28‏/05‏/2011

أسباب تأخر الزواج ؟؟؟

مساؤكم سعيد جميعاً...
من فترة وأنا غايبة عنكم لكن بيسعدني وبشدة أرجع اليوم وأكتب عن موضوعنا اللّي فاز في هاد الشهر ( لماذا يتأخر الزواج؟ ).. قبل ما أبدا وأدلي بدلوي كل الأرقام والإحصائيات اللي راح أدرجها معتمدة على حدسي الخاص وشيء سمعته أو  قدّرته، لكنها مش معتمدة على إحصائية علمية ومنشورة في المجلات.. يعني قبل ما حد يحكيلي من وين بتجيبي هالكلام؟

أولا لازم نعرف شو السن الملائم للزواج؟ وشو السن المفصلي اللي إذ تعديناه بنعتبر متأخرين؟
من وجهة نظري فالزواج قبل سن 22 مبكر، ليش؟ لإنه مش معقول تكون سنة رابعة جامعة ولسة بتحضر ستار أكاديمي وينفع تفتح بيت وتكون مسؤول عن أسرة!!!

لذلك ما بعد ال22 وحتى الثلاثينات مثلا وضع طبيعي ومقبول ومش تأخير.. يمكن السن المفصلي اللي الناس بتصير تحكي معه والله اتأخرتوا 35 ؟ على العموم المسألة قابلة للنقاش وبتعتمد على المكان وثقافة المجتمع.. وكون اللي بنحكي عنه بنت أو شب.. منكم اللي راح يختلفوا معي أكيد وكل واحد منا بيقدرها بشكل مختلف..

طيب ليش التأخير؟ الجواب بسيط وواضح بالنسبة إلي:

(( تردّي الحالة الإقتصادية ))

((والعلاقة طردية)).. كلما زاد الوضع الإقتصاي سوءاً تأخرنا أكثر وأكثر..

تعالوا يا جماعة نحسبها بالورقة والقلم.. عشرات الألوف بيعانوا من البطالة وإلهم سنين متخرجين وتخصصاتهم ما إلها شغل.. مئات الألوف من اللي بيشتغلوا رواتبهم ضعيفة خاصة إذا كانوا من موظفين القطاع الحكومي..
لو كان إلك 10 سنين بتشتغل وراتبك الشهري 350 دينار وبزيد بالليرة والليرتين كل سنة فأكيد راتبك ضعيف مع كل المتطلبات الي حواليك.. إفرضوا معي إنه هاد الموظف أبو 350 دينار قرر يتزوج، راح يفكر بالموضوع من 3 محاور..

أولاً: مهر العروس..
فرضاً العروس اللي راح يخطبها راح تاخد مهر منطقي ورقم مقبول مثلا 3 آلاف دينار.. بتصور إنه هالرقم مقبول لإنا بنحكي عن الناس العاديين والأثرياء غير معنيين هنا لإنه هدول ما عندهم مشكلة.. طيب وأخونا بالله ضغط على حاله وحوّش نص الراتب مثلا، بعد ما نحذف مصاريف المواصلات والأكل والشرب والدخان وكرت الموبايل.. فهيك بده سنتين أو أكثر بس ليجيب المهر..

ثانياً: أثاث البيت..
طبيعي بده أثاث ولو بسيط ليبدا حياته.. غرفة نوم وغرفة ضيوف وثلاجة وغسالة وفرن وبرادي وسجاد وأدوات مطبخ ووو.. بدها المسألة كمان أربعة آلاف أو أكثر؟؟.. بعدنا بنحكي بأرقام مقبولة للناس العاديين.. إذا علشان يجيبهم بده ينطر كمان ثلاث سنين..

ثالثاًَ: تكاليف الزفاف والخطوبة..
كل زيارة للعروس خلال فترة الخطبة بدها تكلف وهدايا ومشاوير.. وحجز قاعة أفراح للخطبة والعرس.. وفستان العروس وصالون التجميل والضيافة.. وحفلة توديع العزوبية.. هاي كمان ثلاث آلاف وبتجر معها سنتين من الإنتظار..

يعني المسألة على أقل تقدير بدها تكلف 10 آلاف دينار مقابل 300 ولا 400 دينار راتب بالشهر!! منيح منه الشب إذا بقدر يتزوج قبل سن الأربعين!! وطبعاً إذا هو اتأخر إحنا البنات أكيد راح نتأخر وإحنا بنستنى بحضرته تيجهز!!

طبعاً هاي البداية بس، ولسه بعد الزواج تكاليف الحياة اللي  بتستهلك راتبه كله من إيجار البيت والفواتير والمواصلات والأولاد.. طيب كيف بده ساعتها يعيش؟ زي المتصوفين؟ زاده العبادة؟

على الأغلب في هالحالة راح العروس تكون منتقاة بعناية، موظفة وإلها راتب ثابت.. طيب البنت اللي اتخرجت من سنين وما لقيت وظيفة.. ولا اللي ما كملت تعليمها أصلاً.. شو تعمل؟ تاكل هوا؟

المسألة عويصة ومعضلة كبيرة.. وكيف بدها تنحل؟ يعني لازم كل إشي يرجع يرخص علشان تقل التكاليف.. وهاد مستحيل.. طيب الرواتب تتضاعف والبطالة تنتهي.. مستحيلين.. طيب وبعدين؟

مشان هيك بالنسبة إلي هاد العامل الرئيسي والأهم، يمكن في أسباب ثانية بس ما بتشكل عندي هالأهمية العالية في مقابل هالسبب لأنه شريحة كبيرة ولا يستهان بها من المجتمع بتعاني من سوء الحالة الإقصادية..

دمتم بخير...

هناك 16 تعليقًا:

  1. كياله تحياتي ..

    بصراحة موضوع مش سهل بمجتمعنا .. خاصة المجتمعات الي هي مش رأس مالية ... والي مصدر دخلها علمها وشهادتها ...
    يعني معظم الناس دخلها من تخرجها وتعليما والواحد بيدا شغل صغير او بيتوظف اكيد مش متوقع منو انو يبني عش الزوجية بسرعةالا بالدين و البنوك
    و مش عارف شو ,,,

    وبصراحة يا كيالة القصة اعقد من قصة فلوس ...
    يعني من جهة عادات و( تقاليع)
    تفكير الناس ,,,
    نظرة المجتمع ...
    الزواج تقليدي او لأ ...
    الظروف ...
    المحيط الاجتماعي ...
    الاقارب ..
    البنت نفسها واهلها
    الرجل كذلك وعيلتو ..
    شخصيتو ..
    تفكيرها يعني كتيييير شغلات ...


    يعني صدقاً القصة اصعب من انها تنحصر بالمادة فقط ...

    ردحذف
  2. ذكرتيني بحالي بس أحكي للي حوالي:
    مش ذنبي إني إجيت في زمن الأزمة المالية :)

    ردحذف
  3. انا من رأيك و اعتقد ان السبب المادي هو اكثر سبب مؤثر

    و تحليلاتك كافيه و وافيه, العيشه بين موظفين الحكومه بتخليكي تحكمي عالموضوع بشكل اكبر
    و بس تسمعي شكاوي المتزوجين منهم بتعرفي المأساه اللي عايشينها.....بكفي ان في كتير منهم ما بقدرو يتركو الشغل و همه مهلوكين و شغلهم مأثر عليهم و على اولادهم و على زواجهم ولكن ما في غنى بتاتا عن راتبها بكون

    الله يعين العالم

    ملاحظه ع الهامش

    شكرا انك اعطيتيني سنه زياده لادبر حالي بعريس قبل ما اتأخر ;)
    ههههههههههههههههههه

    ردحذف
  4. 100% صح
    بتعرفي شو الحل .. ما يشتغلوا الشباب في البلد يهجوا بلحقوا بعدين يكونوا حالهم بكمن سنة .. اقل يعني و يجوا ياخدوا البنات ويروحوا بس هون رح يصير مشكلة اذا ما رجعوا ياخدوا بنات وتزوجوا من المكان اللي هم في !! اذن الحل كمان البنات يسيروا ياخدوا من برا ما في الأردن احنا بنعطي رواتب عالية لغير الأردنين وبالتالي في عنا كتير ناس غير اردنين بيشتغلوا و وضعهم ورواتبهم واعمالهم ممتازة فزي ما شبابنا ممكن ياخدوا من برا احنا بناخد الشباب اللي بيجوا من برا !!

    ردحذف
  5. الآنسة كيّالة...

    كلامك صحيح وهو حال أغلب الشباب في الاردن ... وبصراحة من محيط حياتي البسيط لم أرى أي شاب تزوج في الأردن إلا أن والده ساعده، أو تغرب عن البلد، أو استطاع ان يجد عمل براتب كبير نسبيا، او يعمل في مهنة حرفية تدر مال جيد ...

    ولكن شاب لا يملك غير راتبه والراتب أقل من 500 دينار شهري، فلا أعتقد أن يستطيع الزواج أصلاً ... فماذا سوف يكون مصيره؟؟ أو ماذا سوف يفعل؟؟ الله يكون في عون الشباب ...

    وكما قلت أنه عدم قدرة الشباب على الزواج أو إرتفاع هذا السن ينعكس تلقائياً على البنات ...

    وأكبر دليل على هذا لو عدنا بالزمن قليلاً خمسون عاماً مثلا أو أكثر ... لوجدنا أن سن التأخر في الزواج كان يبدأ من 22 سنة او لحد 25 سنة مثلاً ... حيث أغلب أهالينا تزوجوا بين ال 16 سنة و22 سنة تقريباً... حيث كان من السهل جداً في ذلك الزمن فتح البيت كما يقولون ...

    الله يعين الشباب على ظروفهم ويصون الأمة جميعها... ويسهل أمور الشباب والبنات ..

    ردحذف
  6. يعطيكي العافية ما قصرتي , المادة ركن اساسي بالمشكلة

    في اسباب اخرى كثير , بس بتخيّل معظمها اصله المادة كمان

    بتعرفي شو بحس السبب الرئيسي بوجهة نظري؟

    هو انه احنا ما بنتصرف مع الناس زي ما بنحب يتصرفوا معنا - الا من رحم ربي

    يعني بيجي الشب بده يتفاهم مع اهل بنت , قدر الامكان بقلل من المهر وبدقر على العفش والبيت والخ الخ الخ وبتوقّع اهل البنت يمشّوله

    بينما هو نفسه - واهله - لما ييجوا يجوزا بنتهم , ما بخلّوا اشي الا ما يطلبوه من العريس المحتمل

    هاي وجهة نظري طبعا.

    ووجهة نظر هناء تحشييييييش جد D:

    ردحذف
  7. lunar
    loooool ما هو الوضع فظيع

    ردحذف
  8. كيكي ...

    كفيتي ووفيتي، ما في على الكلام غبار، وفي أسباب أخرى ظهرت جديد بين فئة الشباب، مش اسباب مرضية ولا مادية، لكن أسباب سياسية، على العموم انا اجيت اقولك انها نورت وممد الله عالسلامة يا جاي من السفر وحشانا الابتسامة والشك ولا القمر
    :)
    مساؤك سعيد كمساء كندا

    ردحذف
  9. Finalway:
    أكيد فيه عوامل كثير بتأثر وأنا ما بنفيها.. بس من وجهة نظري المادة هي العامل الأقوى..
    تحياتي


    مياسي:
    والله جوابك عبقري!! اسمحيلي راح استخدمه المرة الجاي لما حدا يحكيلي ليش لسه ما تزوجتي؟

    ردحذف
  10. ويسبر:
    أكيد إنت أكثر واحدة فاهمة عن معاناة أصحاب الرواتب الضعيفة!! وسامعة زيي قصص تطلعانة روحك..
    ملاحظه ع الهامش
    العفو العفو.. يللا لحقي بسرررررعة.. خاصة انك صرت بالامارات وبتحصلي مبلغ محترم!!


    هنا:
    والله متل ما حكا لونار.. تعليقك تحشيش :)
    بس والله فكرة!!
    دمت بخير

    ردحذف
  11. سراج الماضي:
    أولا دعني أرحب بك وشكرا لك على مرورك وتعليقك الثري.. ولا أملك سوى الموافقة على كل ما قلته.
    سعيدة بهذا التواصل.


    لونار:
    مساءك سعيد
    راح أوافق على كلامك وبشدة.. والله صحيح.. بس يصير دور ابنا يتزوج بنصير نحسبها على بنات العالم وبس يصير دور بنتنا بنصير بدنا نعصره للشب المسكين!
    بالله عليك مش هاي قمة الازدواجة والكيل بمكيالين؟

    ردحذف
  12. نادر:
    شكرا على الوصلة الترحيبية.. أنا إلي أسبوعين بقرأ إدراجاتك بس ما استجريت أكتب أي تعليق لتحكيلي وينك؟ بس هاد الأسبوع أكيد راح أعلق :)

    مساء كندا؟ شكلي بالكلام اللي كتبته رجعت خليتك تشتاق للهجرة!

    الله يعينا جميعا على الأيام اللي جاي..

    ردحذف
  13. يعني كياله شو بدنا نعمل؟
    ما بايدي اشي والله خلي الواحد ساكت!

    ردحذف
  14. مياسبي:
    خليها على الله.. الله يعينا ويعينك :)

    ردحذف
  15. السلام عليكم ورحمة الله وبركاته
    سوء الوضع الاقتصادى هو أهم عامل من عوامل تأخر سن الزواج بل فى بعض البلاد ومنهم مصر مثلاً لم يعد هناك زواج أساساً.

    ردحذف
  16. أخي محمد الجرايحي:
    وعليك السلام
    نحن في الأردن 6 ملايين نسمة وتزيد قليلا.. ونشتكي التأخر في الزواج.. ومصر؟ 80 مليون!!!
    كان الله في عوننا جميعا
    شكرا لمرورك

    ردحذف