06‏/12‏/2010

مشاهد يومية

الرأي... والرأي الآخر:

خلال زيارة نسائية خاصة ضمّت الصديقات والزميلات تحدثت إحدى الزميلات عن مدى المعزّة التي تكنها لكلا والديها المتوفيين، وأوضحت أن فقد الأم أصعب بكثير من فقد الأب. أيّدتها بشدّة زميلة أخرى فقدت والدتها مؤخراً، زميلة ثالثة تقطع الحوار: " لا والله ... والله فقد  الأب أصعب بكثير... أنا أبوي بيعز علي كثير". طبعا رافق العبارة هز الرأس يمنة ويسرة مع ارتفاع الصوت ووجه أحمر واستهجان لكلام البقية  لتتدخل واحدة رابعة " والله بعد الأب ما فيه.. أبوكي هو سندك.. بوجود أبوكي ما حدا بستجري يكلمك .." . طبعاً مع عصبية واضحة.
وتفاقم الحوار .. أبوي ... أمي ... أبوكي ... وكل واحدة بتعلي صوتها أكثر وبتهز برأسها وكأنه النصر إلها، وصار الموضوع وكأنه حلقة من حلقات برامج قناة جزيرة.

طيب وين المشكلة؟
كل إنسان حر بوجهة نظره ومش بالضرورة رأيه خاطئ، فلانة قريبة من أمها أكثر وفلانة تأثرت أكثر مع غياب الأب، وكل إنسان وظروفه ! ثقافة الرأي الآخر شبه معدومة عنّا، يعني يا إنت معي يا إنت ما بتفهم!


بَحْلَقَ... يُبَحْلِقُ ... بَحْلَقَةً:

تفحّص الناس من أعلى الرأس حتى أخمص القدمين ظاهرة واضحة وبشدة بين الناس وما إلها أي سبب مبرر.
إذا دخلت وسيلة نقل عمومية ( باص مثلا ) فكل الموجودين بيبحلقوا فيك وبيتفحصوك من لحظة ما تدخل الباص وانت بتمشي بالممر لحد ما تقعد عالكرسي. وإذا دخلت تكسي فالسائق بيركز نظره بشدة في المرآة ليتفحص الراكب دقيقة أو دقيقين قبل ما يسألك: " على وين يا معلم ؟ "
في السوبرماركت الموظفين بيتفحصوك وإنت بتختار الأغراض، والناس اللي جنبك عند نفس الرف كمان بيشاركوا في المراقبة.
أمام الصراف الآلي لو كان في عدة أشخاص حولك بيحاولوا كلهم يدخلوا روسهم في الشاشة ليتعرفوا على رصيدك وكم راح تسحب فلوس؟ 
وما بننسى الناس الماشية بالشارع واللي قاعدة على طرف الرصيف واللي مهمتها بس البحلقة في اللي رايح واللي جاي.

ما حدا منهم سمع بعبارة (mind in your own business) !
بلاش بالإنجليزي! لتحكوا ما بنعرف لغات.
عبارة عربية إسلامية ( غض البصر ) ما حدا سمع عنها؟ لو كل واحد منّا حب يطبقها فراح يشوف قدّامه بس وراح يتخلّص من سوسة البحلقة في البشر.


عزبـــاء:

يوميا اتهم من قبل الناس في الشغل بإني فاضية أشغال وما وراي إشي.. ليش؟  " لأنني عزباء ".
من وجهة نظرهم فقط اللي عنده بيت و زوج وأولاد هو صاحب مسؤولية، وغير هيك إنت ما بتعمل إشي، وطبعا هم بيستغلوا هاي النقطة أبشع استغلال خاصة لما يكون فيه شغل إضافي أو طلعة برّة الشغل مثلا أو دورات بعد الدوام الرسمي لازم تتمرّر علي أنا أولاً لإني ما بعمل إشي !
مع احترامي لجميع المتزوجين والمتزوجات وأرباب الأسر فهذا الكلام غير صحيح أبداً، وأنا عندي مسؤوليات بتكفيني وبتفيض عنة حاجتي ببساطة لإني أنا كمان من أرباب الأسر!

وفاة والدي وكبر سن والدتي خلتني أتحمل مسؤوليات مثلي مثل أي شخص، فمثلا أنا مسؤولة عن كافة الأعمال المنزلية من الألف إلى الياء، وأنا بدفع فواتير الكهرباء والتلفون وبصف دور وبتزاحم مع الناس، شراء الخضار وأغراض البيت من مهمات الوالدة لكن مرات كثير أنا بأدي هالمهمة إذا الوالدة تعبانة أو مشغولة...
غير إنه بيتنا هو بيت العيلة واللي بيتحول في نهاية الأسبوع والعطل الرسمية والصيفية إلى منتزه قومي، وكل العيلة بدها تستجم فوق راسي...
وما تخلوني أبدا حكي عن يوم الأربعاء... يوم دورة المي ...
لازم اتفقد بير المي واشغل الموتور وأعبي خزان المي البارد والساخن... ويا ويلي إذا الموتور ما رضي يشتغل.. بفتحه وبزيّت المروحة، أو يمكن الموتور معبّي هوا، فبوقف جنبه ساعة وأنا بعبيه بالمي علشان يشتغل..
- طبعا بس اللي بيعاني من المي و موتورات المي بفهم عن شو عم بحكي - وغير هيك كتير وبلا وجعة راس...

باختصار، كل واحد منا عنده ظروفه ومسؤولياته، بس ما بعرف ليش دايماً بنحب نشوف حالنا إحنا بس اللي بنتعب وبنشتغل وما حدا من الناس عنده هم أكبر من همنا، يمكن إحنا بطبعنا ناس معقدين ونكديين، أو ببساطة إحنا عالم ما بنحب نشتغل فعشان هيك بنبالغ في تعقيد ظروفنا علشان نرمي شوي من مسؤولياتنا لغيرنا.

   

هناك 16 تعليقًا:

  1. اول شي بصراحة الله يعطيك العافية،

    انت لخصت بادراجك الطبيعة البشرية ، احنا ناس ماشيين على مبدأ "اللهم نفسي" المهم انا اكون مبسوط و ما ألي بغيري ان شاء الله ادعس عليهم ، فاذا انا كنت مشغول معناتها كل الناس فاضية اشغال ، و اذا انا كنت صح معناتها كل الناس خطأ

    الله كريم

    ردحذف
  2. الله يقويكي يارب

    أنا عندي قاعده,, إنه مش بالضروره تكون قناعاتي تنطبق على كل الناس,, مش كل الناس مجربه اللي إنا شفته,, ولا بتقدر تحب شخص بنفس مقدار محبتي إله,, إم,, أب,, خال ,, خاله
    وكإنه نقاش غلاوة الأم والأب مابنتهى,,

    بحلقي,, بحلقي,, شو رأيك أعطيكي جاكيتي تشوطي عليه,, هاد اللي بدور ف راسي لمى حدن يسرح فيني وكإنه شايفني جايه من المريخ

    الله يعطيكي ألف ,, ألف عافيه,, طلعتي ربة بيت أكتر مني,,
    الناس اللي حوليكي إستغلاليين,, وحتى لو إتزوجتي,, رح يحكولك بعدك عروس,,وماعندك بيبي,, وبعديها,, بعده عندك بس بيبي
    يعني,, إش ما كان وضعك رح بيلاقو فيه نقطه ضعف يستغلوكي ويطعنوكي فيه

    الله يعينك عليهم

    وصباحك مبلول وريحته متل ريحت الجو الحلو..

    ردحذف
  3. يعطيك مليون عافية يا كيكي

    و الله إنك معك حق بس مجتمع أمراض، شو نعمل! الواحد بيسكت بس مرات كثير بيصير بدو بيطق!

    رقم 1 : أدب الاختلاف معدوم .. أصلا ً الأدب كله متلاشي و يؤول إلى الصفر!

    رقم2: همّ بس الناس بيحبوا يتطمنوا "زيادة" على بعض ... مو أكثر! :(

    رقم3: "السطر الأول من تعليقي" :))

    + شغلة ماتور المي .... آآآآآآآآآآآآآآآآآآآآآآآآآآآآآآآآآآآآآآآآآآآآآآآخ بس :(

    ردحذف
  4. صباح الخير كيكي

    في الحاله الاولى ....صعب كتير تلاقي ثقافة الرأي الآخر خصوصا في جلسات النسوان....وبالاخص فيما يتعلق بالمواضيع المصيريه كطرق الطبخ مثلاً فما بالك بالمواضيع التانيه

    البحلقه...تسالي وتمضية وقت

    النقطه الثالثه...يطول في عمر الوالده و الله يعطيكِ العافيه
    كثير منا لا يدرك ان الفتاة في بيت اهلها تتحمل مسؤوليات كالمتزوجه لانه البيت بيت ,,,,بده شغل وخدمه ومتابعه وخصوصا بيت العائله بس وين اختك الصغيره؟ويلا عشان هي أصغر منك...بتهرب وتعودت ان انتي القائمه بالمهام كلها

    ردحذف
  5. مرحبا : اعجبني موضوعك كتير بخصوص البحلقة .. هاد الشي مزعج و ما بخلي حدا ياخد راحتو حتى بالمطاعم(بدي احكيلهم بالله تيجو تقعدو معنا ) او السوق وحتى بالمكتب و بشاشة الكمبيوتر يا سلام بكونو بدهم يدخلو بالشاشة ..

    و يعطيكي العافية و يقويكي و يعطي الصحة و العمر للوالدة .

    ردحذف
  6. ma azkaki
    allah y3teeky alf 3afieh ya rab

    el mshkleh bil nehaieh hdool el nas elly be2olo ino wrahom ms2ooleiiat l2eno 3endhom wlad bekono rameenhom 3al net wella 3al xbox 6ool el nhar

    w 3n jd I was talking about that the other day...the people who think they MUST change my mind because I disagree with them
    ishy bejlo6 jd

    ردحذف
  7. Ya3teky el 3afieh
    I liked the post because it's so real
    u r right but we have nothing to do regarding ppl's behaviour they became unbelieveable everywhere
    God help us

    ردحذف
  8. بالنسبة للتالته ذكرتيني بحالي
    بحس حالي معزّب من كتر المسؤوليات وجد عفت حالي منها

    الله يعينك عارفه شعور الشنططه!

    ردحذف
  9. 1) احنا للأسف ما تعلمنا انه ممكن رأيين يكونوا صح. والأسوء طبعا انه ما في حد بيعترف انه غلط
    2) اذا بتسمحيلي اعمل تعديل على الجمله التاليه باضافة "في الأردن"
    "تفحّص الناس من أعلى الرأس حتى أخمص القدمين ظاهرة واضحة وبشدة بين الناس __________" الظاهره هاي قد تكون موجوده بمجتمعات ثانيه بس بالأردن الناس بتتطلع بوقاحه وكأنه مش عامل اشي غلط
    3) موضوع العزوبيه كثير حاب اكتب عنه بس دايما بأجله مش عارف ليش. الناس بتنظر للرجل الأعزب نظرة استهجان دائما دون ما تقدر انه قد يكون الرجل عنده مشاكل ماديه او اي عوائق اخرى
    للأسف مشاهد يوميه ما اتوقع انه نتخلص منها في اي وقت قريب

    ردحذف
  10. المشهد الأول
    الصنف هاذ من الناس موجود بكثرة للأسف
    من جهة بحب يتولّى دفة الحديث وبده اخر كلمة اله
    ومن جهة رأيه هو اللي صح دايما
    حتى مثل ما تفضلتي بالشغلات اللي فيها اكثر من زاوية
    يا اخي انا شايف هيك , رأيي هيك انا , مش حقك تحكيلي كيف افكر واتطلع عالامور كمان

    المشهد الثاني
    مرّات بحس الناس اللي حوالينا همّه عبارة عن لجنة تحكيم كبيييييييرة
    زي لما رحت عالترخيص عشان رخصة السواقة , بكون في ناس واقفين على جنب بستنوا دورهم , بقضّوها يعلقوا على كللل الناس اللي بتفحص , شوف هاظ وشوف هظيك ,هاظ راسب , هظاك زقرت , هظاك بنجح , شوف كيف طقع البرميل

    انه مش هيك الدنيا والله D:

    المشهد الثالث
    الله يعطيكي الف عافية يا رب ويجزيكي كل الخير

    راح تظلها مشكلتنا هاي للأسف , نحكم عالعالم بالمسميّات , ما دامها عزابيّة معناته فاضية فش وراها اشي , متجّوزة؟ الله يكون بعونها.

    بينما المتجوزة ممكن تكون جد فاضية اشغال , خاصة اذا كانت من هواة متابعة المسلسلات التركية وباب الحارة والخ الخ الخخخخخخخ

    ردحذف
  11. وحل:
    الله يعافيك يا رب :)
    كلامك صحيح و مبدأ "اللهم نفسي" صاير المبدأ الوحيد في تعاملنا مع بعض وأكيد إنت بتواجه اللي أنا بواجهه خاصة بالشغل لما تقابل من هالنوعيات كثير.
    الله يكون بعون الجميع.


    أم عمر:
    1) يا ريت الناس تقتنع إنه قناعاتي مش نفس قناعاتك أو يمكن إحنا التنين صح مش بالضرورة حدا لازم غلط.

    2)هههههه، آه والله مرات بصير اتفقد بحالي واطلع يمين وشمال انه شو فيه؟

    3) يعطيك العافية وأنا متأكدة انك بتتعبي كمان كثير وشكرا انك اعطيتيني لمحة عن التعليقات المستقبلية :)
    يسعد صباحك ومساكي :)


    شيشاني:
    1) والله معك حق ما فيه أدب من أصله!
    2) شكرا ما بدي حدا يتطمن علي! بس يمكن هاي كمان إلها علاقة برقم (1) ما فيه أدب.
    3) الله يعافيك... كمان انت وموتور المي... يعني أكيد فهمت معاناتي!
    يسعد مساك

    ردحذف
  12. نيسان:
    1) ولا لما يكون الموضوع عن الزوج وكل وحدة بتتفلسف بطرقها المثالية لاخضاعه وكيف انه الثانيات ما بيعرفوا يتصرفوا زيها. علشان هيك بحاول ما اجتمع مع اي نسوان ولا بحب الحياة الجتماعية ولا الزيارات إلا إذا فيه الضرورة!
    2)إن كانت البحلقة تسلية فهي للأسف أبشع وسيلة للتسلية.
    3)الله يعافيك، يا ريت الناس اللي حواليي تسمع منك هالكلام البيت هو البيت. أختي الصغيرة صارت مغتربة في عمان وأخدت سكن هناك علشان الشغل وبتيجي بس في آخر الاسبوع وأنا ماكلة هوا طول الأسبوع!
    الله يكون في العون.
    مسائك سعيد

    Sire:
    الله يعطيك ألف عافية وشكرا لمرورك الأول ويا ريت دايما تعيديها:)
    شايفة كل الناس متضايقة من موضوع البحلقة بس عاد بدك اللي يزوء على حاله ويهتم بشؤونه الخاصة!
    الله يعافيك ويسعد أيامك يا رب.


    رين:
    يعافيك ويخليك يا رب :)
    آه والله صدقت كتير من الأمهات اللي بعرفهم مسيحين أولادهم يا بالشارع يا قدام النت وهن رايحات زيارات وطشات وبتحكيلك مسؤولية!
    أما عن الاختلاف بالرأي فإحنا هيك اتربينا كل واحد سامع صوت حاله وبس وما حدا بيفهم أكثر مني!
    الله يسعد أيامك

    ردحذف
  13. طارق:
    يعطيك ألف عافية وشكرا لمرورك وكلماتك التشجيعية الدائمة.
    صحيح لازم نقتنع انه الناس هيك وتصرفاتها احيانا غير معقولة وغير مقبولة بس لازم نتحمل والله يكون بعون الجميع.


    مياسي:
    آااخ بس ... بعرف إنك فاهمتيني وما حدا بيفهم شعور الشنططة غير اللي عايش فيه بس هاتي اللي حواليك يفهموا !!
    الله يعينك على مسؤولياتك ويعطيك العافية يا رب.


    jaraad:
    1) اللي اتعلمناه انا نسمع صوتنا بس وحتى لو كانت وجهة نظر الناس صحيحة برضه مش ممكن ناخد فيها او نعترف انه حدا غيرنا بيفهم.
    2)أنا أكيد كان قصدي بالأردن.
    وبأكد على كلامك إنه هالمسألة ما عرفتها غير بالأردن وأنا سبق وحكيت إني انولدت وعشت فترة الطفولة بالكويت وما كان فيه من هالشي و على الرغم من اني كنت صغيرة لما رجعت وعشت بالأردن إلا إنه الأمر كان غريب بالنسبة إلي ولاحظته فورا، وكنت دايما أسأل حالي ليش الناس بتتطلع فيي هيك؟
    3) بستناك تكتبلنا عن موضوع العزوبية قريب :)

    أنا لما أكتب عن إشي بيغيظني فهو بس لفشة الغل أما إنه يتغير إشي فمسحيل لا من قريب ولا من بعيد.
    يسعد مساك.

    ردحذف
  14. المملكة البيضاء:
    شكرا لمرورك واهلا بك.


    أبو زينة:
    1) كلامك صحيح وهاي العبارة بتعبر عن كل اللي بدي أحكيه "من جهة بحب يتولّى دفة الحديث وبده اخر كلمة اله
    ومن جهة رأيه هو اللي صح دايما"
    إحنا هيك والاختلاف عنا معناه الخلاف ومرات هالنقاش بينتهي بزعلة لانك اذا ما اخذت بكلامي معناه اتهام صريح اني ما بفهم وانت واحد ما بيتقبل النصيحة.
    2)عالم فاضية.. لو كل واحد اتطلع على حاله وبحلق شوي في نفسه وانتقدها وصلح شوي كان صرنا احسن الناس.
    3) الله يعافيك وشكرا الك.
    والله كلامك صحيح، وبعرف منهم عدد لا بأس به مشغولة بالمسلسل أو بالزيارات وحتى اولادها ما بتدير بالها اذا درسوا ولا لأ .
    الله يهدي الجميع يا رب ويسعد مساك .


    ويسبر:
    أول شي كيف الحال؟ انشاء الله تكوني بخير يا رب.
    إذا حضرت نقاشات فأكيد إنت متخيلة عن شو بحكي، خاصة لما يقلب طوشه ويعلى الصوت وتحمر الوجوه والموضوع أصلا مش مستاهل!
    2) يااااا لهوي... حتى بالبلاد التانية ينبحلق! معناه الموضوع مش بإيدنا هاد مولود معانا أكيد.
    3) آه..إنت أكتر وحده عارفة عن شو بحكي وخاصة انك موظفة زيي والبنت الوحيدة بالبيت كمان زيي والله يكون بعونا.
    وموتور المي انشاءالله عمرك ما تضطري تتواجهي معه ابدا لإنه بنرفز وبجيب للواحد انهيار عصبي :)
    مساءك سعيد

    ردحذف
  15. مشا الله عليك وعلى مواضيعك
    محللة اجتماعية من الدرجة الاولى :)
    انا مع كلام ام عمر لانو فعلا مهما تغيرت ظروفك رح يلاقولك نقطة يحكو فيها
    والله معاناة تبع تعبية المياه هههههه
    نفس الوضع عندنا :)
    اما البحلقة بكل مكان فمش ديما الصراحة
    بالمدن هون عندنا الكل يجري ومش ملحق ومش شايف قدامو غير طريقو ولا فاضي انو يبحلق اصلا ههههه
    اما بالقرى ففي هي الحالة بس لسا في حياء
    تقبلي تحياتي

    ردحذف