14‏/03‏/2011

مطلوب إستشارة نفسية

 وصلت مؤخراً لقناعة إنه كل المدراء مجانين ومريضين نفسياً وبالتحديد مصابين ب (جنون العظمة).. والظاهر إنه لعنة الكرسي بتصيب كل واحد بيقعد عليه وبس يرتاح ويفرد ظهره بنسى إنه كان من قبل موظف وبصير يتجّبر على عباد الله ويكرر سلسلة التصرفات الظالمة اللي بداها اللي قبله.. سبحان الله كلهم قرآنين على إيد شيخ واحد!  

في سبتمبر الماضي وصلت بيني وبين مديرتي للشيطان الرجيم، وبدأت المشكلة بكتاب تكليف توجه لحضرتي للقيام ببعض المهام اللي خارج نطاق مسؤوليتي، والمصيبة إنه الناس اللي لازم يتكلّفوا بالموضوع اللي هو من مهامهم ومسؤولياتهم قاعدين للقهوة والشاي!
طبعاً كرد فعل أول رفضت التوقيع ورحنا لنّاقشها بالموضوع، وكان الجواب إنها حرّة بتعمل اللي بتشوفه مناسب وهذا من صلاحياتها.

طبعاً الجميع ضمن الدوائر الحكومية بيخضع لنفس الأنظمة والقونين، بس بيكون بإيد المدير بعض الصلاحيات (لتسيير عمل الدائرة بما يراه مناسباً) وهذا من ضمن التوجه نحو اللامركزية وفرض ديموقراطية أكثر داخل المؤسسة.
بس المفروض إنه هاي الصلاحية تستخدم بالحق مش بناءً على مزاجي الشخصي!
قال ديموقراطية قال! ومالها الديكتاتورية؟ هي الأنسب هيك أشكال..

المهم إنها رفضت وبشدة تتراجع على مبدأ (أنا ربكم الأعلى) وأخذتها العزّة بالإثم و(لا إريكم إلاّ ما أرى)، وطبعاً أنا ساعتها ركبتني التياسة!
وشهر كامل رفضت التنفيذ... وهي طستني إستجواب وأنا شكيتها للي أعلى منها، وكدت... نعم... كدت أكسب الحرب... لإني لقيت إثنين من اللي بيفهموا بالقانون أيدوا كلامي وإنه تصرفها غير قانوني.. وبعد يومين تراجعوا عن كل اللي حكوه واعتذرولي بإنهم كانوا فاهمين الموضوع غلط ووو... طبعاً كله حكي فاضي.. لإنها طلعت صحبة مع اللي أعلى منها وبينها وبينهم مصالح متبادلة وعلى قولت (شيلني بشيلك).

وانتهت الحرب بإني نفذت التكليف غصبن عني.. لا.. وحصلت على عقوبة التنبيه!

للأمانة هاي ما كانت العقوبة الأولى في حياتي المهنية المتواضعة والبالغة ستة سنين ونص، سبق وحصلت على (لفت نظر عدد 4 ) و (تنبيه عدد 2 ) و (خصم ليوم واحد). 
وإن شاء الله في الستة سنين ونص الجايين راح أكمل الكوليكشن تبعت العقوبات وآخذ إنذار وحسم.. صبركوا علي..

والمسألة والله مش إني مثالية وقانونية زيادة عن اللزوم وتاعت مبادئ، لا والله، أنا أصلاً أبعد ما أكون عن المثالية، ومبادئي ثلثها بعته والثلث الثاني ما عدت أآمن فيه والثلث الأخير خليته بس للحلال والحرام علشان ما أروح جهنم ( هاي المبادئ تاعت لا تسرق لا تكذب... بتعرفوها الخطايا السبع)... 

بس إشي ومنه! ناس بتشتغل زي الحمير وناس قاعدة... وهيك عيني عينك!

بس أنا ما خليتها تفرح وتستلذ بالإنتصار.. ولما نادوني لأستلم العقوبة وأوقع عليها.. ضحكت وبصوت عالي وحكيتلهم "عاااادي، حطوها جنب إخواتها فيه منها كثير...هههه".
وبعدين صرت أمشي من جنبها ولاااا كإنها موجودة وما أتعامل معها أبداً ولو فيه أي شي بدي أمرره عليها ببعته مع الأذنة بس ما بدخل مكتبها أبداً ولا بسمحلها تستغل أي فرصة لتذلني أو تسمعني كلمة...
هي إنغاظت بشدّة ووصلني على ألسن الفسّادين إنها راح تنقلني.. فحكيتلهم.. "عااااادي أنا موظفة في خدمة المؤسسة وين ما رحت راح أعمل المطلوب بكل نفس طيبة..."
طبعاً أنا توقعت النقل من كمن شهر بس شكلهم ما لقيوا شاغر ليرموني عليه لسه... وبس يصير معي إشي بخبركم أكيد...

في النهاية بدعي ربنا إنه ما يسخطني وأصير مديرة يوم من الأيام، وخليني موظفة بائسة بالدرجة السادسة، لحتى ما تصيبني (لعنة الأنا) تاعت المدراء، ولحتى ما تصيبني دعاوي الموظفين، لإنا بندعي عليهم ليلاً نهاراً، سراً وجهاراً، ومرات بستغرب كيف هالمدراء بيوصلوا على بيوتهم كل يوم سالمين؟ 


هناك 17 تعليقًا:

  1. الله يعينك على اللي بتشوفيه بيومك

    بنت خالي برضه بتعاني تقريبا من نفس قصصك و كل اول سنة لازم يكون في شكوى و متابعه شكوى في ردهات الوزاره :) و سجلها حافل ما شاء الله بس هي اكيد سابقتك بالتجميع لانها خبرة 13 سنه :)

    حقك ولازم تطالبي فيه وما حد برضى بالظلم وتأكدي ان اخرتها راح تيجي و انت مظلومه وربنا ما بتضيع عنده الحقوق

    مش عارفه هو الكل نفوسهم بتتغير بس يقعدو على هالكرسي ويلا الكرسي اله تأثير سحري عليهم ...يمكن بظهر اسؤ ما فيهم!!! مش عارفه

    ردحذف
  2. صباح الخير

    اول ملاحظه:
    تنبيه عدد 2
    لفت نظر عدد 4
    حسم يوم راتب
    في ست سنوات ونص:)....كتييير

    تاني ملاحظه:
    لعنة الكراسي...
    سبحان الله!!!!
    يبدو ان عقدة التسلط موجوده فينا...واول ما يصحلنا فرصه لن نقصر في استعراض عضلاتنا وممارسة سلطاتنا

    مش قادره اطلع من هون بدون ما ادعيلك:)
    بس مش عارفه ادعيلك ربنا يستجيب لك ووما تصيري مديره متسلطه
    أو
    ان شاء الله بتصيري مديره بدون ما تصيبك لعنة الكرسي
    "
    "
    التانيه ....قولي آآآآميييين

    ردحذف
  3. ههههه
    جد ضحكتيني ع هالصبح
    لانه باجي عادة قبل مديري ف بحكي اليوم الله لا يجيبه و ارتاح منه ان شالله
    بعدين حكيت استغفر الله لانه جد بكره ادعي عليهم لانه بحس حالي حقودة و ما بدي اكون هيك

    هو بصراحة الي بصير مدير بصير هيك مزبوط و بجوز بدون ما يشعر او بشعر و بطنش انه بظلم موظفينه

    بتعرفي لمجرد علق انه اخدتي اجازة او ابسر شو بكون ارتكب ذنب بحق موظفيه فما بالك لمن جد يكون ظالم بنفسه
    الله يعينا عليهم و انت كمان مصيبتك انه بنت يعني ممكن تفلت اعصابك عليها باي لحظة و ما تعدي للعشرة لو كان ميل(رجل يعني)

    الشغل اله سيئات كتير و والها باعتقدي وجود مدير متسلط عليكي و الله يريحنا من اشكالهم
    يييه رجعت دعيت
    ههههههه

    ردحذف
  4. خربتي علينا بالفقرة الأخيرة!

    كنت بدي أحكي إن مديرتك كانت زيك أصلا ً و بعدين لما لا حت الفرصة بلشت تفرّغ :]]]]

    ---
    نيجي لشوية الجد:
    الحال من بعضه
    قطاع عام و اللا خاص
    كلهم إلا من رحم ربي بيفكر إنو هوه كل شي بالقسم/الدائرة/ ... و الكلمة تبعتو ما بتصير ثنتين
    للأسف لأنو ما فيه صلاحيات واضحة و محدّدة فالتعسف سهل!

    أنا بكل شغل اشتغلتو طلعت بطوشة! اللهمّ إلا أول وظيفة و اللي أصلا ً كانت أثناء الدراسة و وضعها سهل نسبيا ً ، مع إنو حتى بوقتها كان فيه جنون عظمة متفشّ هنا و هناك!

    استشارة مع عالنوعيات ما بيزبط ... لااااازم اقتلاع! جذري

    ردحذف
  5. كنت مرشح لمنصب مدير ...!!!!!
    خلاص رجعت فى كلامى وأرفض أن أكون مديراً...

    تقبلى مرورى وتقديرى واحترامى

    ردحذف
  6. قصدك كيف بنامو بالليل و بالهم مطمئن و نفسيتهم ذهب!

    بس على فكرة المدراء ما بيجوا الا بالعين الحمرا يعني اعمل معهم تطش او اثنين بعديها لما بدهم يلبسوا حدا بشغل زيادة بصيروا يفكروا مرتين قبل ما يلبسوا الك !

    لفت و تنبيه و حسم !!! ما شاء الله بس عنا المشكلة الحسم بيجي اسبوع مش يوم!!

    ردحذف
  7. ويسبر:
    خبرت بنت خالك ضعف خبرتي أكيد تجميعها أعلى :) و الظاهر إنه الحال من بعضه عند الكل.. وما ضاع حق وراءه مطالب وحتى لو انتظرنا يوم الحساب بيكون أحسن لإنه عدالة ربنا أفضل..
    أنا بآمن إنه فيه لعنة سحرية بتطالهم بس يقعدوا عالكراسي لإنه كثير منهم بيبدوا ولا أحسن منهم وبعدين بيتصرفوا زي اللي قبلهم..
    مساءك سعيد..


    نيسان:
    بالنسبة للعقوبات فا مش كثير ، فيه ناس ملفاتهم بتنوزن بالكيلو:))) ولازم تكوني هيك مشاكسة وتتحملي وزر العقوبة ولا بياكلوك بدون ملح صدقيني...
    راح أحكي زيك آمين بس لحتى ربنا يختارلي الأفضل.. ويبعد عني لعنة الكراسي والتسلط بدون مبرر..
    مسائك سعيد..

    ردحذف
  8. غير معرف:
    شكرا لمرورك.. وكلنا الظاهر بالهوا سوا
    سعيدة بتعليقك امعبر اللي بيفصل كل اللي كنت بحكيه بين السطور..
    تحياتي :)


    هيثم:
    علشان هيك أنا دعيت عمري ما أصير مديرة.. لإني عارفة أنا الماضي تبعها وهي المستقبل تبعي بالتأكيد :))
    يعني طلعت مشاغب وبتعمل طوش :)

    أسوأ شيء هو التعليمات غير الواضحة والصلاحيات المفتوحة عالغارب وهم ما بيستغلوا الفرصة أبدا...

    بس كلامك مزبوط استشارة ما بينفع اقتلاع أو احتراق (هاي كبيرة شوي) بس مرات بيجي عبالي والله..
    مساءك سعيد

    ردحذف
  9. محمد الجراحي:
    أهلا وسهلا بك ونتشرف بمرورك والله.. وتفضل بزيارتنا دائما..
    أما بالنسبة لمنصب المدير فنحن بحاجة له بالتأكيد لكن إوعدنا إن صرت تحاول تكون منطقي وعادل وتشتغل وإنت واقف علشان ما تطولك لعنة الكرسي..
    مساءك سعيد :)


    د. وحل:
    كيف بيناموا؟ ومين قالك إنه بيخطر على بال أي واحد منهم أصلا إنه عامل إشي غلط؟
    بس معك حق المعزرين ما حدا بيقربلهم واللي بيشتغلوا عالساكت (زي ما كنت بس هسه بطلت) الكل مستلبسهم!!

    بالنسبة للحسم، أنا كتبت بالبوست (خصم) ليوم مش (حسم) - لإنه الخصم يقاس بوحدة اليوم والحسم يقاس بوحدة الأسابيع والشهور - بس بتأمل بالمستقبل إني أرتقي لمستوى الحسم :)
    مساءك سعيد..

    ردحذف
  10. برضه الحرق ممتاز!

    :-]

    أنا مشاغب لأنو معظم شغلي قبل التدريس كان إنو بتقنين التعليمات غير الواضحة والصلاحيات المفتوحة ! "إدارة الموارد البشرية" بس كله كذب * كذب! ما حدا بدو هالشي

    ردحذف
  11. السلام عليكم كيالة
    اخبارك ايه
    مديرة اية بس اللى تعباك دى
    انتى اقوى من كدا كتير
    سيبيها تعمل اللى عوزاها واعملى شغلك
    وربنا ع المفترى
    كلامك فيه كتير من مجتمعاتنا ما هو للاسف كتير من اللى بيكون لهم سلطة بيفتكروا انهم كدا اعلى من الرقابة وانهم بايدهم يعملوا ما بدهم

    ردحذف
  12. هيثم:
    خلص المرة الجاية ما بشكي لا أبدا.. بولع فيها طوالي :)
    إدارة موارد بشرية؟ بس إنت اللي حكيتها كله كذب بكذب!
    مساءك سعيد :)



    مدونة رحلة حياة:
    كيف الحال؟ شكرا على الكلمات التشجيعية اللطيفة :)
    أنا والله دايما بحكي نفس هالكلام.. بنعمل اللي علينا والمعاملة والأجر عند رب العالمين..
    وما فيه أعلى من رب العالمين بالآخر بيجازيهم باللي بيستاهلوه..
    مساءك سعيد...

    ردحذف
  13. ومبادئي ثلثها بعته والثلث الثاني ما عدت أآمن فيه والثلث الأخير خليته بس للحلال والحرام علشان ما أروح جهنم ( هاي المبادئ تاعت لا تسرق لا تكذب... بتعرفوها الخطايا السبع)...

    7ashashet 3laiha hay LOOOOOOOOOOOOOL
    3n jd el modara betal3o el wa7d min deeno
    allah y3eenek bs

    ya allah bdeesh atla3 3al sho'3ol wel 7iah el 7qeeqeieh w absar sho
    :(

    ردحذف
  14. المشكله الأزليه، الرئيس والمرؤووس
    بس تعرفي اشي، لما الواحد يصير في موضع سلطة ولو بسيطه يتختلف امور كتيره

    الله يعينك ويصبرك

    ردحذف
  15. رين :
    يا حبيبتي شكرا عالدعوات.. آاااه راح تطلعي عالحياة العملية غصب فالله يعينك ويصبرك مسبقا :)
    دمت بخير

    مياسي:
    أكيد لما يوصلوا الكراسي ولو كانت بسيطة بيتغيروا زي ما حكت ويسبر (إله تأثير سحري عليهم)!!!
    مسائك سعيد

    ردحذف
  16. كيــالتي :
    والله أنا عم بقرأ وعم أتعلم (: لأنو لسا أنا أسير في ركب العطالة والبطالة! بعدي تحت قاعدة" أكل ومرعى وقلة صنعة" !!
    بس قوية يابنت !! عجبني ردك بصراحة(:
    وان شاءالله تظلي قوية..
    ::
    هي الثلث اللي علشان ماتروحي جهنم ديريلي بالك عليه منيح الله يرضى عليك , ما نحنا اتفقنا انو راح ندور على بعض في الجنة ان شاءالله ^_^
    ::
    ولكن يبقى السؤال الأزلي:
    ما هو السر بين الكرسي ومؤخرة من يمتلك سلطة ما ؟!
    الله يوفقك يارب..
    كــل الود..

    ردحذف
  17. Bullet :
    تسلميلي يا رب.. وما تخافي علي راح أحاول أحافظ على شوية المبادئ اللي ضلوا.. وعقبال ما تنالي الوظيفة العظيمة وتكتبيلنا عن نهفاتك مع مدرائك :)
    أما العلاقة بين الكرسي والمؤخرة فالظاهر فيه لاصق سحري بيشفط المؤخرة عالكرسي شفط للواحد يلتصق بقوة ويرتاح كل هالراحة!!!
    دمت بود

    ردحذف