02‏/09‏/2010

برنامج حواري

- ألو، مرحبا سوسو.

- أهلين، كيف حالك شو أخبارك؟

- اسكتي أخبار جديدة، مبارح إجاني عريس.

- والله! مبروك، شو هو وشو مواصفاته؟

- شو بيعرفني؟ رفضته عالتلفون.

- له، ليش؟

- ولا شي بس أكبر مني ب 18 سنة. لأ والمسخرة إنهم زعلوا لما حكتلهم إمي ما فيه نصيب لإنه أكبر منها، حكت أخته لإمي: شو يعني كبير؟ الزلمة ما بيعيبه عمره!
دخلك هاي أنا مش فاهمها - ما بيعيبه عمره - يعني اثنين بينهم عقود من الزمان كيف بدهم يتفاهمو وكيف بدهم يكون بينهم حوار؟

- ههههههههههههههههههههههه.
مرحبا حوار! هو أكيد راح يكون بينهم حوار بس أكيد هالحوار مش بالكلمات!

- هههههههههههههههههههههههه.
لوووووول! شو هالكلام الكبير! صايرة عميقة والله! ما عرفتك!

- ولسة إنت شو شفت؟ راح أفاجئك أكثر.
وبعدين ما تزعلي منها هاي - ما بيعيبه - راح تسمعي منها كثير أصلاً إحنا عنا منها سلسلة طويلة.

- زي شو؟

- يعني ما بيعيبه شكله وما بيعيبه كرشه وما بيعيبه صلعته وما بتعيبه الشهادة وإحنا بنشتري راجل.
تذكرت مثل كانت ستي تحكيه: (( جوزك رحمة ولو كان فحمة )).

- يا ساتر، لأ دخيلك يعني آخد واحد بشع وأصطبح وأتمسى بسعدان! حرام والله أنا بشر! والله نفسيتي بعدين بتتأذى!

- ههههههههههههههههههه. علشان هيك الواحد منهم بس يجي يخطب بيكون مفكر حاله - خارق للعادة - وإذا ما عجبك فيه إشي ورفضتيه ياويلك! بتطلعي إنت الغلطانة وشايفة حالك وشروطك كثيرة.

- آه وبالمقابل هو شاطر يتشرّط، بدي شكلها هيك وعمرها هيك وتعليمها هيك وأهلها هيك...
بس أنا كنت بدي أفهم، شو الإشي اللي بيعيب الزلمة؟

- أعوذ بالله! شو بتحكي إنت؟ ولك استغفري ربك! الزلمة ما بيعيبه إشي.

- ههههههههههههههههه. استغفر الله العظيم من كل ذنب عظيم.
بس بتعرفي إم السوس، هاي أنا وإنت تفكيرنا عميق وبنطلع بنظريات مهمة، خرج أنا وإنت نعمللنا برنامج حواري.

- يا لهوي إنجنّت البنت!

- ولك ليش؟ بنعمل إشي زي كلام نواعم أو أوبرا أو زي هاد البرنامج الأمريكي التاني اللي كلام نواعم سارقين فكرته، شو اسمه؟

- The View

- أيوه هاد، يعني دخيلك هدول بيحكو كلام أحسن من اللي بنحكيه؟ والله أنا وإنت بنفهم أكثر منهم.

- حبيبتي الفكرة فاشلة من أولها، لإنا علشان ننجح بدنا حدا يحضرنا، الرجال ما بتشوف هيك برامج وعلطول راح يحكولك هبل وحكي نسوان. وحتى الستّات نصهم ما بيحضروه واللي بيحضروه بس ليتسلوا وما بيطلعو منه بفايدة.

-  بس عنّا إحنا العرب، والله البرامج الحواريّة برّة الناس بتحضرها وتتفاعل معها وبتتأثر.

-  هدول حبيبتي ناس بتحترم المرأة وبتشوفها عندها عقل وصاحبة منطق، أما احنا فنادراً ما حدا يحترمنا وغالباً ما بنفهم! وإن أعطيت رأيك بيحكولك أسكتي، صحيح " ناقصات عقل ودين "!
ولك بس يبطلوا ينادو علينا بالألفاظ السوقية  (يا مرا ويا نسوان)، وبدناش برامج حوارية.

- إلا صحيح يا إم السوس، إحنا ناقصات عقل ودين؟

- هالحديث صحيح، بس النبي برّر إنه نقصان العقل هو نقصان في الذاكرة علشان هيك شهادة الرجل بامرأتين ولما تنسى وحدة بتذكرها الثانية، ونقصان الدين بسبب الأيام اللي بتفوتنا فيها الصلاة من كل شهر، ونقطة عالسطر.

- شو قصدك نقطة عالسطر؟

- يعني هاي الأسباب وهاي النتيجة هيك النبي بينها، وما بطلع لحدا ياخذها أبعد من هيك ويحملها فوق طاقتها ويأوّل علينا، وبعدين نطلع غبيّات وفاسقات!
وبعدين أصل الحديث (( ما رأيت من ناقصات عقل ودين أذهب للبّ الرجل الحازم من إحداكن ))
يعني فوق النقص اللي عنّا ولسّه قادرين عليهم! بس عاد هم بيتذكروا النص الأول من السطر وبينسوا النص التاني!

- لك شو هاااااااااد؟ كلامك كبير والله!

- إنت التانية، هدول كلمتين سمعتهم بالتلفزيون.

- بس والله نبرة صوتك هيك فيها قوّة إقناع!

- لعيونك! من بكرة بروح أدوّر على أول بيت أجر بالحارة وبألقي فيه موعظة، مش هيك إحنا صرنا أي حدا حفظله كلمتين من هالتلفزيون بيجي بتفلسف فيهن على سمانا؟

- طيب نرجع لموضوعنا، وبلالك دروس الدين وخلّينا نستغل طريقتك في الإقناع في برنامجنا الحواري.

- لسّه بتحكيلي برامج حواريّة. إنتي شو وجعك على هالمسا؟

- مش عارفة، هيك جاي على بالي أعمل إشي هادف وأعمل تغيير في المجتمع.

-ههههههههههههههههه. مش لما يكون المجتمع تبعك بيعترف إنه عنده مشكلة علشان تغيريه، ولا حتى بده يتغير أصلاً ؟
يا عزيزتي، علّمتني الحياة...

- استني استني. شو هاي - علّمتني الحياة - ؟ صايرة طارق سويدان؟

- مش حكيتلك راح أفاجئك!
علّمتني الحياة ... كنت أظنّ ...
...لأ لأ، استني مش زابطة مش عارفة أصيغها.

أيوه أيوه... هيها زبطت:
            كنتُ أظنُّ أنَّ الناس تتغيّرُ           لكنْ، علّمتني الحياةُ أنَّ الناسَ لا تتغيّرُ 

- هههههههههههههههههههههههههه.
لووووووول، حسيتك من شعراء المعلقات! والله يا صاحبتي حكيمة!
طيب ودخلك هدول اللّي ( لا يتغيّرُ ) شو بدنا نعمل فيهم؟

- بسيطة، بنرمي عليهم  قنبلة نووية بننسفهم عن وجه الأرض، وبنجيب بدالهم ناس جدد، مش تحكيلي برامج حوارية.

-  وجهة نظر!
وله! الله لا يعطيك العافية! من متى إلك بتحكي خلّص رصيدي!

- وله مش إنت اللّي اتصلت بدك تحكيلي عن عريسك - الخارق للعادة - وبعدين شوفي لوين وصلتيني؟

- خلص سلام هسه، وبكرة بشتري بطاقة وبنرجع نستأنف الحوار، ومن هون لبكرة بكون فكرت شو بدي أسمّي برنامجنا الحواري.

- شوفو الهبلة! صدقت حالها صار عندها برنامج وبدها تسمّيه كمان! سلام .    

  

هناك 28 تعليقًا:

  1. ياه ياه,, شغلوني معكم معده للبرنامج
    بنفع اخربط واكتبلكم رؤوس اقلام ت تشعبرو عن مشاعيركم

    و أولها بديش راتب محرز,, بقبل بنسبه :)

    ردحذف
  2. زكرتيني بحواراتي انا و بنات خالتي :)
    هيك دايما الا ما نطلع بفكرتين تلاته

    و انا كمان بدي اكون معكم ...و مجانا كمان :)
    **علشان اضمن التعيين قبل ام عمر :)

    ردحذف
  3. ويسبر,, كيييف حالك إنتي يا إم " يحظه"
    إختصري اه,, مفيش تعين إلا من خلالي :K:

    ردحذف
  4. ام عمر و ويسبر:
    ولا حدا يزعل انتو الثنتين راح اشغلكم معي، ام عمر متل ما بدها بالاعداد وانا و ويسبر بنقدم البرنامج وهيك الكل بيرضى:)

    ردحذف
  5. اصحى يا نايم ووحد الدايم

    أرجوا من المدونين الموقرين أن يضعوا شعار الحملة واسمها فقط فوقها

    (حملة الجسد الواحد)

    في الشريط الجانبي لمدوناتهم كدلالة على وحدة صف أمة محمد

    http://dndanh111.blogspot.com/2010/06/blog-post_14.html

    ومن أجل قيام الولايات المتحدة الإسلامية

    http://dndanh111.blogspot.com/2010/06/blog-post_17.html

    جعله الله في ميزان حسناتكم .. آمين

    ردحذف
  6. كيالة / أم عمر .. أنا معي مصاري "وسط" إذا بدكم منتج فأنا حااااااااااااضر

    و بالنسبة لخالتو ويسبر ... فكونا منها
    بتحكي كثير و حتخرب الب"و"رنامج من أولها!

    اتفقنا؟ اتفقنا.

    أنا عندي أمل كبير بهالبرنامج و حنملين من وراه.

    -----

    ويسبر... فكوكي من هدول التنتين

    بنسرق الفكرة و بنعملها لحالنا....

    اتفقنا؟ اتفقنا.

    أنا عندي أمل كبير بهالبرنامج و حنملين من وراه.

    ردحذف
  7. هيثم بالله تحدّد موقفك!
    يعني إنت معي ولا ضدي؟
    عالعموم ما راح ينجح برنامجك بدوني لإنه البرنامج بده مقدمة شاطرة بالحكي ومفلسفة وبكل هالمدونات شفت حدا فلسفجي ومتفزلك زيي؟
    عالعموم انا مستغنية عنكم كلكم وراح اوظف معي رولا عرفات واخليها شريكتي بالتقديم، فبما انه الناس دايما مفكريتها سائحة فراح يفكروا بالبرنامج انا استعنا بخبرات اجنبية وهيك فرصة نجاحنا راح تزيد...

    ردحذف
  8. اصلاطن بطلت العب معكم كلياتكم :(

    هيك الواحد اللي بقدم خدمات مجانيه وبكون متعاون بصير فيه

    بس اذا بتجيبي رولا.. فأنا موافقه :))
    قرابتي حبيبتي بقنعها تستضيفوني وبنحكي عن الشريرين اللي اول حرف من اسمهم ' هيثم'

    ردحذف
  9. وينك يا كياله؟؟؟ الحمدلله عالسلامه
    بس ما بيصير هيك ...اول ما ترجعي تبلشي بالمشاكل ... انا بقول بما انه البرنامج على نمط ال
    view
    يعني بدو اربع مقدمات ...انا رابعتكم ....مشاااااان الله
    انتي المحاوره الرئيسيه
    وام عمر بتعمل المداخلات والاعتراضات لانها مشكلجيه
    ويسبر ...تقارير ميدانيه
    وانا ؟؟؟ بتصحوني لما يخلص التصوير:(((( المهم اطلع معكم عالشاشه

    بس عن جد وينك؟ غطيتي كتير و افتقدتك

    ردحذف
  10. هههههههههههههههههههههههههههههههه المشكله إني قرأت الإدراج الساعه 5 الفجر بالعافيه مسكت حالي ت ما أضحك بصوت عالي,, كتير كتير عجبني هالإدراج وأنا بحب شارك معاكم بالبرنامج عشان أنا زيما بتعرفو بحكي كتير :)
    و "لوجو" البرنامج كمان سيبوه علي :)

    ردحذف
  11. بهمنيش مين اون ومين أأأوت
    اللي بهمني متى الراتب بنزل
    ويسبر تكون خارج الكاست تاعنا
    نيسان منخليها سوبرفايزر ع الكومنتس بتاع الفيس بووك ( انا بورجيكي,, طلعت انا المشكلجيه بيناتكو,, )

    اي اقتراحات تانيا انا حاضره
    المهم متى الدفع وكم وكيف وع اي حساب

    ردحذف
  12. ويسبر:
    خلص ما تزعلي اصلاطن انا مش عارفة كيف خليت الشيطان يفسد بينا، مع انه برمضان ما فيه شياطين!!
    خلص زي ما حكت نيسان بنشترك كلنا بالتقديم انا وانت ورولا ونيسان وبنفس التقسيم اللي عملته نيسان.


    نيسان:
    كيف حالك وتشتافلك العافية انشاءالله، والله رمضان مشاغل وزيارات وعزايم واهل الخليخ ذبحونا ما راح يسافروا غير بعد العيد، بس انشاء الله بنرجع بنشاط بعد ما تخف ازمة رمضان واهلا وسهلا معك ببرنامجنا الحواري:)


    رولا:
    والله شكلنا اخترنا احسن ناس لهالبرنامج لانه ما شاء الله كل اللي راح يقدموا بيحكو كتير، وخلص بما انك اتبرعت بالتصميم خير وبركة:)
    بس المهم هسه بدنا تمويل مادي.


    ام عمر:
    والله ما بعرف كيف بدنا ندفع رواتب، انا و ويسبر مفلسين - موظفات حكومة- لكن اذا بتعرفيلك وحدة من المدونات جيبها عمران اعزميها عالبرنامج وغير هيك راح نشتغل عمل خيري:)

    ردحذف
  13. مع إنو برمضان ما فيه شياطين!
    ماااااشي ماشي
    وصلت الرسالة

    شكرا ً جزيلا ً

    أصلا ً كل القصة تبعة التعليق اللي كتبته كانت test
    و يا للهول من نتائج ال test

    *where is that unfollow button! 2ahaaa , got it
    3 blogs gone awAAAAAAAy

    ** ما أقواكو يالنسوان <=== this is NOT a test
    lol

    ردحذف
  14. هيثم:
    انت قرأت الادراج منيح؟
    قرأت الفقرة:

    وبعدين أصل الحديث (( ما رأيت من ناقصات عقل ودين أذهب للبّ الرجل الحازم من إحداكن ))
    يعني فوق النقص اللي عنّا ولسّه قادرين عليهم! بس عاد هم بيتذكروا النص الأول من السطر وبينسوا النص التاني!


    هسه اكتشفت انا قوايا!!

    ردحذف
  15. تصحيح!

    مو قوايا ...
    إنتو شريراااااااااااااااااااااااااات

    بامتياااااااااااااااااااااز

    *يفلسع هاربا ً...و يختفي*

    ردحذف
  16. يا هيثم يا هيثم...

    مبدئيا المسبّه ما وصلتنا بما انه ما في " نسوان" هون :)

    تانيا ..حاسّة حالي بتاني "ب" حكينا عنك شرير...بتحكي عنّا شريرات!!!
    ول ما في ابداع كلّه تقليد :)

    ثالثا...درس مجاني و اتعلّمه...هلأ اي نعم السمعه اللي طالعه انو البنات بالعاده ما بتفقو و بكرهو بعض ومن هالحكي هو في منو....لكن لما الموضوع يدخل فيه شب يا حراااااااام.. بنصير يد وحده على طول - ما عدا ام عمر مش واثقة 100% انها ممكن ما تتفق علينا :$ 

    ردحذف
  17. ويسبر,, انا نسوان :ag:


    وشريره كمان :ag:

    ومو واثقه فيني كمان :ag:

    ماشي,, ماشي,, بشوفك ل يوم,, وبفهمك غلطك حبه حبه :k:

    ردحذف
  18. أهم اشي إنه الشاب ما بعيب اشي.. بعرف واحد عمرو 58 سنه، بدور ع عروس بس ما تكون فوق ال-25.. كان جوابي إله "أعمص ومجعمص" ع رأي ستي الله يرحمها..

    أنا ما بتابع تلفزيون أبداً، بس راح أحضر البرنامج تبعك.. بس بشرط واحد:

    ma yenlaweG lsankoo o tseero ti7kou lebnani :)

    ردحذف
  19. و هي أول مرحلة من خطة الانتقام نجحت! أم عمر قلبت عليهم

    next victim plz

    :p



    *طبعا ً كيالة بلشت تندم! بدها تفتحلنا غرفة دردشة مشان نحل عنها
    لوول

    ردحذف
  20. ويسبر وهيثم ونيسان وام عمر:
    اصلا انا ما بدي برنامج حواري ورأيي من رأي (ام السوس ) اللي في البوست البرنامج راح يفشل!
    اي احنا اتطابشنا وراح نخسر بعض ولسه ما قررنا مين طاقم البرنامج؟؟
    خلص انسوا الفكرة انا اصلا شو خلاني اكتب هالبوست؟

    ردحذف
  21. ليش ندمتي كياله؟؟؟بالعكس هذا اول الغيث والحوار بدأ قبل ما نبدا بالبرنامج...وعجبني اقتراح هيثم ...يا ريت تفتحي لنا غرفة دردشه وحددي لنا موعد اسبوعي للنقاش واعتبريها بروفه تمهيديه للبرنامج

    مساءك فل يا بطه

    ردحذف
  22. اول شي خطر ببالي انو هالحوار شو راقي وصعب يصير مع أي حدا :)

    تعالو إذاعة عالنت النا وجعل لا حد حوش :)

    ردحذف
  23. نيسان:
    انا ما ندمت بس خفت اكون تسببت بزعلة بين المدونيين. عالعموم اذا مستعدين نكمل الحوار - وناخذ الأمور بروح رياضية - وتوعدوا ما حدا يزعل خلص كل المدونة وصفحة التعليق على حسابكم وغرفة الدردشة امرها سهل اذا نويتو على طول بتنعمل:)

    مياسي:
    اهلا وسهلا فيك، أكيد الحوار راح يكون راقي بينا لأنه المدونين في الأردن كلهم فهمانين وراقيين، وزي ما حكيتي النت النا ومجاني وخلص خذو راحتكم واتحاورو زي ما بدكم:)

    ردحذف
  24. انا قصدي حوار اللي في التدوينه
    مش هون على التعليقات:)

    ردحذف
  25. آاااه... أنا فكرت قصدك عن الحرب اللي بدت بين هيثم البنات:)

    عالعموم انت أول وحدة أعطت رأي بالبوست بحد ذاته وكلهم كان همهم يشاركو بالبرنامج!!!

    شكرا عالتعليق والله احنا البنات تفكيرنا راقي بس ما حدا فاهمنا!!!

    يسعد مساك يا أحلى قرابة:)

    ردحذف
  26. أوف أوف هادا صاير كتير تطورات.. كلو منك يا هيثم دايماً بتدخل حالك بقصص البنات.. وشوف شو سويت.. مشكلجي إنت حتى على التويتر :)
    بس فشر إلي يفرق بينا احنا بنات أمامير ودايماً حنضل متفقين إن شاء الله
    انسه كياله أنا عجبني البوست وكمان فكرة البرنامج وأنا لسة معك بأي قرار :)

    ردحذف