30‏/09‏/2013

أعراض جانبية


القصة بدأت من 10 أشهر لمّا وجعتني إيدي لأول مرة..
الوجع كان مستمر وبيزيد مع أي مجهود، فقررت أزور الأخصائي، الأخصائي كان رأيه إنه التهاب أعصاب من كثر ما بكبـّس عالكمبيوتر.. المهم أعطاني إبرة بالعصب وأدوية، ودفعت بلاوي مصاري، وما حسيت بتحسن ملحوظ.. حاولت أرتاح واستخدم الإيد الثانية للكمبيوتر واتحملت الوجع لشهور، بس كنت اصحى من النوم بوجع، وساءت المسألة وصرت ما أقدر اتحكم بأي شيء أمسكه ويفلت من إيدي، فالمسألة صارت ما بينسكت عليها..

طيب رحنا على أخصائي ثاني مشهور والكل بينصح فيه.. 
حكالي التشخيص السابق مش دقيق.. إنت عندك انضغاط بفقرات الرقبة وبتضغط على العصب.. يعني بالعامية (ديسك).
طلب صورة أشعة، وثبت بالدليل الشرعي إنه عندي ديسك، وصفلي مجموعة أدوية وحكالي لازم تلبسي (القبّة) 24 ساعة، وطبعاً دفعت بلاوي مصاري.
والله بعد مرور شهر حسيت بتحسن بإيدي..
بس كمان صار عندي وجع بالمعدة!
بالأول ما اهتميت فكرته إشي بسيط تلبك ولا تسمّم، بس الوجع يوم عن يوم زاد، وصار يصحيني من النوم، فالمسألة صارت ما بينسكت عليها.. 

رحت على دكتوري لقيته مسافر، فرحت على دكتور ثالث ووصفتله الأعراض وأعطيته تقرير عن تاريخي المرضي..
حكالي إنتي عندك التهاب بالإثني عشر.. يعني بالعامية (قرحة)، وهاي من الأعراض الجانبية لأدوية الالتهاب اللي وصفها الدكتور، ارمي الدوا بالزبالة حالاً! وخدي هاد الدوا لتتعالجي من القرحة!

طيب ردّينا على الدكتور ورمينا الدوا وأخذنا الدوا الجديد، والحمدلله خلال أيام شعرت بتحسن..
بس بعد أسبوعين من أخذ الدوا بديت أحس بتعب وضيق بالنفس، كنت أحس كأنه ( روحي مفرفطة ) عارفين هاد الشعور!
كمان ما أعطيت الموضوع أهمية في البداية افترضت إنه من الشوب وتعب الشغل..
بس اليوم وأنا قاعدة على مكتبي وما ببذل أي مجهود والجو حلو صابتني حالة اختناق وما عدت قادرة اتنفس، بدي أوكسجين، وحسيت زي النار في صدري، وأول إشي خطرلي جلطة! راح أموت بجلطة!

أخدت مغادرة من الشغل واتصلت بأختي لتاخدني عالمستشفى بسرعة، والله إجت بسرعة البرق، وأنا بدا نفسي يرجع شوي شوي، حكتلي أختي خايفة ما يستقبلونا حالة طارئة بالمستشفى لأنه شكلك مش موّاته يعني، واذا بدنا ننتظرالعيادات بدنا للساعة 3 العصر وطابور والله يعلم متى نشوف الأخصائي..
أنا انهبلت.. بحكيلك أنا عندي جلطة..
حكتلي أضمن وأسرع حل نشوف أخصائي باطني، وبسرعة رحنا عالعيادة والحمدلله كانت فاضية، دخلنا على طول وفحصلي الدكتور القلب والرئتين والكلى والضغط، وطبعا حكيتله تاريخي المرضي حتى اللحظة وأسماء الأدوية..
الدكتور حكالي الضغط طبيعي، أصوات القلب والرئتين سليمة، ما في مشكلة!
بس الدوا اللي بتاخديه إله أعراض جانبية منها تهيّج الجهاز الهضمي واللي ممكن عملك حالة الإختناق، فمن رأيي توقفي الدوا حالاً وارميه بالزبالة! وخدي هاد الدوا هاد مثبّط ومهدّئ للجهاز الهضمي، وإذا اتحسنتي الحمدلله، بس إذا ما اتحسنتي هاي مجموعة فحوصات للدم والغدة الدرقية وصورة أشعة بتعمليهم وبترجعي تراجعيني! وما تنسي تمتنعي نهائياً عن المنبهات: الشاي والقهوة والكولا والشوكولاته..

نعم يا خوي؟ ما أشرب قهوة؟
طبعاً مافي داعي أحكيلكم إني دفعت مصاري بلاوي..

اشتريت الدوا الجديد، وأول إشي عملته إني فتحت النشرة، النشرة بدون مبالغة طولها نص متر، والأعراض الجانبية:
جفاف، طفح جلدي، نسيان، توتر، عدوانية، هلوسة، اضطرابات سلوكية، صعوبة الرؤية، تسارع ضربات القلب، اضطرابات التبوّل.. ما هو أنا كان ناقصني!

حالياً أنا في مواجهة مع الدوا ومو مسترجية أبلع ولا حبة، وعم بفكر أرميه بالزبالة..

وبعدين أنا كيف وصلت لهون؟
أنا مش كانت إيدي اللي بتوجعني بالأصل؟

هناك 34 تعليقًا:

  1. اول شي الف سلامه يا قمر و ما تشوفي شر...اجر و عافية يا رب

    انا اسفه لكن انا حششت وخصوصا عالاعراض الجانبية لاخر دوا....هاد مرض مش دوا >_<
    انا بقول تنسبه تمام

    بالعادة ادوية العظام بتأثر عالمعده لهيك بوصفو التنين مع بعض , و مشكلة الاطباء هاي اللي لازم يلغو تشخيص و ادوية غيرهم من الاطباء دائما بنواجهها ...ما بعرفو يتعاونو و يكملو على بعض, لا بخلصو علينا

    سلامات مره تانية يا حلوه

    ردحذف
    الردود
    1. الله يسلمك وماتشوفي شر إن شاء الله :)
      كلامك صحيح إنه لازم ينوصفو الثنين سوا، هاد الكلام حكالي إياه الدكتور الثالث طبعا بطريقة إنه دكتورك المشهور حمار! بس إحنا الشعب الغلبان شو بيعرفنا؟
      الغريب إنه أنا مش من الأشخاص اللي بيعانو من الأعراض الجابية عادة وباخد دوا أشكال وألوان وعمري ما شكيت، لهيك عمري ما اهتميت أقرأ الأعراض الجانبية! بس نصيبي هالمرة..

      إضحكي متل ما بدك، أصلا كل البيت بيضحك علي من مبارح خاصة بعد الفيلم الهندي اللي عملتلهم إياه.. إلحقوني.. راح أموت..

      حذف
  2. احكيلك اشي :-D

    لأاسألك سؤال بالأول: انتي مواليد اي سنة؟

    أنا شخصياً عمري تلاتين سنة... وقبل ما أوصل التلاتين ولا كان اشي يأثر فيي...

    عمري ما حسيت بأعراض جانبية لدوا (اللهم الا النعاس)، اصلاً عمري ما تعبت لدرجة اني اضطر لدوا!! كنت دايماً اتفلسف وأحكي: "انا ما باخد أدوية"... عمرو ما كنت اتعب بسرعة... عمرها ما كانت الرياضة تعمللي "التهاب مفاصل" :-S والحمدلله حتى البرد، كان يااااادوووووووب يأثر فيي...

    هلأ... لازم اقرأ الاعراض الجانبية قبل ما اخد الدوا... واذا زدت الرياضة مرة وحدة من نص ساعة لأربعين دقيقية بقعد شهر اشكي من التهاب المفاصل... اقل برد بمرض... الرشح بيبدا معي بأول الشتا وما بيروح الا للربيع لما يصير وقت الحساسية!

    فاااا... العمر بيلعب دور عزيزتي :-) وعلينا ان نواجه الواقع المرير... رغم اننا نبدو كأسلافنا الا أننا يا اليخاندرو نهرم في الثلاثين :-D

    بس ما معاكي حق باللي حكيتيه عن الدكاترة... دكاترتنا "زي كل شعبنا" متعاونين مع بعض وبيهمهم مصلحة المريض وبيحترموا بعض ايما احترام

    اصلاً عادي... كلنا هيك!

    بحيرة البجع

    ردحذف
    الردود
    1. مرحبا أول شي خليني أرحب فيكي وبعودتك هون :)
      بالنسبة للعمر فأنا فوق الثلاثين.. يعني بطلع أكبر منك أكيد :)
      أكيد "لقد هرمنا" لإنه وين صارت الواحد بالثلاثين يجيه ديسك والتهاب مفاصل؟ بالعادة الناس بتبدا بعد الخمسين!

      بالنسبة لشعبنا.. أمّا هو احترام.. شعب كلّه فتّاي وكله بفهم الحمدلله!
      تحياتي

      حذف
  3. برضو انا ضحكت تفلست شو بدنا نعمل شر البلية ما يضحك!
    سلامات كيكي الف سلامه عليكِ حبيبتي .
    عندي قناعه انه 99.9%
    من الاطباء في بلادنا بتروحي عليهم بعلّة وحده بتطلعي بمية علّة .
    مره طبيب أطفال مشهور اخذت زينه عنده عشان التهاب بالحلق لقى عندها شوية تحسس بالقصبات الهوائيه و أعطاها من ضمن الادويه دوا للحساسيه وانا عادتي اي دوا جديد عليّ ومش خافض حراره أو مضاد حيوي لازم اقرأ نشرته بالتفصيل الممل ...المهم لقيت من أعراض الدواء الجانبيه حدوث قصور في النمو وتأثيره على هرمونات الغدد !!! الله لا يوفقه كان ضيعلنا مستقبل البنت :( طبعا دغري عالزباله مع اني دفعت حقه مصاري بلاوي ههههههههههه
    المصيبه انه الحساسيه راحت بالتبخيره و ما كان في داعي للدوا التقيل...طب ليش تغامر بأدويه خطيره حتى لو كان نسبة حدوث المضاعفات ولو نص بالمية ؟!
    الله يعيننا على الطب في بلادنا وعلى التعليم وعلى الشوارع وعلى السيارات و على الناس وشو بدنا نقول بس !
    على فكره أختك نهفه ... "شكلك مش مواته" ههههههههههههههه

    ردحذف
    الردود
    1. الله يسلمك ويعطيكي الصحة.. إضحكي لتشبعي :)

      عن جد الله لا يوفقه كان قضى على البنت!!
      حاليا بفكر أدور على هدول تبعين الطب البديل ما إلي غير هيك..
      ما هو لا دكتور الحكومة نافع، بتقعدي عشر شهور تيصحلك موعد، و إذا شافك بيعالجك بأسئلة مدتها خمس دقائق.. والدكتور الخاص شاطر يقص مصاري ويتفلسف وكان راح يموتني.. خطر لي اليوم إنه الاختناق صابني قد ما دفعت مصاري هاد الشهر.. ههههههههههههه
      إحنا ما إلنا غير نرمي حملنا على الله وبنصبر حالنا بهالكلام شو بدنا نعمل غير هيك!

      وعلى فكرة النهفات كثير بعيلتنا :))

      حذف
  4. أولا الف سلامه. نسأل الله عز وجل الشفاء العاجل لك.
    في امريكا الدواء بعد ما يتصنع بظل سنوات تحت التجريب قبل ما ال FDA يوافق عليه للاستهلاك البشري. لذلك الدواء في أمريكا فعال جدا ولاحظت انه افضل بكثير من عنا. بس هذا لا يعني خلو الأدويه هنا من الاعراض الجانبيه واللي عادة بس الوحد يقرأها بتررد اذا كان لازم ياخد الدوا او لأ.
    جميع ادوية ال depression هون مكتوب عليها ان الدوا ممكن يزيد الشعور بالانتحار. مع ان الانسان المصاب بهاد المرض المفروض انه بياخد الدوا عشان ما يحس حاله بده ينتحر.

    ردحذف
    الردود
    1. الله يسلمك يا رب.. أنا اليوم حاسة حالي صرت أحسن بفضل الله

      هي فعلا الاعراض الجانبية مرات بتخوف وبتخليك تتردد بس لإني فعلا ما عانيت من قبل فكنت واثقة بالدوا ومفعوله..
      ومسألة التناقض بين العلاج وآثاره غريبة زي آخر دوا وصفه الدكتور مفروض إنه مهدئ ومن آثاره تسارع نبضات القلب!

      تحياتي وشكرا لمرورك

      حذف
  5. salamat ya rab
    Wallah ishy b ma5wil!
    ---------
    about 2 weeks ago the dr prescribed for me a medicine , it was for my feet! they were killing me, apparently my neerves r semi-damaged and blood circulation is not efficient , diabetes symptoms, the medicine was for helping the nerves to run smoothly and numb the pain

    el muhim, from the first pill I felt dizzy and major headaches , which he said was common side-effect for that medicine, next day I went to see him and he took genuine interest in my case and asked me to stop taking it immediately, gave me another one with less possibilities for such side effects but told me that the dosage of the new pills are stronger in effect and to come to see him the next day if anything out of the ordinary occurs

    well, it did! hallucinations , I kept seeing people who r simply not there and hearing voices that did not exist! lool

    and this was from 1 pill only ..

    now this dr is not with a private clinic, still he took interest, mind u the 2 medications r free! they don`t charge for prescriptions , 99% of them, in Scotland

    Sorry to go into detail with my story but I guess what I`m trying to say is that I can relate! comparisonl'y relate
    that is

    imagine to go to a public health dr in one of the advanced Jordanian
    institutions
    with the same details!

    I bet he`ll say that I`m dalloo3 and should keep taking the medication, especially it was making effect on the original symptom

    yin3an tabban!
    :{{

    ---------

    salamat again
    ---------

    ur sis is a realist , lol

    ردحذف
    الردود
    1. سلام هيثم وألف لا بأس عليك وكان الله في عونك :)

      أنا عندي تأمين صحي حكومي ولكن ما بستخدمه أبدا إلا إذا مريضة وبدي إجازة لإنه بس إجازة الحكومة معتمدة وما فيه ثقة طبعا بالاجازة من دكتور خاص.
      ولما تضطر تزور دكتور الحكومة بيسألك سؤال شو مالك وغالبا ما بيفحصك وبيعاملك على إنك غبي ولا كأنك رحت على مدارس ولا معك شهادة جامعة ولا بيعبرك ولا بيشرحلك، وحيالله بيكتب الأدوية المعتادة: ألرفين, بندول, (m&ms) اللي هو المضاد الحيوي الحكومي. وإذا كنت بحاجة دوا فعلي روح اشتريه من بره ما فيه عنا.
      الانسان عنا غالي بالحكي وحياته ولا أهون منها، وعندهم غالي قولا وفعلا.. هاد اللي بيجلط و يلعن تبا :(

      تحياتي

      حذف
    2. M&Ms

      hahaaa

      guaranteed 4 all illnesses

      حذف
    3. هو أكيد (قارانتيد) لإنه بعملش إشي.. إبلع واستمتع :)

      حذف
  6. عجبتني "ويلعن تبا" :)

    ردحذف
    الردود
    1. مالك هاي من المصطلحات الدارجة حاليا في الأردن, وفيه على شاكلتها كثير زي
      مش قادر أقدر أستطيع
      كـَـمْ جاي =(come)

      حذف
  7. صبحك الله بالخير والنور ^____^
    لا بأس عليك ,, نسأل الله أن يشفيك ويعافيك ومن كل خير يعطيك
    أما الادويه فيكفينا ان نقرأ نشرتها ليزداد ألمنا نفسياً ومن ثم جسداً
    ربما محاكاة لما في النشرة !! أما الدكاتره فالله المستعان على بعضهم
    يعملوا من الحبه قبه ويا ويل المعده من سوء وصفات بعضهم
    أنصحك بشرب العسل على الريق و تناول الحبة السوداء بإنتظام
    كما أن للبن الناقة وبولها أثر طبي عجيب على جسم الانسان مجربه بنفسي
    وكلها اسباب لابد من الأخذ بها والله الشافي المعافي

    من العايدين الفايزين
    وكل عام وانتم بخير وصحة وسلامه

    غريب

    ردحذف
    الردود
    1. أخي غريب كل عام وأنت بألف خير وأعاده الله عليك باليمن والبركات..
      الحمدلله أنا في حال أفضل الآن والعلاج بالعسل بدأت به وعسى أن يكون فيه الشفاء
      شكرا لمرورك واهتماك
      دمت بخير و ود

      حذف
  8. الف سلامه. نسأل الله عز وجل الشفاء العاجل لك.

    ردحذف
  9. اول اشي ربنا يخلصك من مرضك و يشافيكي .. و طهور باذن الله ,,

    علم و طب حديث بالصلاة على النبي ...
    على فكرة انا هيك تطمنت انو الوضع في الوطن العربي الشاسع كلو واحد كل على ليلو بيفتي ..

    بيجوز تاني اسبوع يشخصوك بحكة بالرموشو رجه بالحواجب ... ممكن العلم عنا متطور .. والاطباء ماديين ,,,

    هاي رواية عادية بالمقارنة مع اخطاء الاطباء اللي لا ذمة ولا ضمير عند جماعتنا ...

    ردحذف
    الردود
    1. الله يرضى عليك وشكرا لمرورك.. بالنسبة إلي بلشت اتأقلم مع حالتي وأتعايش فالحمدلله.
      يعني بنحلم بالوحدة العربية هيها زي ما حكيت إنت موجودة.. كله تخبيص بتخبيص . ههههههههههه

      يسعدك مساك وشكرا مرة ثانية لمرورك وما تشوف شر ان شاء الله

      حذف
  10. It s a very useful page. Thank you. a419a2faebcf5e2ce7dff2931425f3b2
    evren
    ozvatan
    hisarcik
    pehlivankoy
    akcakale
    emirgazi
    pazaryolu
    unye
    boztepe

    ردحذف
  11. Congratulations on your article, it was very helpful and successful. 8f7d4b28467ec2b8d3859bc19792394d
    numara onay
    website kurma
    website kurma

    ردحذف
  12. Thank you for your explanation, very good content. 9619906dad433097b1a31f9200e8182f
    define dedektörü

    ردحذف
  13. Önemli giriş adreslerine buradan ulaşabilirsiniz.
    betturkey giriş
    betpark giriş
    HTFQ

    ردحذف