02‏/10‏/2011

كُـلّنـا لـيـلـى

ليلى.. ما تمشي مع فلانة.. ولازم ما تكثري طلعات.. لإنه العالم شو بدها تحكي؟  ولازم تلبسي هيك.. وما تضحكي بصوت عالي.. يعني مش عارفه إنه صوتك عورة؟ ولازم تحطي شوية ميك أب.. علشان تبيني بنت يعني.. ولازم تدرسي ليصيرك مستقبل.. لإنك بلا مستقبل شو راح تعملي؟ بس إذا درست لازم تدرسي هاد التخصص.. لإنك بهداك التخصص شو يعني راح تنجزي؟ إذا تخرجتي لازم تشتغلي.. لإنك بلا شغل كيف راح تتجوزي؟ ولازم تتجوزي.. لإنك بلا جوز شو يعني بتسوي؟ ولازم تخلفي لإنك تجوّزتي .. ولازم تربيهم لإنك خلفتيهم.. ولازم تشتغلي لتطعميهم.. وهاي مشكلتك.. لازم تنسقي وقتك بين شغلك وبيتك.. وشو هاي بدك تكملي دراستك؟.. انطمّي.. بكفي بتعرفي مسح الغبرة..
لازم تسمعي حكي جوزك..لإنه طاعته واجبة.. ولازم تسمعي كلام أبوكي وإمك وأخوكي وعمّك وخالك وجدك.. لإنه أكيد بعرف أكثر منك.. ولازم تشاوري في كل شي قبل ما تعمليه.. حتى لو جارتك.. ومقسوم لا تاكلي.. وصحيح لا تقسمي.. وكلي تتشبعي..


بس إذا حدا قرّر يفرض رأيه عليكي .. لازم ترفضي وما تسمحي.. وين حقوقك؟ وشخصيتك؟ وكرامتك؟ لازم تدافعي عن نفسك.. لازم تكتبي عن معاناتك.. وقهرك.. لازم يكون عندك رأي!! لازم بكرة نفتح جروب على الفيس بوك.. كلنا ليلى.. ولازم كل وحدة تشارك وترفض وتنادي.. وبوعدك إني أنضم مع شي مليونين ونص فرند.. ولجان المجتمع والأمم المتحدة وحقوق المرأة والصحافة والإعلام واليانصيب.. والندوات والمؤتمرات.. وبوعدك إنه كله حكي فاضي.. بس لازم تتغيّري.. ومش لازم تفهمي.. يعني لازم تفهمي؟
يا ذكيّة.. إحنا اللّي خلقنا المظلمة.. وبنستغلك تنلاقي الحل.. إنت المشكلة.. وبوعدك إنه ما فيه حل..



هناك 15 تعليقًا:

  1. يا بييييييييي الخووووووووووووووف!
    لوول
    بس الشكر لنيْسان أكيد اللي رجعتك للكتابة :)

    -------------
    هي بس ليلي لو تسمع الكلام!

    ردحذف
  2. يا بييييييييييييي على النقّ!
    لويش بتنق على البنت؟
    ...ما صدقنا وهي ترجع:)
    وتنور:)
    وتشعشع:)
    و
    "
    وتبهدلنا:))

    عظمه على عظمه يا ليلى ...الحمدلله على السلامه.

    ردحذف
  3. معك حق، مجتمعنا بظلم البنت كتير واساس الغلط من البنت (الام) لانها هيك ربت ابنها وهيك ربنت بنتها,

    انا مع القوامة للرجل وهاد حق اعطاه اياه ربنا والمركب اللي يبقودوا اتنين بيغرق ومن الطبيعي انو القيادة للرجل ،بس هاد مش معناته تهميش المراة والتسلط عليها وذنبها الوحيد انها تتعامل بهيك طريقة انها انخلقت بنت...

    حق البنت انها تسوق وتروح وتطلع وتناقش بس كله ضمن حدود الحرية المنطقية

    احنا بدنا نتعامل زي ما حكى الاسلام "رفقا بالقوارير" و "ما أكمهن الا كريم ولا اهانهن الا لئيم"، "استوصوا بالنساء خيرا"....الخ

    دمتم بود

    حنين

    ردحذف
  4. "بس إذا حدا قرّر يفرض رأيه عليكي .. لازم ترفضي وما تسمحي.. وين حقوقك؟ وشخصيتك؟ وكرامتك؟ لازم تدافعي عن نفسك.. لازم تكتبي عن معاناتك.. وقهرك.. لازم يكون عندك رأي!!"

    هاي هي كل مصايبنا , ما بنترك حدا يتصرّف من شور راسه , واذا بدنا ننصحه بتكون بهاي الطريقة

    ولسه وضع البنت بكون اسوأ بكثير من وضع الشبّ

    الله يكون بعوننا

    ردحذف
  5. هيثم:
    أنا مش خايفة ولا إشي .. يا بييييييييييييييييييه شو بتحب تألّف قصص!!


    نيسان:
    شايفه بالله على هالهيثم!!
    الله يسلمك, وهاي مش بهدلة.. شوية فضفضه :)

    ردحذف
  6. حنين:
    مساءك سعيد, المشكلة إنه الأمور مختلطة بين العرف والعادة والواجب والحق والسلطة, طيب و"الاسلام كرّم المرأة",وبعدين؟ والله ما حدا عارف والكل بفتي من عنده!

    ردحذف
  7. أبو زينة:
    مساءك سعيد, متل ما حكيت لحنين, أنا بشوف الأمور مختلطة, ومرات والله ما بعرف راسي من إجري, يعني بالزبط شو بدهم منا؟ نطيع ولا نثور؟ نوافق ولا نرفض؟اللي اللجنة الحقوقية الفلانية بتقولك هاد حقك واللي بفتي وبيقولك حرام عليك, واللي عاش عمره متلقي للأوامر.. وكيف بده يميز متى يطيع ومتى ما يطيع.. ومتى مفروض يكون شوري من راسي ومتى مفروض أشاور اللي أفهم مني؟؟؟
    أي هو حلوا عني..

    ردحذف
  8. *إهئ إهئ إهئاااااااااااااااااااااااات*

    و لا ، ما بدي فاين

    بدي أبلش مرحلة "كره" مؤقتة تا ترجع إم عمر و تباشر الكره على أصولو معكم/نّ

    ردحذف
  9. السلام عليكم
    ههههههههههههههههههههههههههههه
    المهم فى الاخر وصلتى لفين بعد الرحلة دى
    لو عرفتى انشريه فى البوست الجاى
    متغيبيش كتير
    دومتى بخير

    ردحذف
  10. هيثم:
    خلاص لا عياط ولا كره.. هدنة :)
    تصبح على خير.


    رحلة حياة:
    اطمن بعد كل الرحلة ده ما وصلتش لحاجة ولا راح أوصل ولا راح أعرف!!
    دمت بود :)

    ردحذف
  11. الف الحمد لله عالسلامه يا قمر

    لاااا نيسانة التدوين كان لازم من زمان تسمعنا كم كلمه لنرجع نصحصح كلنا :)

    مشكلتنا الكبيره هي التناقض الكبير اللي عايشين فيه.... و دائما لخدمة مصلحه شخصيه مش اكثر

    الموقف نفسه بتكرر و كل مره بكون اله قياس خاص حسب مصلحة فارض الرأي وصاحب القرار بالموضوع واللي اكيد ليلى ما بكون الها دور فيه الا التنفيذ

    ردحذف
  12. ويسبر:
    الله يسلمك يا حلوة ويخليك, المدونة دايما منورة بوجودك :)

    التناقض كبير جدا لدرجة اني مرات بصير احكي مع حالي ومش عارفة القرار الصح من الغلط!

    تحياتي

    ردحذف
  13. Nice article, thanks for the information.

    ردحذف
  14. مرحبا
    انا اول مرة ازور مدونتك
    صراحة اعجبت فيها كتير
    طبعا انا ما قرات موضوع التعليم لاني محبطة جدا من موضوع التعليم عنا بالقدس
    وقرات موضوع نيسان المترجم وقبله موضوع زينة
    يعني منسوب الاحباط واصل عندي لحده
    لكن قرات عن ابو صلاح وعن ليلى
    وغيرت اشوية صغيرة المود

    لي عودة ان شاء الله

    ربي يفرجها علينا جميعا
    كوني بخير دوما

    ردحذف
  15. الأخت أمل:
    شكرا لك ولمرورك ولكلمات الجميلة.. أتمنى زيارتك الدائمة وأهلا وسهلا بك.

    ردحذف