13‏/12‏/2010

حاسة حالي بمدرسة

مساء الخير.. ومساء البرد القارص.. والهواء العالي.. والمطر الغزير..
المطر مستمر على طول في الهطول مبارح واليوم.. ما بعرف بالنسبة لباقي المحافظات بس عنّا بإربد ولحد الآن وأنا بكتبلكم المطر ما شاء الله كثيف وغزير..



شو حكايتكم إنتو وهالواجبات؟ خلصت أيام المدرسة يا جماعة!
كل واحد بخطر له خاطر وبيدبسنا بواجب .. والثاني بتهدّدلنا وأنا محمد علي كلاي!

بس ما راح أكسف حدا وراح أنصاع لأوامركم وأعمل الواجب، وعالعموم أنا أيام المدرسة كنت جبانة وبأخاف أدخل باب الصف إذا مش مكملة الحل.. ولأنه ( Old habits die hard ) فإليكم الحل:

الواجب الأول: واجب الأسئلة الفضولية...  

مين تذكرني ؟ الله يذكرها بالخير : ويسبر

السؤال الأول: هل أنتي فضولية ؟

بصراحة مطلقة لأ أبدا ، أنا ما عندي شغف أسأل وأستفسر عن أي شيء بيخص أي حد، وما بوجع راسي بقصص الناس وحتى لو كانوا من المقربين، يعني حتى لو كانت أختي ما بسألها ولا عندي إصرار أعرف وأستفسر عن أي موضوع بيخصها إلا إذا تبرعت هي وحكتلي.
هسه أنا ما بعرف إذا هالشي إيجابي ولا لأ، لإني بالعادة بكون آخر من يعلم و زي الأطرش بالزفة، ويمكن ببين للناس شخصية مملة، بس هو طبع وما بعرف أتخلص منه.

السؤال الثاني: ما هي الاسئلة التي تستفزك ؟

كل الأسئلة الفضولية بتستفزني وخاصة الأسئلة الاستفسارية الشخصية: كم عمرك؟ كم راتبك؟ بكم اشتريت هالبوط؟ ومن وين؟ و وين كنت؟ ومع مين رحت؟ بصراحة بكون بدي أفجر اللي قدامي إنه شو دخلك؟ وشو بيهمك؟

أسئلة المقدّمات واللف والدوران لمّا الناس تسأل 20 سؤال قبل ما تدخل بالموضوع مباشرة، إنه خلصنا إحكي الدغري. إيش بدّك؟

وبكره الناس اللي بتسأل سؤال هي بتعرف إجابته مسبقا. يعني بيكون الواحد سأل ألف قبلي وعارف السيرة بكل تفاصيلها وبيرجع يسألني عنها، إنه شو المتعة في إنك تسأل كمان مرة؟ مش عارفة؟


الواجب الثاني: أقدم ذكرى... 

مين تذكرني وورطني؟ والله مش عارفة. بس أنا شايفة كل الناس بتكتب بهالواجب فراح أتبع الحشود وأحله أنا كمان. بس والله العليم إنه ويسبر كمان هي اللي ابتدعت هاد الواجب. 

أقدم ذكرى بتتبادر لمخيلتي بكون فيها راكبة بالسيارة مع الوالد وإخواتي وبنروح على مكان غريب وهالمكان فيه حديقة كبيرة وشجر، وبتتكرر الصورة وبنروح على هالمكان أكثر من مرة... وفي وحدة من هالمرات بيكون فيه كاميرا والوالد بيصورنا وإحنا حوالين الشجر...

كان عمري وقتها حوالي ال3 سنين، ولما سألت إخواتي بعدين عن هالذكرى، تبين إنا كنّا نروح عالمستشفى لنزور والدتي وكانت دخلت مستشفى الولادة لتجيب أختي المفعوصة آخر العنقود، والكاميرا كانت لتصوير المولود الجديد.

بس أهم شي في هاي الذكرى هو الشعور والحالة النفسية اللي بترجعلي كل ما أتذكر هالأحداث، بالعادة بحس بشعور غريب ممزوج بالخوف أو الحزن... ويمكن هاد كان الشعور العام للبيت كله، لإنه اتضح لي بعدين إنه الوالدة دخلت المستشفى تعبانة والولادة كانت قبل الأوان ( في الشهر الثامن ) وصابها ارتفاع حاد بالضغط ودخلت بعد الولادة في غيبوبة استمرت لعدّة أيام، لكن الحمدلله، الله سلّم ورجعت صحيت والمولودة استمرت وبقيت على قيد الحياة، لكن ارتفاع الضغط صار مزمن وملازم للوالدة لحد الآن، ولكن بنرجع بنقول لله الحمد اللي نجّاها هداك اليوم.

طبعاً بعد مرور السنوات المشاعر الغريبة اللي بترافق هالذكرى تبدلت عندي لمشاعر سعادة وفرح، لأنه الطبيب منع الوالدة من الإنجاب منعا باتا، ومع هالحادثة إجت آخر أفراد عيلتنا واللي بتمثل المولودة رقم 8، ( نعم إحنا عددنا 8 ! ) ، 7 بنات و ولد واحد فقط !
طبعا لولا هاللي صار كان الوالدة استمرت وكان صرنا قبيلة الله أعلم يمكن 10 أو  12مولود ، بس الحمدلله، الله بيستر !

بيكفي واجبات لهالليلة وبيضل واجب الشيشاني بس ما بضمن أقدر أعمله، لإنه صعب وبده واحد من المتفوقين ليحله!
  
     

هناك 17 تعليقًا:

  1. huh wainek ya Naisaneh
    tel3at Kiki bent w mo fdooleiieh hehehe
    ella iza heye mo bent w 3m ted7ak 3laina 3ad 0_O
    XD

    ردحذف
  2. بالنسبة لواحد يسأل و يكون بيعرف الإجابة مسبقا فشي بيجلط!

    ما شاء الله، 8 :) قولي ما شاء الله يا أم عمر! أبييييييييييي منك بس!


    الواجب اللي عليكي ... عليكي ! بالانتظار :)

    * أكيد مو فضولية ب ولااااا إشي؟ همممممم :)))

    ردحذف
  3. ايه...طلعت انا اللي فاضيه اشغال و بوّزع واجبات :)
    هلأ اللي انتبهت

    اسألة اللف و الدوران لدخول الموضوع و اسألة اللي عارف الجواب بس بسأل بتجلط بصراحه :$

    8....ما شاء الله و 7 خوات :( بدّي منو لا تتصوري شو صار فيي بس اجا اخوي الصغير, كلنا كنا مجهزين حالنا لبنت و حتى ما حضّرنا اسم ولد , طبعا هو بنسم بدنه بس نجيب هالسيره :)

    الحمد لله على سلامة خالتو و ربنا يشافيها و يعافيها...انتو لا تخلوها تفكر بشي و لا تزعلوها وكلو تمام ان شاء الله

    ردحذف
  4. مدرسه غصب عنا والله
    لا والشيشاني بيحط علامات كمان وبينجح وبيرسب على كيفو ...:))))

    ما شاء الله على عدم فضوليتك

    ما شاء الله على أخواتك وأخوكِ :هلا عرفت من وين اجو ال 23 حفيد ::الله يحفظهم ويحميهم
    ما شاء الله عليهم ...ما رح احسدهم...عندنا نفس العدد تقريبا بس من جهة زوجي

    وربنا يحفظ الست الوالده ويعطيها الصحه والعمر الطويل

    ردحذف
  5. لطيفة جدا في الواقع انا تنزيل على الأرجح. شكرا

    ردحذف
  6. Rain:
    يا حرامك طلعتيني بالآخر ولد! وشو فيها ممكن فيه بنت مش فضولية:) وبعدين نيسان ما حكت اشي عني اتعلمي منها شوي :)


    شيشاني:
    ما شاء الله ..

    بش اذا حدا فيكو حابب يحسدني مش مشكلة ما عندي مانع!
    بلكن اذا حسدتوني حدا منهم بسافر ولا بهاجر وبرتاح منه ومن ولاده :)

    عارفة انه علي علي وانت وا راح تحل عني اكيد!

    انت كمان زي رين مش مصدقني.. انا بحاول ما اكون فضولية واتدخل باي شي بيخص اي حد على مبدأ العب وحدك ترجع راضي..


    ويسبر:
    والله انا هيك استنتجت! انتي شكلك من يوم ما اخذت هالاجازة وانتي مش لاقية شغلة تشتغليها غيرنا :)

    اذا بتحبي خديهم ول مشااااان الله، بلاش ال7 بس كمن وحدة منهم ومع ولادهم طبعا :)

    اما الحجة فمالك ومالها ما حدا جاي فيها، مرات انا ضغطي بيرتفع منها!


    نيسان:
    الله يعينا علي هالشيشاني بس :)

    تسلمي يا رب .. خلي هاي المطرة تسمعك وتتعلم منك..

    ما شاء الله عليهم.. بس مش مشكلة عندي زي ما حكيت للشيشاني احسديهم عادي..

    الله يحفظك ويخليك يا رب ويخليلك الوالدين والاهل والاولاد المشاغب والمؤدب

    ردحذف
  7. يعطيكي العافيه يارب

    إنجاز إنك تحليهم والله
    بدهم تعصير دماغ رسمي هالواجبات

    ردحذف
  8. بس حبيت اسلم و امسي و اصبح عليكي يا انسة كيالة

    اشتقت لكتاباتك الحلوة

    بعدين بسم الله ما شاء الله 8! انتو زيادة عنا ببنت و ولد

    الله يهديهم اباياتنا و اماياتنا شو عملوا في حالهم و فينا

    الله يخليكم لبعض و يسعدك و يبعتلك شوية فضول
    :)

    ردحذف
  9. كيكي
    هلا انتبهت لتعليق رينو....هاي قصدها لما كتبت ان ما في حواء الا وتكون فضوليه....عاد انتي كسرتي القاعده
    أو
    زي ما حكت رينو هههههههههه

    ردحذف
  10. دخلت مدونتك صدفة واعجبني اسلوبك الرايق
    مشا الله عليك
    موفقة ان شا الله
    كل لي ذكرتيه موجود فعلا ،،، انا لااحب الفضوليين وحظي ديما القاهم بكل مكان هههه
    لكن لااحب عدم الاهتمام بي من المقربين
    شرفيني بمدونتي :)

    ردحذف
  11. أم عمر:
    الله يعافيك يا رب..
    والله فكرت لأيام قبل ما أحلهم... هههههه
    بس هو واجب الشيشاني اللي كثير صعب يمكن باللآخر أغشه :)
    سلام


    pp:
    وينك ؟ وين هالغيبة؟ والله اشتقنالك :)
    يعني 6 بنات! يا الله أخف منا شوي!
    تسلمي يا رب .. بس بلاه هالفضول.. ما بدي اياه.. ما بجيب غير وجعة الراس!


    نيسان:
    خلينا على كسر القاعدة أحسن ههههههه
    وبعدين هاد متوقع! يعني أنا صاحبة الكيل بمكيالين وكل شي عندي بالعكس ومش عاجبني إشي وإذا الناس بواد أنا أكيد بواد تاني :)


    كوني طيبة faizadeh :
    أهلا وسهلا بك في مدونتي المتواضعة..
    وشكرا على الاطراء الجميل.. والله خجلتيني.. إنشاء الله راح يكون لي مرور على مدونتك وبنشرف بالتعرف عليك!

    ردحذف
  12. ماأجمل تلك المشاعر التي
    خطها لنا قلمكِ الجميل هنا
    لقد كتبتِ وابدعتِ
    كم كانت كلماتكِ رائعه في معانيها
    فكم استمتعت بموضوعك الجميل
    بين سحر حروفكِ التي
    ليس لها مثيل

    دمت بألف خير

    ردحذف
  13. كل الشكر والامتنان على روعهـ بوحـكـ
    ..
    وروعهـ مانــثرت .. وجماليهـ طرحكـ
    ..

    ردحذف
  14. دائما متميز في الانتقاء
    سلمت على روعه طرحك
    نترقب المزيد من جديدك الرائع
    دمت ودام لنا روعه مواضيعك

    لكـ خالص احترامي

    ردحذف
  15. موضوع في قمة الخيااال
    طرحت فابدعت
    دمت ودام عطائك
    ودائما بأنتظار جديدك الشيق
    لك خالص حبي وأشواقي
    سلمت اناملك الذهبيه على ماخطته لنا
    اعذب التحايا لك

    لكـ خالص احترامي

    ردحذف
  16. من أنفاس لا تهدأ .. يبدأ الحديث
    وحين يعلم أنه إليكِ ..
    يلبس حلة القصيد .. وصوت النغم
    إليك أكتب .. واصابعي ترقص على لوحة المفاتيح
    تعلم انها تكتب لكِ ..
    إليكِ أكتب ..
    فلا تتركي القلم يتعذب ...
    أعجبتني من أجلك سأحضر
    القمـــر على كفي
    وسأزرع الورد على خــــــــدي
    سأهديك طفولتـــــــي
    وأرقيك بشبابــــي.
    كذاك كان موضوعك
    لكـ خالص احترامي

    ردحذف
  17. سأكتبُ كل العباراتِ في ورقٍ مخطوط ْ
    لأجعل منها أروع أكليل من الحروفِ والكلماتِ
    والزهور والأنغامْ
    وألحانِ الشكرِ والاحترامْ
    لأقدمها لكِ تعبيراً عن شكري وإمتناني لردكِ الكريم ,,
    تحياتي الوردية ...
    لكـ خالص احترامي

    ردحذف