنا ما بنعرفهم أصلاً ولا بنعرف دواخلهم؟ ومين أصلاً أعطانا الصلاحية لهيك إفتراضات؟
هاي الافتراضات مزعجة لإنها بتحط الناس بموقف تضطرهم فيه يدافعوا عن حالهم وكإنهم عاملين شي غلط!

أنا ما بطلب من كل واحد بتعامل معي إنه يستقرأ شخصيتي ويتفهمني علشان يعاملني صح، لإنه هالشي أكيد مش ممكن.
بس مش ممكن إنه صاحب المكتبة يحكي: هاي هي الدفاتر اختاري اللي بيعجبك، ومن غير ما يفرض علي رأيه؟ ومش ممكن صاحب محل ال DVDs يحكيلي: اتفضلي شو فيه ببالك؟ و جرسون المطعم يبدا جملته: أهلا وسهلا تفضلي شو طلبك؟ من غير ما يفرض علي الألقاب؟ مش ممكن صاحب محل الملابس يلبي طلبي ويساعدني وساعة الدفع إذا معي خير وبركة وإذا ما معي الإحراج علي لحالي؟ 
مش ممكن أبدا الحوار مع أي حدا بتعرف عليه جديد ب: أهلاً وسهلا، تشرفنا بمعرفتك. ومن غير أي فوقية أو امتعاض أو سلبية؟


هناك 20 تعليقًا:

  1. انا بحب هاي المواضيع جدا. واسلوب الطرح رائع.
    ما يحدث في بلدنا يدل على ضيق افق هذه المجموعه من الناس. اذا بتلاحظي مجتمعنا ما بتعامل مع شخص على انه كيان منفرد دائما لازم يكون تابع لمجموعه معينه (فلسطيني، أردني، قروي، بدوي، نابلسي، فلاح، شمالي، جنوبي، ...)
    أنا تعلمت شيء جميل في الغربه ممكن بسبب كثرة الأجناس والأعراق اللي تعاملت معها وهو ان لا أفترض أي شيء عن اي شخص قبل ان اتعامل واتكلم معه (assume nothing)
    كذلك تعلمت شيء هون انه الواحد يستخدم كلمات مثل (بعض). يعني الواحد ما يقول كل البنات ولكن بعض البنات او ما يقول الاردنيون ولكن بعض الاردنيون. يفضل ما نستخدم كلمات مثل كل النساء بحبوا الافلام الرومانسيه وانما نقول اكثر النساء الخ...
    المشكله المستعصيه عنا انو (معظم) الناس عنا بتعمم (generalize).

    ردحذف
  2. مرحبا آنسه كياله

    أتفق كثيرا مع الكلام الذي تحدث به jaraad وهو فعلا مايتم في مجتمعنا ولكن أيضا المشكلة الرئيسة يا كياله في الاردن هي قضية التعصب التام للمظاهر ولو كانت على حساب الطعام والشراب ومن هنا بدأت قضية الافتراضات المسبقة التي تتحدثين عنها في الادراج .

    ومن المعروف تماما ما هي الاسس السريعة التي أصبحت تبنى عليها تلك الافتراضات عادة وهي :

    - نوع الموبايل .
    - نوع السياره .
    - الملابس .
    - مكان السكن .



    كل الود

    ردحذف
  3. صباح الخير آنستي الغاليه ...وكل سنه وانتي سالمه ....رمضان كريم وينعاد عليكي بالخير والبركه.

    نحنا بنموت في التعميم ووضع البشر في فئات ومصنفات لاعتقادنا انه من الاسهل علينا التعامل معهم بهذه الطريقه
    لانه لسه ما فهمنا ايش معنى انسان ...انسان منفرد بصفاته وتكوينه و نفسيته عن باقي البشر...لما الله يفرجها علينا ونوصل لهاي المرحله...ممكن نبطل نحكم على الخليلي بأنه بخيل وعلى النابلسي بأنه لئيم وعلى المحجبه انها بعقليه رجعيه وعلى الطير الطاير في السما بأنه ...نياااالو

    ردحذف
  4. طلع في حد ما بيحب الزهر متلي :)

    زكرتيني بافتراض انو اذا البنت ما بتستخدم كريمات كتير فهي مش بنت كفايه!!

    للاسف مع الوقت بيصير حكم الواحد عالاشياء رجعي اكتر بحكم الخوف والمجتمع والتقليد الاعمى

    ردحذف
  5. هاي من العادات الي من المستحيل إنا نسيبها او نغيرها..
    زي ما أنا الكل بفترض إني مش عربيه وبسيرو يتعاملو معي كأني سائحه..
    لو أنا دخلت على المحل هداك وسألت بكم الفستان كان قلي 120 وعشانك من زوار الأردن فا إلك ب 100..

    ردحذف
  6. للاسف في ناس طريقة تعاملهم و بناء احكامهم و فرضياتهم على غيرهم بتكون بمقاييس سطحيه جدا, والمظاهر اهم شي من وجهة نظر بعض الناس

    و لهيك بتلاقي مستحدثي النعمه بالعاده اول شي بنتقدوه بالناس هي صفاتهم و مواصفاتهم القديمه, كأن الفلوس بدها تغير منهم شي و كأنهم قبل الفلوس كانو ولا اشي و هلأ بالفلوس صارو اشي مهم

    احنا كمجتمع بالعاده ما بنعطي فرصه لنتعرّف على بعض ,و قبل ما نحكي مرحبا بنكون منتقدين 10 اشياء بالشخص اللي قدامنا وبانيين حكم مسبق عليه

    ردحذف
  7. مزبوط , عالاقل اذا ما بتعرف اشي عن شخصيتي , ما تحاول تحط افتراضات من عندك

    بحيّيكي على لبسك الجلباب

    بس بصراحة مش موقف من تبع محل الاواعي من مرة , جد برادة وجه بعيد عنك , بس بتخيّل انه تعلم الدرس للمرة الجاي

    ردحذف
  8. من مشاكلنا العويصة: الافتراضات المسبقة

    زي ما حكى الجميع هذا شيء مستشر فينا + عندما بقوة . شيء بغيض و مهلك للأعصاب!

    هدي أعصابك بس شوي لأنو إذا حتدققي كثير ما حتخلصي.

    الله يهدينا جميعا ً لسواء السبيل.

    ردحذف
  9. مساء الخير rain:
    بيسعدني انه البلوج عجبك واهلا وسهلا بزيارتك الاولى وان شاء الله دايمابتعيديها.


    مساءك سعيد jaraad:
    انت الرائع دوما بزيارتك وتعليقاتك الجميلة. صحيح الشخص عنا ما بيتعامل كفرد ودايما تابع لحد يمكن لانا مجتمع لسه عايش بالفكر القبلي.
    انا عني بكره التعميم وبكره اني اتحجم ضمن صفة او فئة يمكن انا ما بمت لها بصلة. واذا اتعلمت شي في الحياة ضمن خبرتي الصغيرة والمتواضعة فهي اني احترم كل الناس ومش بالضرورة اذا ما عجبني حد او ما بيناسبني صحبته على طول احتقره، بعامله برسمية واحترام وهو بحاله وانا بحالي شو راح اخسر يعني؟

    ردحذف
  10. والله يا آنسة كيالة انو موضوع انو الناس تحكم على بعضعها على المظهر للاسف منتشر بمجتمعنا و لدرجة كبيرة. و عشان هيك بنلاقي انو المواطن الاردني بيصرف اكتر من دخله باضعاف و بضله طول عمره مديون للبنك ... بس عشان منظره قدام الناس. ذكرتيني بموقف صار معي من قبل جد ضحكني لتفاهته و بينلي انو الناس ممكن توصل لمراحل ما كنت متخيلها و كانت القصه كلها عشان موبايلي عمره 3 سنين فافترض اخونا انو انا ما معي آكل عشان ما معي اشتري موبايل جديد مش انو انا مخليه عشان مرتاح عليه. و الله الوضع بيحزن و بضحك.

    ردحذف
  11. مساء الخير اشرف:
    لهالدرجة احنا صرنا تافهين؟
    شو موبايلي وسيارتي بتحدد هويتي؟ يعني ممكن يكون الشخص ما بيسوى ومعه كمن دينار بيشتري هاي (الأشياء) وخلص بيصير رائع وما فيه بعده؟
    هاي كلها (أشياء) وين انسانية الانسان واخلاقه ودينه؟

    مساءك سعيد نيسان:
    وكل سنة وانت سالمة وبخير وصحة سلامة انت والعيلة .. ورمضان كريم.
    والله كلامك صحيح احنا ما بنفهم لسه شو يعني انسان ولا بنهتم لمشاعر ولا لنفسية حد ! بس متى راح نصل لمرحلة بنحترم انسانية بعض؟ انا بالاغلب بهالامور متشائمة بس يمكن لو الواحد يبدا بحاله ويعلم ولاده نتغير شوي شوي.

    ردحذف
  12. هلا مياسي:
    عجبتني هاي كريمات مش كفاية! طيب واللي ما بتحط شي على وجهها ولا نقطة مكياج شو بتصير؟
    على الاغلب كلامك مزبوط اللي بيخلينا نتعامل هيك مع الناس هو الخوف من التعامل معهم او انه هالفرضيات صارت هوية مجتمع.


    مرحبا رولا:
    والله حمدالله عالسلامة وين هالغيبة؟
    اشتقت لتعليقاتك الحلوة والله زمان عنك.
    يالله يعاملوك سائحة احسن ما يعاملوك رجعية زي ما بيعاملوني، وعالاقل كان صاحب المحل ناوي يبيعك مش زيي كان نفسه يطردني من المحل!
    يسعد ايامك وهاي اخر مرة بتطولي علينا ما تعيديها!

    ردحذف
  13. مساءك سعيد ويسبر:
    والله شايفتلك انه هالمظاهر صارت هي شريان حياتنا، والله المصاري ما بتعمل بني آدم، يعني عدم المؤاخذة من جواته - معفن- ومعه فلوس في الواقع ما بسوى تعريفة، بس لانه المجتمع كله صاير هيك مظهرجي بيخلي ناس زي هيك تفكر حالها اشي.


    أهلا وسهلا lunar:
    شايف والله هاي اللي كان نفسي احكيه لكل واحد منهم ما بتعرفني ليش بتفترض عني؟
    اما صاحب المحل فالله لا يحط حدا مكانه بعد البهدلة اللي اكلها من اختي تلون وجهه بالوان الطيف السبعة. بس بتصور ما راح يعيدها مع حد مرة ثانية.

    وشكرا على كلماتك المشجعة.

    ردحذف
  14. كيف الحال هيثم؟
    عمرة مقبولة انشاء الله.
    ما تخاف علي انا مطولة بالي ومش كتير بهتم لافتراضات الناس بس ما راح انكر انها احيانا بتزعجني.
    الله يهدي كل الناس ونصير نتحمل ونحترم بعض اكثر.

    مساءك سعيد fazlakat:
    اللي بيضحك جد انه كل هالامور مجرد (أشياء) مادية -things- واحنا بنحترمها وبنقدرها وبنسعالها اكثر ما بنحترم الانسان وبنقدره!
    بس بستاهل اللي بيعيش عمره مديون علشان مجموعة أشياء هكلان هم الناس وكلامهم ومش هكلان هم حاله!

    ردحذف
  15. - شهقة طويلة - .. ليش انتي مش من عمان؟
    له له له .. راحت عليكي !!

    انا لو بصحلي اسكن باربد او عجلون ما بقصر .. بدك طبيعة حلوة وشجر ولا بدك غابات اسمنت؟؟

    نرجع للموضوع الاصلي .. انا من الناس اللي بيتعرضوا ع طول لفرض اوصاف علي قبل ما انعرف .. بس الحمدلله كلها بتكون منيحة .. والاغلب بمكانها ... الا مرات بفكروني عصبي زيادة !!

    وبالنسبة للدفاتر .. طيب انا كمان لما ادخل ع مكتبة بيعطيني اول اشي دفاتر ورد أو سيارات !!

    طولت بالحكي .. تحياتي

    ردحذف
  16. مرحبا احمد:
    بكير!! هسه عرفت اني مش من عمان!!
    بس عالعموم كله اله ميزات، صحيح اربد رائعة بخضرتها واشجارها بس ما فيها زي عمان حياة افضل من ناحية عملية ومهنية.
    كويس انه الناس بتفترض عنك الصفات المنيحة انا والله بفترضوا عني بالعادة صفات مش حلوة ممكن نكدة او جدية كثير وما بتضحك للرغيف السخن بس انا مش هيك والله!!
    يعني اذا شب سيارات واذا بنت ورد، هذا اسمه تمييز عنصري واضح!
    نهارك سعيد

    ردحذف
  17. الله يسلم عمرك :)
    شكرا إنك إستفأدتيني.. أنا كمان إشتقتلكم كتييير وإشتقت أتابع مدوناتك الحلوه,, هاي عم أحاول أتابع إلي فاتني وصراحه في كتير أشياء حلوه :)
    إن شاء الله ما عاد أطول عليكم :)

    ردحذف
  18. و الله حكيك أجا على الجرح

    المشكلة إنه هاي المشكلة تعم على غالبية الناس و ليست حكر علينا في الأردن مثلا

    دائما نفضل أن نصنف الناس و على أساسه تتم المعاملة مع الناس

    الصراحة مش عارفة كيف نسعى لحل هذه التركيبة الذهنية المريضة حتى لو أخذ منا الموضوع عشرات السنين

    تحياتي

    ردحذف
  19. أحيانا نفترض أمور بديهية للوهلة الأولى لنا .. والسبب في ذلك أننا لا ننظر للأشخاص بعمق بل بسطحية فالكل سواء عند من لا وقت له للتعمق في الآخرين!!!

    اصحى يا نايم ووحد الدايم

    أرجوا من المدونين الموقرين أن يضعوا شعار الحملة واسمها فقط فوقها

    (حملة الجسد الواحد)

    في الشريط الجانبي لمدوناتهم كدلالة على وحدة صف أمة محمد

    http://dndanh111.blogspot.com/2010/06/blog-post_14.html

    ومن أجل قيام الولايات المتحدة الإسلامية

    http://dndanh111.blogspot.com/2010/06/blog-post_17.html

    جعله الله في ميزان حسناتكم .. آمين

    ردحذف