- آه يا عليا شو صار معك؟
- خلص، مديرة المدرسة قبلت البنات عندها بس بطلوع الروح! حكت لي المدرسة مليانة والبنات في الصفوف قربوا يوصلوا الخمسين. بس حكيتلها إنه هاي أقرب مدرسة لبيتنا وإني راح أشتكي إذا ما أخذتهم لرضيت تقبلهم بالمدرسة.
- خلص مش ضايل غير ننقل الولد، أنا بكرة بحاول أطلع ساعة من الشغل وبنقل ملفه.
- بس والله يا خالد أنا مش متطمنة. خايفة هالمدرسة تطلع سيئة يعني شو خمسين بنت بالصف؟
- والله كويسة مو كويسة ما عادت تفرق. بدهم يكملوا تعليمهم بمدارس الحكومة أنا ما عدت أقدر على أقساط الخاصة!
********************************
- ماما يارا كيف كان يومك الأول بالمدرسة الجديدة؟
- ماما المدرسة كتييير كبيرة والصف مليان بنات، وضلينا طول اليوم قعدين ما عملنا إشي وما دخلت عالصف أي مدرّسة.
- يعني يا ماما مش معقول تاخدوا دروس من أول يوم.
- مش بس أول يوم، البنات حكولي إنهم أول أسبوع بيضلوا يتمشوا بالساحة وما فيه دراسة.
- وإنت حبيبتي ندى كيف المدرسة؟
- ما بحب المس، ضلت تصرخ علينا وتخوفنا وضربت البنات بالعصاية.
- معلش ماما ما تخافي بس إنت ضلي شاطرة ومؤدبة وهي بعدين راح تحبك.
********************************
- بابا بدي دينارين، بدي أعمل بحث لمادة الأحياء.
- بابا مش أول مبارح أعطيتك خمس دنانير حكيتيلي للأبحاث؟
- آه بابا هدول الفلوس أبحاث لغير مواد، ولسه راح أرجع آخد منك فلوس كمان للأبحاث الأسبوع الجاي.
- أنا مش فاهم ليش بتعملي كثير أبحاث؟ وليش بتدفعي فلوس كتير لتعمليهم؟
- بابا ما أنا بطبع مع البحث صور ملونة علشان يبين أحلى والمس تعطيني علامات عالية وصاحب المحل بيطلب كتير فلوس عالأبحاث الملونة.
- مين صاحب المحل؟ إنت يا بابا ما بتعمليهم بالبيت؟
- يوه يا بابا وليش أغلب حالي؟ بشتريهم جاهزين من صاحب محل الإنترنت اللي جنب المدرسة، خلص إنت أعطيني الفلوس وماما بتفهمك.
- يا خالد ما هو نظام المدارس تغير، مش دايماً إمتحانات، صاروا يطلبوا من الطلاب أبحاث ويعطوهم عليها علامات.
- شو يعني بيعلموا أولادنا يشتروا العلامات بدل ما يدرسوا ويمتحنوهم؟
- لأ طبعاً، مفروض الطالب يجتهد ويقرأ ويدرس المراجع علشان يعمل البحث، بس الطلاب ما بتغلّب حالها لإنه المدرسين ما بيقرؤوا الأبحاث بس بيتفرجوا عليه من برّه وبيعطوا علامة. يارا حكتلي إنه فيه بصفهم 48 بنت وأكيد المدرّسة ما راح تقرأ أي بحث بيعملوه.
- ممتاز والله، أنعم وأكرم! يعني فوق الفشل والغباء اللي عند أولادنا وكمان ما راح يفتحوا الكتب ليدرسوا للامتحان وفوق هاد كله دفع فلوس، لا والله يرجعونا عالنظام القديم ويمتحنوا الطلاب أشرفلنا، ودخيلك هالعملة كم مرة بدنا نعملها في السنة؟
- مش متأكدة بس يمكن أربع مرات.
- يا حبيبي! ما أنا قاعد على بنك لأشتري لأولادك أبحاث، هاد وكل اللي عنا ثلاثة! واللي عندهم خمسة ولا ستة بالمدارس شو بدهم يعملوا؟
********************************
- اهئ اهئ ... ماما ....
- مالك ندى حبيبتي؟ ليش بتبكي؟
- مالك ندى حبيبتي؟ ليش بتبكي؟
- ماما فه بنات كبار ضربوني بالفرصة وأخدوا فلوسي، وحكولي بكرة راح ياخدوهم كمان، ماما ما بدي أروح عالمدرسة.
- طيب ماما إنت بتعرفيهم للبنات؟
- لا ما بعرفهم.
- لأ ماما خلص لا تبكي، بكرة بروح معك عالمدرسة وبشوف المديرة.
- عليا شو صار معك؟ رحت عالمدرسة علشان ندى؟
- آه رحت ويا ريتني ما غلبت حالي ورحت.
- ليش؟
- رحت عالمديرة وشبه طردتني، حكتلي روحي عالمرشدة النفسية أنا مش فاضيتلك.
- وبعدين.
- رحنا عالمرشدة وما كانت في مكتبها ونص ساعة وإحنا بندورعليها تلقيناها بتشرب قهوة مع المدرسات في غرفة الرياضة، ولما حكيتلها عن ندى صارت تضحك علي وحكتلي علشان هالمسألة التافهة جاية؟ وشو بدي أعمل لبنتك وهي مش عارفة مين البنات اللي ضربوها؟
حكيتها بسيطة إطلعي مع البنات عالفرصة وراقبي الوضع وشوفي مين البنات اللي بتسلطوا على هالصغار. فرطت من الضحك وحكتلي هاي اللي ضايل علي أشتغل مراقب على بناتكو! ودارت وجهها عني وكملت شرب القهوة وطنشتني ولا كأنه فيه بني آدمة قاعدة تحكي معها.
طيب إذا ما بدها تحل مشاكل البنات ليش معينة بالمدرسة؟ لتشرب شاي وقهوة؟
- لا حول ولا قوة إلا بالله، أصلاً الحق على نظامنا التعليمي الفاشل اللي بيعمل مدارس فيها من الصف الأول للصف التوجيهي في مبنى واحد وبيخلط كل هالأعمار سوى، كم دولة في العالم بتقسم المدارس الإبتدائي لحاله والإعدادي لحاله والثانوي لحاله، وفوق هيك مرشدة نفسية بدها إرشاد نفسي!
- طيب وشو بدي أعمل يا زلمة؟ البنت بتبكي واليوم رجعت معي عالبيت وما رضيت تدخل الصف.
- وأختها يارا وين عنها؟ نادي عليها ووصيها تدير بالها عليها وتقعدها معاها بالفرصة.
- طيب وبنتي عندها أخت أكبر منها، ولو بنت تانية ما إلها حدى يدير باله عليها شو تعمل؟
- ولا شي بتنضرب كل يوم وبتتعقد نفسياً من المدارس، وبتعيش مع العقد طول عمرها!
********************************
- خالد إلحقني، وسام من أول ما دخل هالمدرسة ما فتح كتاب ولا درس لامتحان، وعلشان تكمل اليوم كان في البيت من الساعة عشرة، قال شو! هرب من المدرسة!
- وله وسام، تعال لهون...
- نعم بابا.
- تعال أشوف ليش هربت من المدرسة؟ ليش؟
- بابا كل الصف هرب وما ضل غيري، يعني شو بدي أضل أعمل لحالي ؟
- ووين الأستاذ عنكم؟ ما كانت رحت وناديت الأستاذ ولا المدير قبل ما يهرب الصف؟
- بالله؟ بدك إياني أكون نذل وأفسد عن صحابي؟ وبعدين الأستاذ شافنا وإحنا بنط عن السور وما حكا إشي.
- عال والله! وكمان من فوق السور! مين هاد الأستاذ إحكيلي إسمه والله لأروح وأشتكي عليه.
- بحكيلك بس ما تحكيلهم إسمي لما تشتكي عليه، ترى الأستاذ هاد مجنون وبكرة بتقصّدني وبيرسبني!
- آه خالد، رحت على مدرسة وسام؟
- آخ بس آخ...، يا ستي رحت وبس دخلت المدرسة الله لا يورجيك شو شفت! المدرسة قايمة قاعدة والمعلمين صافين الكراسي في الممرات وبيشربوا قهوة وبيدخنوا، والطلاب بتراكضوا بين الصفوف وفيه طلاب كانوا في الساحة بيكسروا الأدراج وبيلحقوا بعض بالخشب المكسّر، أنا شفت هالمناظر وكان فيّ مخ وطار!
- وبعدين؟
- دخلت عالمدير وأنا معصّب وصرت أصرخ وصار بده يهدّيني، قال شو بيحكيلي ما يهمك بس هيك المدرسة بأولها بس إنت أعطينا كمن أسبوع لنضبط الوضع! وفوق ما أنا معصب صار دمّي يغلي وصرت أصرخ وأحكيله المدرسة إلها مبلشة شهرين متى بدك تضبط الوضع؟ لمّا تخلص السنة؟ وطلعت من عنده وأنا مش شايف الضو وحلفت يمين لأشتكيه للي أكبر منه، إنشاءالله توصل للوزير!
- يعني وين بدك تروح بكرة؟
- لا ما أنا مباشرة من بعد ما طلعت من عنده رحت على مديرية التربية والتعليم ودخلت مباشرة على مدير التربية وصرت أصرخ، وحاول يهدّيني ويا أخي ما يهمّك وطلب منّي أكتب شكوى خطّية وبعدين هو بيشوف الوضع! مفكرني ولد صغير وكله ضحك عاللّحى لمّا يبقى يشوف الوضع بتكون السنة خلصت!
- طيب، والحل؟
- وأنا طالع من عنده ناداني واحد من الموظفين كان سامع صوتي وأنا بصرخ، وحكا لي مدير هالمدرسة إشتكوا عليه كثير ونقلوه من مدرسة لمدرسة وما فيه فايدة! كل ما يروح على مدرسة بيسيّبها وبتخرب! وأحسنلك تنقل إبنك من المدرسة وأعطاني إسم مدرسة ثانية حكالي إنها منيحة وفيها تدريس ونظام، هي بعيدة شوي بس شو بدنا نعمل؟ الصبح وأنا طالع عالشغل بوصل وسام بالسيّارة والضهر بعلمه كيف يرجع لحاله بالمواصلات.
- يا سلام هاد هو الحل؟ ننقل أولادنا من مدرسة لمدرسة؟ يعني ما بتنحل هالمسألة من جذورها وهالمدير وهالمعلمين السيئين ينفصلوا من وظايفهم؟
- شو هاي ينفصلوا؟ هدول موظفين حكومة، واللي بيشتغل بالحكومة كبيت أبي سفيان من دخله فهو آمن! وما بيطلعه منه غير التقاعد!
- وهاي الأشكال ليش تتعيّن أصلاً؟ حتى يارا حكتلي إنه عندهم مدرسة علوم ما بتفهم الخمسة من الطمسة، وهاي كيف بيشغلوها وهي ما بتعرف تدرّس؟
- لإنه الناس بالحكومة بتتعيّن بالدّور، شو مفكرتيها مؤسسة خاصة بدهم يعملولهم امتحان مستوى ومقابلة شخصية؟
مع إنه والله المدارس هي أول مكان لازم يتطبّق فيه هالنظام، لازم يختاروا أذكى ناس وأحسن ناس لتدريس أولادنا ويعملولهم كمان تقييم نفسي قبل ما يوظفوهم! أحسن ما يضيع مستقبل أولادنا!
- خالد مشان الله! والله خايفة هالاولاد يضيعوا خلّينا نرجّعهم عالخاصّة، الله يخليك.
- رجعت تحكيلي خاصة! لا تجيبيلي هالسيرة مرّة ثانية، شو بدك أعمل؟ أقطّع حالي ولاّ أشحد علشان يروحوا ولادك عالخّاصة! ما شفت الأقساط صارت نار؟ وأقساط يارا لحالها تضاعفت مرتين لإنها صارت بالثانوي! هاد الموجود. بس إنت ديري بالك عليهم ودرسيهم، ومثلنا مثل ألوف غيرنا، ما نص الناس اللي كانت في الخّاصة طلّعت أولادها السنّة عالحكومة وما حدا أحسن من حدا.
********************************
مساء الخير أنسة كيالة( طبعا بعد كل عام وانت بألف خير)
ردحذفوالله كأنك تتحدثي عن أيامي في المدرسة، من زمان كتير وانا بدي اكتب عن ذكرياتي في المدرسة، بس دائما بتردد لأنها مخزية، هو أنسب حل انو الواحد ما يخلف أبدا_ انا مني وعلي زمان قررت هيك_ يعني اذا بدو يدخلهم مدارس حكومية بضيعوا، واذا بدو يدخلهم خاصة بضيع هو !!
تسلم ايدك على الإدراج
كل عام وانتي بخير
ردحذفعلى فكرة انتي بتحكي باحداث صارت بحياتك و تجارب بتوصفيها بتفاصيلها واضح انها لها اثر كبير بحياتك
بس فعلاً كانك بتوصفي مدارسنا بأدق التفاصيل ...
لسا اليوم اسواء و اذا مدارس البنات فيها مشاكل
لاولاد العن .. فيها موبايلات صار و افلام خلاعية و مخدرات و دخان و مواس و ضرب اساتذة
وموضوع يطووووووول شرحة
صدقاً استمتعت وانا بقرأ و بالاخير انسم بدني لاني تذكرت التجربة الي مرينا فيها ...
ولادنا رح يمروا فيها و الجاي اعظم ...
مرحبا نادر:
ردحذفكل عام وانت بألف بخير .
والله يا نادر أنا شفت بمدارس الحكومة و وكالة الغوث أيام أسود من قرن الخروب ويعني هاللي حكيته في الادراج ولا اشي مقارنة باللي عشناه. مرات بصفن مع حالي وبسأل كيف أنا نجحت بالتوجيهي ودخلت جامعة؟ والله إحنا بنستاهل وسام الشجاعة!
عالعموم ياريتك تكتبلنا ادراج عن ايام المدرسة وانا متأكدة راح يطلع حلو وبيضحك! بس انت جرب.
يسعد مساك.
مرحبا Finalway:
أهلا وسهلا فيك وبزيارتك شرفت المدونة.
اي حكاية بكتبها بكون عشت اشي من احداثها او بعرف حدا عاشها او سمعتها من حد وهيك بتكون القصة معبرة لانها من واقع حياتنا.
حياة المدارس زي ما حكيت من سيء لأسوء بس زي ما الله هونها علينا انشاء الله بتهون على ولادنا.
شكرا الك مرة ثانية عالزيارة وبتمنى تعيدها دايما.
يسعد مساك.
صباح الخير ,, وكل عام وإنتي بخير يارب
ردحذفع قولتك,, لازمنا وسام شرف من الدرجه الأولى إلي قدرنا نتخطى مراحل الدراسه بالوكاله والحكومه
خاصه إنه الأمكانيات كانت محدوده
بس صدقي,, الزمن اللي كنا فيه,, كانت المدارس بعدها محترمه وبعده في متابعه وخوف من هيئه التدريس ع الطلاب
إنه مين غايب,, وليش متأخر ,, وليش هيك لبسك,, ومين مصاحب
هلأ,, حالك سالم,, ما إلهم دخل ف الطلاب والطلاب مجرد أرقام متسلسله عندهم
مسا الورد
ردحذفو كل عام وانتي والاهل بألف خير
المشكله ان هلأ صارو العالم تتغرب بس لتدخل اولادها مدارس خاصه و غاليه
وكل ما زادت الفلوس شوي بغيرو المدرسة لاشي اغلى
بطل في ثقه بالمدارس الحكوميه ولا بالمدرسين
و كترو المدرسين اللي ما عندهم ذمّه ولا ضمير الا من رحم ربي طبعا
الله يعين العالم , المدرسين على وضعهم و رواتبهم و حقوقهم المهدورة - واللي اكيد ما بتعطي اي عذر للتخاذل اللي بعضهم فيه
و يعين الاهل على المصاريف و التعب مع الاولاد
أم عمر:
ردحذفيسعد مساك وكل عام وانت بخير.
في برنامج بالتلفزيون (the survival) أكيد بتعرفيه بيودوا المتسابقين على جزر نائية علشان يشوفوا قدرة تحملهم والفايز بيربح مليون دولار، انا راح اقترح انهم يجيبوهم يقضوا فصل دراسي بمدرسة حكومية وانا متأكدة بالنهاية ما راح يكون ولا ناجي و وزارة التربية بتربح المليون!
والله المدارس زي ما بعرفها عمرها ما كانت محترمة ايامي وطول عمرها زبالة بس الطلاب كانت لسه مش واعية وما كان منتشر الستلايت والنت والموبايل بس هسه الطلاب يا لطيف الطف!
اصلا السيستم كله فاشل.
مرحبا ويسبر:
كل عام وانت بخير.
اولا بما انه فكرة خواتي ال6 عاجبتك وبتحسديني عليهم فبحب احكيلك كلهم مقدمين على حسابك ( خديهم مشان الله ) بس بالله بتاخديهم هم واولادهم، ولو سمحت بتضلي قد كلمتك وما بتتراجعي!
تاني شي مش كل الناس هالايام قادرة على مصاريف الخاصة وغصبن عنهم راح يرجعوا عالحكومة والوضع من سيء لاسوأ. المشكلة انه المدرس بالخاصة ببذل جهد جبار لانه مهدد دايما بالطرد - او بالاصح بيشتغل لانه مدعوس على راسه- بس استاذ الحكومة اشتغل او ما اشتغل ما فيه محاسبة ولا فيه طرد وحتى لو فيه قوانين وعقوبات بس بالنهاية ما بيصير عليهم اشي. والله الشغلة ضمير مش اكثر وحتى لو الراتب قليل مفروض احكم ضميري واشتغل لانه فيه رب بحاسبني وفيه اولاد عالم مستقبلهم برقبتي.
بأي بلد المدارس هاي؟ معقول كلامك قريب من الصحه؟ انا صحيح اني درست بس اخر سنتين من الثانويه بالأردن بس ما كان في هيك. اذا حال مدارسنا هيك فأنا شو الجيل اللي رايح ادرسه بالجامعه. الله يستر.ـ
ردحذفانا ما بنكر جزئية إنه بعدنا ما كنا واعيين
ردحذفبس لا تنسي إنه كانت تربايتنا غير,, وقدره تحكم الأهل فينا اكتر من هاي الأيام
في سيطره أكتر من هلأ
مابعرف,, مدرستي كانت محافظه جداً واللي بتغيب لازمن تاني يوم تجيب والدها,, مو إمها
ممنوع نجيب الوالده لعذر,, بوجهه نظرهم كانت الإم تخبي مصايب بناتها
اولا،كل عام و انتِ بخير!:)
ردحذفعن جد اشي بيخزي،و أحلى اشي انو لما نوصل الجامعة بيصيرو يطالبونا نتعلم و ندرس بالطرق حديثة و كلها ابداع و ابتكار و قال ما بدهم تلقين،طيب ما انتوا الكم 12 سنة بتحشو مخاخنا حكي فاضي!و الكم 12 سنة بتعلمونا الانجليزي كأنو مادة مش كأنو لغة؟كيف بتتوقعوا انا نقفز للتطور و التحضر و التعليم الحديث بكل هاي السهولة؟
مسا الخير كيّالة
ردحذفأنا شخصيا درست بالامارات بس مدرستي كانت صارمة جدا يا لطيف لدرجةة اني ما بحب أتذكرها مرات!! بس اختي بتحكيلي "الفريجين" الجديدة عينك ما تشوف الا النور
الصراحة اكتر جزء حبيتو تاع الابحاث لانو هاد الحوار سمعتو من اخت صاحبتي الصغيرة قبل شي 5 سنين!! التعليم كلو والله بطل هالاستثمار لا مدرسي ولا جامعي حتى الدكاترة عنا عم يستقيلو ويتركوا البلد!!
مساء الخير jaraad:
ردحذفمستغرب من كلامي؟ انا لسه ما حكيت اشي بدك احكيلك عن طلابنا اللي زايد اهمالهم وغباءهم وما فيه عندهم اي ثقافة؟ طلابنا اللي 41% منهم مدخنين وهاد بيشمل الاولاد والبنات لانه التدخين عند البنات هالايام صاير برستيج وموضة؟ ولا ثقافة البوي/غيرل فرند اللي صارت ضرورية وبدونها انت متهم انك عقد ومش كوول؟
احكيلك عن المدارس اللي بينكتب عنها بالجرايد بعد نتائج التوجيهي - لم ينجح احد - ولا المدارس اللي اذا رحت عليها الساعة 10 الصبح بتلاقيها سكرت لانه الطلاب والاساتذة في الشوارع والاسواق؟ ولا احكيلك عن الضرب بالمدارس والاساءة اللفظية للطلاب؟
النظام التعليمي عنا منهار ولما بنحاول نحسن فيه بنصرف فلوس على تحديث المنهاج ومن يوم ليوم مناهجنا صارت صعبة ومعقدةوبالمقابل ما فيه امكانيات لتواكب المناهج والمدارس هي هي من 40 سنة والناس بتزيد والمدارس طافحة باللي فيها!
استرسلت بالكتابة ولسه ما حكيت اشي يمكن لازم اكتب عشر اجزاء لهالقصة لافش غلي عن جد!
مساءك سعيد أم عمر:
ما بنكر انه مدرستي الثانوية كانت ملتزمة شوي متل ما حكيتي بوصفك لمدرستك بس المدرسة الاساسية اللي قبلها كانت ميمعة وانا شخصيا بعترف اني هربت من الحصة الاخيرة بعض المرات او طلعت برة لمدرسة في الفرصة عملت جولة سريعة وبعدين رجعت!
مرحبا رين:
ردحذفكل عام وانت بخير
ذكرتيني بايام الجامعة كانت اكلة هوا نقلة نوعية بين المدرسة والجامعة والواحد بيحس حاله تايه ومش فاهم اشي.
المشكلة إنه المناهج الجديدة للمدارس بدها ابتكار وابداع لكن اسلوب المدارس العقيم هو هو من زمن جدي وحتى لما حاولنا نجدد شوي - زي اللي حكيت عنه بفقرة الابحاث - طبقناه غلط بغلط وما فيه فايدة من تجديد اساليب التدريس!
مرحبا مياسي:
كل عام وانت بخير.
بصراحة فيه فرق بين مدارس الاردن والخليج. انا درست وانا طفلة في الكويت مش كتير بس للصف الثالث الابتدائي وبعدين لما استقرينا بالاردن بقدر احكيلك صابتني صدمة نفسية/ ثقافية وما راح تقدري تستوعبي اللي بحكيه غير لما تجربيها شخصيا.
أنا درست سنه وحده بس بالأردن,, وكانت هاي السنهه بمدرسه حكوميه بأم أذينه..
ردحذفكانت معلمة (الأحياء+علوم الأرض) معلم صف يعني أكبر شي مفروض إتدرسو هوه صف 3.. مع هيك كانت بتدرس توجيهي.. وكتير أيام كانت تخلي البنات همه إلي يشرحو الدرس وهيه إتضل قاعده (بحجه بتعلمنا لقدام كيف نكون واثقين من حالنا لما نعمل بريزينتيشن)
وكانت معلمة الفيزياء أصلا تخصصها كهرباء وهيه إشتغلت معلمة فيزياء بس لبيل ما يصحلها وظيفه بنفس تخصصها
معلمو الرياضه كانت تخلينا نضل قاعدين بالساحه أول أسبوعين.. بعدين لغو الحصه وصرنا نروح بكير
وفي كتير زي هيك..
الوحيده إلي جد كانت معلمه بحق هيه معلمة العربي.. جد هاي الله يسهل عليها
مرحبا رولا:
ردحذفلا تشكيلي ببكيلك، بس عجبتني المعلمة بتفكر لقدام وبتعلمك مهارات في القيادة وحسن الالقاء!
ممتاز لغوا حصة الرياضة وخلوكم تروحوا بكير احنا كانوا يعطوا والله الحصة ول عليهم.