27‏/11‏/2010

الله يعين الخرج !

محمد بالعادة واحد كشر ونكد، ومنظره عالصبح بيقطع الخميرة من العجينة، واليوم بالذات كانت ملامح وجهه كفيلة بإنها تمحي أي أمل متبقي عند الناس بالعالم, أو حتى إنها تهدّ الجبال! وجهه أسود وبوزه شاحط عالأرض وعيونه ضيقة وزي اللي بده نكشه عشان ينزل فيك ضرب.
 طبعاً بما أني صاحبه بالشغل ومكتبي جنب مكتبه، لازم أسأله عن حاله وعن السبب لكل هالملامح على هالصبح، وراح تتفاجؤوا إنه صاحبي محمد عنده دايما مبررات منطقية ومقنعة.

بديت بالجملة الاعتيادية اللي ببدا فيها دايماً:

- يا فتّاح يا عليم، خير مالك على هالصبح؟

- يا زلمة عف عني مش ناقصك إنت كمان.

- لا بالله عليك تحكيلي، يمكن أعرف أهونها عليك، يالله فضفض شوي.

- طيب. خذ يا سيدي.
  مبارح رجعت تعبان كالعادة من الشغل وبس أكلت، حطيت راسي عالمخدة بس لأرتاح شوي، 5 دقايق وبتصل أبوي بده أوصله على بيت أجر لواحد من القرايب. طيب يابا هسه أنا راجع من الشغل.. اتصل بواحد ثاني من إخوتي.. شوف جمال شوف أسامه.. طلعوا كلهم سبحان الله مشغولين! ما هم إخوتي هيك دايماً ما إلهم علاقة وبتطلع براسي..

- معلش يا أخي، بعدين بيظل أبوك.. أجر وثواب بتكسبه بهالختيار.
   
- ما أنا هيك حكيت لحالي وفعلا قمت بدي أطلع وتمسكني مرتي، وعلى قولها إنت بس شاطر تروح تجري لما أبوك بده إشي وأنا إلي أسبوع بترجاك تصلح كيزر الكهربا ومش راد علي، وصارت تصرخ وسمّعت كل الحارة، فحلفتلها يمين غير يتصلح اليوم بس تسكت.

- وبعدين؟

- ولا شي وصلت أبوي ورجعته ورحت أدوّر عالكهربجي، ولا أنا كهربجي وبرضى آجي، قال هو الثاني تعبان وخلص دوامه! حلفتله غير آخذه وأجيبه بالسيارة وأعطيه اللي بده إياه ترضي ييجي، وهو الثاني ما كذّب خبر قصني بالأجرة الله لا يوفقه! بس شو بده الواحد يحكي؟

- يا سيدي مش مهم، المهم المرة حلّت عنك.

- يا ريت! بس رجعت حكت لي لسه ظايل وقت بالنهار خلينا نروح عالمؤسسة نشتري أغراض، حكيتلها يالـلا ما هي خربانه خربانه! ويا حزرك شو صار معي بالمؤسسة؟

- شو؟

- اشترينا الأغراض وصفينا بالدور زينا زي هالناس وييجيلك واحد بدحش حاله قدامي: معلش معلش يا خوي معي بس غرضين خليني أحاسب قبلك! بالله عليك شفت زي هيك وقاحة؟

- آه وشو عملت؟

- كان نفسي أرقعه كف أجيب أجله، بس أكتفيت بإني أصرخ وأسب وما خليتله ليبعد من قدامي وهو الثاني ما وفّرني بس بالآخر رجع صف بآخر الدّور. بس ما كانت هاي هي المأساة الحقيقية !

- كمان؟

- كنت صافف سيارتي في موقف بالأجرة برّا المؤسسة وبس جيت أحاسب العامل قال بده ربع ليرة زيادة على الأجرة.. بسأله ليش؟.. حكالي غلاء محروقات.. أي شو دخل المحروقات بالإصطفاف؟ هي السيارة بتصرف وهي واقفة؟ بالله عليك أهبل هاظ ولا بستهبل؟

- هههههههه، لا هيك ولا هيك، بس حب يتشاطر عليك شوي، وأكيد راح يحط الربع بجيبته.

- يتشاطر على مين؟ أنا رميتله الأجرة بوجهه زي ما هي وظليت طالع من المكان.

- طوّل بالك يا زلمة، ما هي الدنيا هيك. لازم تصبر على هالبشر وتطنّش. وعلى رأي المثل " حطّ بالخرج حطّ ".

- أي الله يعينه هالخرج شو بده يتحمّل ليتحمّل؟ أي والله لو كان شوال لكان انفزر!
 لا وهاي لسه أحداث مبارح لسه كان لازم يكون في للنكد تكميله اليوم !   

- خير؟ كمان؟

- آخ بس آخ.. أنا مستأجر للولاد باص ميكرو ليوصلهم للمدرسه كل يوم. واليوم أول الشهر و زي ما بتعرف ظايل على دوام المدارس بس أسبوع وبخلص الفصل الدراسي، فحكيت بالمرّة بحاسب السواق مقدما عن هالأسبوع وبنخلص. وإذا بإبن الحلال مش عاجبه الحكي وبدّه أجرة شهر كامل مش أجرة لأسبوع. قال هو متفق معي على شهرية وما دخله إذا المدارس ظايللها أسبوع ولا عشرة!

- آه .. وإنشاء الله أعطيته؟

- ما يحلم أعطيه.. حكيتله روّح أنا راح أوصّل ولادي هالأسبوع.. ولسه بتحكيلي حط بالخرج ؟

- والله ما بعرف شو بدي أحكيلك؟ المعاملة مع الله.. حسبي الله ونعم الوكيل في هالناس..

- على قولتك.. هو أصلا لولا أنا مآمن إنه في رب لهالناس ومآمن بإنه فيه عدالة عند ربنا بالآخرة كان زمان رميت حالي من البلكونه... ولساتني صابر وبداري.. بداري أبوي وأخوي ومرتي ومديري وصاحب الدكانة ..

- خلص إفردها هالكشرة وهسه بعملك فنجان قهوة على كيفك مع سيجارتين وبينعدل مزاجك.



هناك 17 تعليقًا:

  1. آنسه كياله

    صدقا الأمور التي تحدثت بها على لسان ذلك الرجل تمثل وبدقة متناهية الواقع المرير الذي يمارس من قبل العديد من الاشخاص والتي يمكن تلخيصها بكلمتين(( استغلال الموقف )) وبالفعل يندرج تحتها مايحدث حاليا في مجتمعنا سواء في محلات المواد التموينية أو في وسائل النقل أو المطاعم ... الخ ولكن يبقى السؤال الذي يطرح نفسه من المسؤول عن هذه الآفه التي انتشرت بتلك الطريقة الفظيعه ؟؟؟ وهنا أتحفظ عن الاجابة ولكن سأقول لك كلما اتسعت رقعة الفقر فالقادم أسوأ .

    كل الود ودام ابداع قلمك الذي لطالما أعجبني

    ردحذف
  2. مع"ؤ"ووووول مع"ؤ"ووووول في ناس هيك ،،، لااااااااااااااااااء
    لوول

    مبدعة و الله
    تشخيص دقيق ليومنا

    *اعمل خير و زت بالبحر ،،، الله يعين هالبحر بس!

    ردحذف
  3. And u want him to smile
    how come
    A gr8 post
    I really liked it
    It represents real life these days

    ردحذف
  4. حسب ما سمعت انهم ناويين يسحبو الخرج من كل مواطن و يستبدلوه بخرج اكبر لانه الخرج القديم بطل يستوعب اكتر من هيك و حسو ان المواطن ممكن يبدا "يفرّغ" لهيك نوو يعطو كل شخص خرج حسب عدد افراد العائله و عدد الاصدقاء, بحيث انه حيتناسب طردي مع عدد افراد الاسره و عكسي مع عدد الاصدقاء :)

    الله يخليكي لا تنسو تحسبو حسابي بالخرج الجديد و بالنسبه للقديم لا يخافو هيو معي ومليان كمان :)

    مسائك فل و عنبر وهاتي فنجانين القهوه و مسامحه بالسيجاره :)

    ردحذف
  5. انا بتهلل اساريري بس اقرألك هلأ
    تهلهلت وتهدمت ...

    والله الحياة هيك مباطحة .. من اوله لاخرها ..

    بس قمة المأساه ... نكد بالبيت و الشغل و العيلة هاي ثلاثي الدمار ...

    الله يعين الي بوقع ضحية الاضلاع الثلاثة ... ضغط وسكري و زلال و شحوم ثلاثية وموت مبكر وشلشل اطفال ...

    ردحذف
  6. أشرف:
    (إستغلال الموقف) أو (شطارة) هيك فيه ناس بتسميها وفعلا صارت ظاهرة وآفة.
    السبب أو المسؤول؟
    بصراحة ما عندي إجابة. الفقر دايما موجود بس نفسيات الناس كانت زمان أحسن. يمكن التربية مختلفة والأخلاق شبه معدومة عند البعض ومخافة الله مش واردة عند البعض.
    شكرا لمرورك وبيشرفني إعجابك بقصصي.
    يومك سعيد


    هيثم الشيشاني:
    لوووووووووووول يا زلمة شايف بالله؟ فيه هيك؟ صحيح إني ببالغ!
    يمكن هاي أحد أسباب تلوث المحيطات وموت الكائنات الحية وتعرضها للإنقراض :)
    يومك سعيد


    طارق:
    شايف! وبيلوموا الشعب الأردني وبيحكوا عنه نكد وكشر! مش بإيدنا :)
    هالمشاهد يومية بحياتنا ولسه بنشوف أحيانا أسوأ من هيك.
    بيشرفني مرورك وبيسعدني إنه البوست نال إعجابك :)

    ردحذف
  7. ويسبر:
    أنا سمعت عنه هاد الخرج الجديد وسمعت إنه مطاطي كمان :)
    بالنسبة إلي من زمان رميت الخرج وبعبّي بشوالات :)
    بس أول ما ينزل الخرج الجديد رسمي راح أهديك واحد أكيد.
    يسعد مساك يا قمر وإنشاء الله قريبا - بس تمسكي شغل وتنزلي إجازة سنوية - بنجتمع أنا وإنت على فنجانين قهوة وبدون سيجارتين.


    final way:
    يا سيدي أحلى خبرية إنك تهللت :)
    بس ما تتهدم عادي :)
    النكد الثلاثي جزء من العروبة وبدونه إنت مش مواطن عربي أصيل.
    النكد والمباطحة- على فكرة عجبتني جدا-زي الهوا والمي ما فيه عربي بعيش من دونهن :)
    يومك سعيد.

    ردحذف
  8. هو انا من زمان نفسي اتعرف على الخرج اللي كل شوي بيحكوا عنه!!!!!
    ولهلا ما عرفته
    بس اللي بعرفو انه اللي بحط بالخرج كتير بيعيش بالآخر مع الضغط والسكري...واذا حظه حلو...بينجلط والله يرحمه
    وبيرتاح هو ...و بيريحهم منو ومن خرجو

    ردحذف
  9. نيسان:

    طيب ما بتعرفي الخرج وين بالزبط بتخزني كل طاقاتك السلبية والغيظ والقهر؟؟

    هو إنت يمكن مش عارفه الخرج لإنه من زماااان انجلط ودفناه قد ما انحط فيه.

    مساءك سعيد

    ردحذف
  10. مين قال انه عندي طاقات سلبيه وغيظ وقهر؟!!!!!
    و لابعرفهم هدول هههههههههههه

    يا ستي انا خرجي انفرط من زمان وبيهرّب أولا بأول
    اللي بيضايقني بواجهه فورا والحمدلله ربنا انعم علي بنعمة النسيان ,,,يعني مجرد ما احكي اللي بقلبي برتاح ...المهم اني احكي وما اكبت مشاعري
    وبعديها بقول حسبي الله ونعم الوكيل وبكمل حيااااااااتي

    ردحذف
  11. يسلمو إديكي ع الوصف الدقيق لمعظم أحداث حياتنا

    أو خليني اخصصها شوي
    حياتي,,
    بس مع ذلك أنا مبتسمه في معظم الحالات
    :)

    صباح الخير يارب....

    ردحذف
  12. إعلانان "شبه" هاميْن

    1. أنا بلغت عنك لجنة حماية المحيطات العالمية
    2. عنا خدمة ترقيع الخرج - كفاءة و سرعة
    cc: نيسان خانوم
    :P

    ردحذف
  13. نيسان:
    أبدا ما بتعرفيهم؟؟
    يا ستي بهنيك على هالنفسية ونيالك على النسيان. المشكلة أنا ما بنسى بسهولة!!
    ((حسبي الله ونعم الوكيل)) أحسن جملة تحكيها على الأقل بتضمني انه راح ينصفك بالنهاية .
    مساءك سعيد


    أم عمر:
    الله يسلمك:)
    هاد يومك ويومنا كلنا :)
    ابتسمي وما تنهمي ما حدن بستاهل تشغلي فكرك فيه اصلا.
    مساءك سعيد


    هيثم:
    أنا ما دخلني إنت اللي بترمي بالبحر !!!
    أنا من الأول حكيت إني بعبي بشوالات :)

    أما نيسان مش فارق معها إذا الخرج انفرط عاااااادي بتنسى وبتستمر بحياتها :)

    ردحذف
  14. Normally I don't believe in luck and also elly be5af min el bo3bo3 betla3lo


    bs fi nas js msa5ma6eeen!
    0_O

    ردحذف
  15. الحاجة للحفاظ على اختبار بلدي بلوق. لا تعمل كما أريد لها حتى الان. تشك لهذا الموضوع. ربما هذا سيحصل الألغام لتبدو أفضل.

    ردحذف
  16. rain:
    أنا شايف هالأيام إنه كل الناس مسخمطين يعني مش حالات خاصة..
    يمكن مش مسألة حظ بس التعامل مع الناس صاير متعب وبده طولة بال وصبر.
    مساءك سعيد

    ردحذف
  17. أردت فقط أن أدلي بتعليق سريع لأقول أنا سعيد لاني وجدت بلوق الخاص بك. شكرا

    ردحذف