15‏/06‏/2010

ما هي قمّة الكيل بمكيالين؟

أتدرون ما هي قمّة الكيل بمكيالين؟

إني أكون موظفة حكومية لمدة 6 سنوات وراتبي البائس ما بيزيد غير دينارين كل سنة تحت بند "الزيادة السنوية". أنا ما بنكر أبدا إنه هدول الدينارين بيعطوني أمل كبير بالحياة، وأحلى شهر في السنة كلها هو شهر كانون الثاني - بداية العام - واللي بتنزل فيه هاي الزيادة، والله بعمل الهوايل فيهن. فمثلاً، بعد ما استلم راتبي من البنك برجع عالبيت بتكسي بدل ما أركب بالباص!.   

القصة بدت بشهر كانون الأول الماضي 12/2009م، كان راتبي بالزبط 281 دينار و 72.5 قرش، ولما إجا موعد الراتب الجديد في شهر كانون الثاني 1/2010م، انطلقت للبنك الواقع في وسط البلد، وكنت بيّتت النية بإني أخلي هاد الشهر إحتفالي. برجع عالبيت بالباص هاي المرة، بس بشتري بالزيادة السنوية وجبة شاورما عربي للإحتفال.
وقفت قدام ال (ATM) وأنا بتوقع يظهر لي عالشاشة 283 دينار وشوية فراطة، بس اللي ظهر خالف كل التوقعات. فتّحت عيوني وبحلقت، وشهقت شهقة عالية عالية، وتسارعت دقات قلبي، وصرت أرجف، أصابعي بترجف وكل جسمي بيرجف، وللحظة حسيت راح يغمى علي، لأنه الرقم اللي طلع عالشاشة كان 287 دينار و 34.2 قرش، يعني الزيادة على راتبي ما طلعت دينارين، طلعت 5 دنانير و61.7 قرش بحالهن.
ما صدقت عيوني! أكيد مخربطين معي، بس والله أحلى خربطة، وبعدين شو شاورما عربي يللا ع البيتزا هت!!

طبعا، ظليت مصدومة يومين ومش عارفة أحكي لحد، خفت إن حكيت يحسدوني أو يفسدو عني للحكومة فترجع الحكومة تاخد ال 3 دنانير فرقية.
بس وأنا بالشغل سمعت طراطيش كلام، إنه كل الناس زايدة رواتبها عن المتوقع هالشهر، طبعاً أنا أنكرت إني بعرف شي عن الموضوع، وسألتهم: خير يا جماعة شو صاير؟
حكولي: شو ما دريتي، مش الحكومة ألغت ضريبة الدخل. أتاري هدول ال 3 دنانير يا جماعة بدل ضريبة الدخل كانت "تقتطع" من رواتبنا كل شهر، يعني لا خربطة ولا شي. بس والله فرحة ما بعدها فرحة. - لو سمحتو ما حدا يسألني شو ضريبة الدخل لإني ما بعرف، فعلى الرغم من كل المعرفة التي تدّعيها الآنسة كيّالة، أمام المسميات الضريبية تنهار كل المعارف -.

بعد هادا كله بتيجي أختي الصغيرة ( الفصعونة ) اللي اتخرجت مبارح، وما الها غير سنة وحدة بس بتشتغل بشركة اتصالات خاصة بعمّان وبتحكيلي: " باركيلي، مبارح في الشركة أقرّوا الزيادة السنوية، وراح يطلع لي 150 دينار زيادة على راتبي الشهر الجاي ومش بس هكيك، المدير مبسوط مني كتير ووعدني إنه يرفع لي نسبة الأرباح اللي باخدها على كل مشروع بشارك فيه". 
يا جماعة أنا زي اللي انخبطت 17 كف على بوزي و 17 طيّارة على رقبتي.
طيب ليش ليش ليش، آه ليش، ليش تاخد كل هاي الزيادة ليش؟؟؟ شو عندها وما عندي؟ مش النا نفس الأم والأب، وبناكل على نفس الطاولة وبتنام معي بنفس الغرفة؟؟ ما بيكفي انها أول ما اتخرجت اشتغلت براتب 450 دينار وهسه مع الزيادة راح توصل 600 دينار، صحيح ما فيه عدالة.

ما تفكروا إني حاقدة أو غيرانة لا سمح الله، أبدا أبدا، بس والله إشي بسطح!!!
أنا كل سنة بس ينزل الراتب الجديد بنزل حسابات بالقرش والتعريفة، صرت أفكر كم سنة بدي علشان يوصل راتبي ل 300 دينار، لقيت إني بدي كمان 6 سنين زي اللي قطعتهم، وهالفصعونة حصّلت ضعف أحلامي بسنة وحدة بس!!!

تاني يوم رحت لأقدم موظفة عنا في الغرفة وسألتها:
- " أم علي، كم سنة معك خبرة؟ "
- " 31 سنة "
- " طيب، وكم راتبك؟ " 
- " 550 دينار، بس بعد ما أتقاعد راح  يرجع راتبي لل 350 دينار، لإنه فيه كثير علاوات و زيادات على رواتبنا بتروح كلها بعد التقاعد. "
؟!؟!؟!؟!؟!؟!؟!؟!؟!؟!؟!؟!؟
هاي المرة انخبطت 6849321 مليون كف على بوزي. يعني حتى بعد أكثر من 30 سنة ما بحصّل نص اللي بيحصله ابن الشركات.

وبعد هيك بتكتب الجرايد " هل نحنُ شعبٌ عنيف؟ ". أصلاً من هنا تبدأ الجريمة !!

بس فعلا، الناس مقامات، في ناس بتظلها عايشة بالقاع وناس بترتفع بالعلالي بسرعة، هيك ربنا كاتبلهم. صرت أتخيل حالي بعد 10 سنين وأنا لسّه بعدّ القروش قبل ما أطلع بالباص، أو يمكن أكون قدرت اشتري سيارة كِيا معفنة موديل 1981م، وأختي راكبة كابريس أو جيمس وكالة.

بس ما تظنوا فيّ السوء، بتظلها أختي وبحبها، أصلاً هي رفيقة دربي لسنوات، فبعد ما تزوجوا خواتي الكبار وطلعوا من البيت، ظليت أنا وهي فترة طويلة سوا، وبنتشارك بكثير من الذكريات الحلوة.
وبعدين ما تخافوا على كيّالة، راح أعرف أستغل هاد الفرق الطبقي كتير منيح، راح أستلف من أختي في كل مناسبة وكل ما احتجت وماراح أرجعلها بحجة الفقر والعوز، ( مش هيك كل الأخوة بعملوا، بياخدوا وبيغطرشوا) وأنا عارفة إنه قلبها طيّب وراح تحزن عليّ وتسامحني.

بس يا جماعة، والشيء بالشيء يذكر، فيه سؤال محيرني من زمان. من سنتين سمعت محمد الوكيل بيحكي في برنامجه (( بصراحة مع الوكيل )) إنه وزارة التنمية الاجتماعية حدّدت خط الفقر للأسرة الأردنية ب 500 دينار شهرياً، طيّب أنا بالراتب اللي باخده شو بيكون تصنيفي؟ أنا حاولت أفكر بتسمية توصفني وما عرفت، يا ترى حدا فيكم بيعرف؟؟؟

هناك 20 تعليقًا:

  1. صباح الخير آنسه كياله

    رواتب القطاع الحكومي لن تتغير أبدا وميزة الوظيفة الحكومية في هذه الأيام مع الأحداث الاقتصادية التي تعصف بنا تتمثل فقط في الأمان والاستقرار الوظيفي بصرف النظر عما سمعناه في الآونة الأخيرة من حالات الفصل التعسفي التي حصلت لبعض العاملين ضمن فئة المياومة .

    أما القطاع الخاص فمن المعروف دائما أن رواتبه هي الأعلى والأفضل ولكن تبقى المشكلة الوحيدة حاليا في عدم الاستقرار الوظيفي الذي بدأ يلوح في الأفق ضمن العديد من الشركات المساهمة العامة .

    ولذلك أعتقد أنك لا تزالين في بداية الطريق وتستطيعين تحديد أهدافك ومستقبلك وفقا للمعطيات المطروحه فوظيفة الحكومة لا تسمن ولاتغني من جوع وعلى الرغم من أنك لم تذكري في الادراج طبيعة شهادتك ولكن إذا كنت معلمة على سبيل المثال فلماذا لا تبحثين عن فرصة عمل في مدارس القطاع الخاص .

    أنا من أشد المناصرين لموضوع الخصخصة ودائما كان لدي قناعة منذ كنت طالبا جامعيا أنني من المستحيل أن أعمل في القطاع الحكومي لأحصل في نهاية الشهر على راتب لن يصل في نهاية خدمتي إلى 500 دينار في أحسن الأحوال ولذلك لا تحرقي أيام عمرك أكثر في وظيفة الحكومة فلن يتغير شيء أبدا .

    وتمنياتي لك بكل التوفيق

    ردحذف
  2. صباح الخير انسة كيالة
    عندي سؤال
    أختك قرأت المقال؟
    مش معقول شو نقيتي عليها، بعدين بالنهاية كل المصاري راح (تهفيهم) انتي _ انتي اللي حكيتي هيك بالإدراج مش انا_، بمزح معك كيد :)
    ما في مقارنة بين الوظيفة الحكومية والوظيفة في الشركات الخاصة، بس هيك الدنيا كيالة نصيب، ناس باالحكومة وناس بخاصة
    بتمنالك من كل قلبي عقد على الخليج ب 50 الف درهم شهري
    منيح ولا بدك أكتر؟

    ردحذف
  3. آنسة كياله

    أكيد راتب القطاع الحكومي كتير قليل بس إذا بالمقابل دوام قصير, يعني بتروحي والشمس بالسما في أيام الشتا مش بتطلعي من الصبح بدري وبترجعي آخر النهار, وما بتقدري تعملي اشي بحياتك!!! حتى لو قعدتي هيك بالبيت.
    ٍS

    ردحذف
  4. سبحاااااااان الله....والله ناوية اكتب بوست عن الزيادة السنويه لرواتب الحكومه...لانه الكل بنصدم بس احكيله, حتى بابا كل سنة بسألني بحكيله 3 دنانير - بما اني درجه خامسة ال يعني - بنصدم المسكين :(

    الله يعينا شو بدنا نحكي...اخوي اللي تخرج جديد بشتغل بالبنك العربي و راتبه تقريبا ضعف راتبي و انا رئيسة قسم والي 9 سنين بشتغل

    الله يخليلنا الحوافز...كان ما عشنا :(

    ردحذف
  5. صباح الخير كياله
    معك حق ...شي بيقهر...الفرق بالرواتب بين القطاع العام والخاص شي خيالي ...مرات بشعر انه هيك سياسة الحكومه قصدا عشان تخفف الطلب على الوظائف الحكوميه...وتطفش الموظفين...المشكله انه حتى في الحكومه ما بين وزاره ووزاره في تفاوت كبير بالرواتب بسبب المخصصات والحوافز الاضافيه اللي بتتميز فيها بعض الوزارات متل الماليه والتخطيط
    يعني في الحكومه كمان في خيار وفقوس
    نفس المسمى الوظيفي في الحالتين ونفس الدرجه بتلاقي فرق بينهم اكتر من مائتين دينار...حتى فرق بالدورات والامتيازات....نصيحتي....ابحثي عن فرصه احسن واذا لقيتي وظيفه احسن...بتقدري تاخدي اجازه بدون راتب
    حتى تتأكدي انك ثابته بالوظيفه الجديده....في كتير بيعملوا هيك.
    الله يوفقك دايما يا عزيزتي.

    ردحذف
  6. أي هو إحنا من قليل متغربين!
    الفلوس مو كل إشي ، اتفقنا بس ... هاي البس اللي ما إلها حل -قريب-

    * بلاش أختك تقرأ البوست صحيح :]

    ردحذف
  7. مساء الخير أشرف:

    أوافقك الرأي أن الوظيفة الحكومية لا تسمن ولا تغني من جوع، وأنا لا أشجع احدا ان يختارها خاصة وان كان رجلا ورب اسرة.

    لكن ولنكون عادلين هي في كثير من الاحيان الحل الاوحد والامثل للكثير.
    عليك ان تعيش خارج العاصمة لتدرك الامر اكثر، لا يوجد شركات خاصة وبرواتب مغرية في اي محافظة اخرى غير عمان. فانا اسكن في محافظة اربد ثاني اكبر محافظة بعد عمان، وعلى الرغم من ذلك لا توجد فروع لشركات خاصة كبيرة، وان وجدت بعض المصالح الخاصة فرواتبها رديئة ولا توازي راتب الحكومة في الغالب، والوضع اسوأ في باقي المحافظات.

    لذلك فمن يبحث عن فرصة جادة عليه الذهاب للعاصمة وهذا قد يكون شاقا للبعض لبعد المسافة- وغير مجدي ماديا ايضا.

    اريد ان اعلق ايضا على ما ذكرته عن المدارس الخاصة، الوضع مقلوب تماما في محافظتي، فالرواتب الحكومية للمعلمات افضل الف مرة من رواتب المدارس الخاصة، وافضل راتب سمعته لمدرسة خاصة للبنات عنا كان 150 دينار.
    لي صديقة تعمل في مدرسة خاصة براتب 65 دينار فقط - والله اصدقك القول ولا ابالغ - وخبرتني انها وقعت عقد ب 180 دينار لكن صاحب المدرسة وضح ان هذا العقد فقط لتبرأة نفسه امام قوانين العمل والعمال، وعليها ان ترضى ب 65 دينا او تترك العمل. ووافقت مضطرة لانها تريد الخبرة ولم تجد فرصة افضل.

    ردحذف
  8. مساء الخير نادر:

    اكيد اختي قرأت المقال وقبل ما انشره كمان، وضحكت عليه كثير، والله اني نقيت عليها وزي ما شفت هددتها بجريمة كمان، بس هي بتعرف انه كله مزح.

    والله انا كمان بتمنى عقد كبير زي هيك بس صعب اسافر لانه ما بتهون علينا "الحجة"، ما ظللها غيرنا انا والفصعونة وين نروح ونتركها.

    ردحذف
  9. to s:

    لازم يكون الدوام قصير مع هيك رواتب. وابن الشركة الخاصة اللي بده راتب كبير لازم ينحرث ويداوم اكثر.

    ردحذف
  10. و الله يا سيتي في فرق كبيير ما بين القطاع العام و الخاص ، بس زي ما حكو اللي قبلي في كل قطاع و الو حسناتو و سيئاتو و احسن شي بالحكومة هي الاستقرار ، بس الكل بعرف كيف شغل القطاع الحكومي مقارنة بالخاص ، يعني الموظف الحكومي بدو مين يوقف فوق راسو عشان يشتغل او على الاقل انو يحلل راتبو؟! بس بالخاص بتلاقيه بشتغل اعذريني على هالكلمة و رجلو فوق راسو!

    الدنيا مش مضمونه ، ما بتعرفي يمكن بيوم و ليلة يصحلك فرصة عمل احسن من اختك بالف مرة

    ردحذف
  11. نيسان مسا لخير:

    والله كلامك مزبوط حتى الحكومة فيها خيار وفقوس من وزارة لوزارة، خاصة الوزارات اللي بتعطي علاوة بدل طبيعة عمل او فيها سفرات ودورات بالخارج، قارني اثنين بنفس الشهادة بس واحد في وزارة الصحة والثاني في وزارة التعليم وشوفي الفرق.

    انا متنبهة لهالمسألة وشفت شغل مع شركة خاصة لفترة بس كان شغل اضافي بعد الضهر استمر الشغل سنتين بس وانتهى بانتهاء المشروع اللي اشتغلنا عليه.
    وطبعا ضليت بدوامي بالحكومة لانه الشغل مؤقت.

    ان شا الله تيجيني فرصة احسن في المرات الجاية

    سلامي لك وبالتوفيق.

    ردحذف
  12. اهلا هيثم:

    الله يرجعك بالسلامة وما تطول غربتك، بس ترجع عوظيفة محترمة أكيد.

    زي ما حكيت لنادر اختي قرأت المقال وضحكنا عليه لانه كله مزح، ما تخاف المسألة مش بالسوداوية اللي انا صورتها فيه شوية مبالغة، بس هي محاولة اني اوصل الفكرة بطريقة حلوة ومعبرة

    ردحذف
  13. اهلا ويسبر:

    انا هسه عرفت ليش حبيتك، انت شريكتي بالنضال في الدوائر الحكومية، طمنتيني والله انا زيادتي السنوية دينارين لاني درجة سادسة، بس اصير زيك درجة خامسة راح ترتفع ل 3 دنانير، نيالي.

    الله يخليلنا الزيادة السنوية والحوافز ، بعد ما الناس عرفت حالتنا وإنا بنفرح بالليرة لازم ماحدا عمره يتبطر عالنعمة.

    ردحذف
  14. والله شوفي
    هو أشرف لخصلك الموضوع وعمل المقارنه ما شالله عليه
    بس بتعرفي انا ما اشتغلت في قطاع حكومي بس تعرفي شو اكتشفت؟
    انو الاتنين عطب لانو السيستم فاشل

    بس الحكومه ميزتها انو صح راتب اقل بس في امان وظيفي ونوع من الحمايه الك

    الا صحيح ياختي شو هاي شركه اختك اللي بتزيد الواحد 150 نيره طقه وحده؟!!

    وانا متفقه معاكي انو اربد وضعها صعب
    للاسف كل الفرص المنيحه بعمان

    وهلأ يا مزمزيل معلش شرفينا
    الك واجب عنا :)

    ردحذف
  15. هذا اول مرور لي هنا بالصدفه. اسلوب البوست جميل جدا. بالنسبه لاربد كلامك صحيح ما فيها اي شركات كبيره زي العالم والناس. مع العلم انها فيها عدة جامعات. مش عارف ليش قاعدين بفتحوا جامعات اذا البلد بتعتبر اربد قريه واي مشروع ربحي لازم يكون في عمان.

    ردحذف
  16. مرحبا كيالة، هذه أول زيارة لي إلى مدونتك،
    بس حبيت أحكي إنه خط الفقر 500 دينار أردني سنوياً للفرد الواحد، ركزي على سنوياً... يعني انتي فوق خط الفقر بكتير. فالحمد لله على كل حال :)

    ردحذف
  17. صدمتيني

    وين النقابات
    انا مابعرف عن الوظايف التانية
    بس بعرف المهندس ممموع ياخد أقل من 400 دينار .. هاد وهو خريج فريش!!!

    طيب ليش ماتقدمي لشركة خاصة؟
    صار عندك خبرة منيحة 6 سنين

    تحياتي

    ردحذف
  18. ملش كياله اسمحيلي ارد على محمد

    كلام الـ 400 دينار كلام نظري
    وقت ما تيجي تشتغل حتلاقي انو في وظايف بتبلش من 200 ومن 250 كمهندس
    وانت مضطر تقبل كرمال الخبره وكرمال ما تقعد في الدار!
    دايما في شي بيمر من تحت الطاولة صدقني

    ردحذف
  19. @ مياسي

    عم تعقدوني من هلق

    بطلت أتخرج

    ردحذف
  20. هلا أحمد:
    أول شي أنا مش مهندسة، أنا درست برمجة كمبيوتر وما عندي نقابة تدافع عن حقوقي، تاني شي اللي حكته مياسي صحيح مية بالمية، مش بالضرورة تلتزم اي شركة بقانون النقابات وبيحكولك هاد الموجود عجبك ولا ما عجبك خاصة اذا كنت خريج جديد ومضطر لانه ما عندك خبرة.
    وممكن جدا الشركة تخليك توقع على عقد ب 400 دينار لحماية نفسها قانونيا بس تتفق معك انها ما راح تعطيك اكثر من 200 ولا 250 وهاد ا لموجود، وما الك تعترض لانك موقع عقد, وصدقني كثير ناس بوافق على هالشي لانها ما عندها خيارات كثير متوفرة ومحتاجة للمصاري.
    والله هالشي صار مع ناس أنا بعرفهم معرفة شخصية وما بمزح معك.

    ردحذف