04‏/10‏/2011

مطلوب إستشارة نفسية 2

مساء الخير..

بتتذكروا زمان من أكمن شهر كتبت عن طوشتي مع مديرتي المصابة بجنون العظمة، تحت عنوان (مطلوب إستشارة نفسية)، وكيف إنها كانت تسعى لتطيرني وتنقلني لأسباب فنية لإني زائدة في مكان عملي..

المهم لحد الآن ما انتقلت ولا طرت.. ليش؟؟ اكتشفت إنه زميلاتي تناقشوا من وراي مع المديرة لحتى ما تنقلني، مش لسواد عيوني طبعاً!! بس لإنه إذا أنا زيادة فما راح يجيبوا حد بدالي، لذلك راح يتقسم شغلي عليهم وراح يزيد عليهم الحمل!! فصدر القرار مبدئياً إني أظل، صحيح (مصائب قومٍ عند قومٍ فوائدُ)..

بس أنا هسه طقت ببالي إني أنا أكتب استدعاء وأطلب نقل ولا أقدم استقالتي حتى.. هيك لأرتاح من مناظرهم كلهم.. لكن إجاني خبر إنه المديرة قرّبت تتقاعد، لإنها كمّلت 32 سنة خدمة ودخلت بال 33 !! أنا بصراحة مش عارفة كيف واحد فيه عقل بتحمل وظيفة الحكومة كل هالسنين، وتفاءلت والله..

لكن الحكومة موقفة التقاعدات حالياً، قال شو؟ علشان إعادة الهيكلة.. بس ياااا خوفي لما يهيكلوا مديرتنا تروح تطمع وتظل بوجهنا كمان ثلاث ولا أربع سنين... يااا رب إدعوا معي إنها تكون من الفئة اللي راح يقل راتبها مع الهيكلة بلكن تحل عنا!!


بختم بسؤال طريف سمعته مرة على الإذاعة بيحكي (من هو المدير؟)
الجواب: هو الشخص الذي يصل باكراً عندما تصل متأخراً، ويصل متأخراً عندما تصل أنت باكراً !

هناك 9 تعليقات:

  1. الله يقويكي على هيك اجواء.. وابدا ما تفكري تتركي وظيفتك عشان اي حد الا عشان حالك.. واكيد مو قبل ما تشوفي شغل تاني...
    انا لو مكانك ممكن ادور على شغل تاني واقدم استقالتي.. هيك بكون أمنت حالي بوظيفة (ان شاء الله احسن) وارتحت من هيك اجواء مسمومة وخليهم يصطفلوا بالشغل عشان يبكوا على ايامك :)

    ردحذف
  2. الله يريحكم منها قريباً!

    لفت نظري :

    (مش عارفة كيف واحد فيه عقل بتحمل وظيفة الحكومة كل هالسنين،)
    !!!
    معقول يا كيكي؟
    مهي وظيفة الحكومه بتلغي عمل العقل من اول سنه شغل:))
    وهيك بيمروا تلاتين سنه والموظف الروبوت مش حاس فيهم ....

    مش كلهم اكيد, في ناس بتقاوم زيك :)

    ردحذف
  3. السلام عليكم
    حلو تعريف المدير
    س انا عموما مش بحب المدير الموظف بحب المدير القائد مكونتيش هتلاقى مشاكل من اللى بتحكى عليها دى
    اتمنى لك الخير دوما
    دومتى بخير

    ردحذف
  4. Lily :
    شكرا لمرورك ومؤازرتك بالتعليق :)
    أكيد أنا راح أحسب حساب وما بترك الشغل غير لما ألاقي غيره, على الأغلب راح أطلب نقل لإني مليت!
    مسائك سعيد :)


    نيسان:
    هههههههههههههههه, والله كلامك مزبوط مرات بحس حالي بالشغل زي الروبوت وحتى منومة مغناطيسيا, كل يوم بروح الدوام وبعمل نفس الروتين ولا فيه تحسن ولا تطور.
    الله يسمع منك ويريحنا منها أو يريحني أنا ويتوب علي من هيك وظيفة.


    رحلة حياة:
    مساؤك سعيد, المشكلة إنه المدير عنا بيوصل المنصب إما بالأقدمية أو بالواسطة, مش لإنه بيتقن فن الإدارة, والنتيجة معاناة الموظفين المساكين أمثالي..
    شكرا لمرورك

    ردحذف
  5. ياااااااابااااااااااااااااايييييييييييييييه على شغل الحكومه و الامراض النفسيه اللي عند بعض موظفي الحكومه...او ليش الكذب...اغلب موظفي الحكومه

    ربنا يكون بعونك و يسرلك اشي افضل واحسن لتخلصي منهم كلهم

    ردحذف
  6. بارك الله فيك المدونة ممتازة ورائعة شكرا لك ...

    ردحذف
  7. ويسبر:
    هي امراض نفسية ولا مستشفى مجانين!
    الله يعيني ويصبرني.. ويسمع منك ربنا ويسر لي الأحسن إن شاءالله

    ردحذف
  8. ان شاء الله بتتقاعد وبترتاحوا منها قريبا

    مافي اصعب من المدير النكد والمجنون ، كان مديرنا هيك .. بس ارتحنا منه والحمدلله بعد شو لما طلع جنون كل واحد منا ..

    ربنا يصبرك على مابلاكِ ..

    ردحذف
  9. وجع البنفسج:
    الله يرضى عليك ويسمع منك يا رب, الله يريحنا من جنونها ويصبرني عليها, آااامين

    ردحذف